03 Jan 2024, 11:52
މިދިޔަ އަހަރު އައިސްފައި ވަނީ ޖުމްލަ 1.87 މިލިއަން ފަތުރުވެރިން ކަމުން، މިދިޔަ އަހަރަށް ކުރީގެ ސަރުކާރުން ކަނޑައެޅި ފަތުރުވެރިކަމުގެ އަމާޒު ހާސިލެއްނުވިއެވެ.
މިދިޔަ އަހަރަށް ސަރުކާރުން ފުރަތަމަ ކަނޑައެޅި އަމާޒަކީ 1.8 މިލިއަން ފަތުރުވެރިން ގެނައުމެވެ. ނަމަވެސް އެ އަދަދު 1.9 މިލިއަނަށް މަތިކޮށްފައިވާކަން މިދިޔަ އަހަރުގެ ރިޔާސީ އިންތިޚާބު ތެރޭގައި އޭރުގެ ރައީސް އިބްރާހީމް މުޙައްމަދު ޞާލިޙް އިއުލާން ކުރެއްވިއެވެ.
ޓޫރިޒަމް މިނިސްޓްރީން މިދިޔަ ހޯމަ ދުވަހު އާންމުކުރި ތަފާސްހިސާބުން ދައްކާ ގޮތުގައި މިދިޔަ އަހަރުގެ ފަހު ދުވަހުގެ ނިޔަލަށް ރާއްޖެ އައިސްފައި ވަނީ 1،878،537 ފަތުރުވެރިންނެވެ.
ރާއްޖެއަށް 1.8 މިލިއަން ވަނަ ފަތުރުވެރިޔާ އައީ މިދިޔަ މަހުގެ 20ގައެވެ. އެ ދުވަހު ވަނީ ޑިސެމްބަރު ނިމުމުގެ ކުރިން ޖުމްލަ އަދަދު 1.9 މިލިއަނަށް އަރާނެ ކަމުގެ އުއްމީދު އޮތް ކަމަށް ވިދާޅުވެފައެވެ.
މިދިޔަ އަހަރު އެންމެ ގިނަ ފަތުރުވެރިން އައިސްފައި ވަނީ، 209،198 މީހުންނާ އެކު އިންޑިއާއިންނެވެ. އެ ގައުމުން މިދިޔަ މަހުގެ ފަހުކޮޅު މާކެޓުގެ އެންމެ ބޮޑު ހިއްސާ ހޯދީ ރަޝިއާ ފަހަތަށް ޖައްސާލުމަށް ފަހުގައެވެ. އެ ދެ ގައުމުގެ ފަތުރުވެރިންގެ މެދުގައި އޮތީ 52 މީހުންގެ ތަފާތެވެ.
ތިންވަނައަށް އެންމެ ގިނަ ފަތުރުވެރިން އައީ ޗައިނާއިންނެވެ. އެއީ 187،118 ފަތުރުވެރިންނެވެ.
މިދިޔަ އަހަރު އެންމެ ގިނަ ފަތުރުވެރިން އައިސްފައިވަނީ ކްރިސްމަސްއާއި އާ އަހަރުގެ ޗުއްޓީއާ ދިމާކޮށް މިދިޔަ މަހުގެ ތެރޭގައެވެ. އެއީ، 194،690 ފަތުރުވެރިންނެވެ.
ކޮވިޑްގެ ސަބަބުން ހުއްޓުމަކަށް އައި ފަތުރުވެރިކަމުގެ ދާއިރާއަށް މިދިޔަ އަހަރު ލިބިފައިވަނީ ވަރަށް ބޮޑު ކުރިއެރުމެކެވެ. އެގޮތުން 2022 ގައި ރާއްޖެ އައިސްފައިވަނީ 1.67 މިލިއަން ފަތުރުވެރިން ކަމަށްވާއިރު 2021 ގައި އައިސްފައިވަނީ 1.32 މިލިއަން ފަތުރުވެރިންނެވެ.