03 Jan 2024, 08:06
ރައްޔިތުންގެ މަޖިލީހުގެ ދ. މީދޫ ދާއިރާގެ މެމްބަރު އަދި އެމްޑީއޭގެ ރައީސް އަޙްމަދު ސިޔާމް މުޙައްމަދުގެ ބައްޕާފުޅު، ނ. ކުޑަފަރީ ކާމިނީގޭ މުޙައްމަދު ޤާސިމް މިއަދުގެ ފަތިހުގެ ވަގުތެއްގައި އޭޑީކޭ ހޮސްޕިޓަލުގައި އަވަހާރަވެއްޖެއެވެ.
މުޙައްމަދު ޤާސިމް އަވަހާރަވިއިރު ޢުމުރުފުޅަކީ 80 އަހަރެވެ.
ގާސިމް ރަށުގައި އުޅުއްވަނިކޮށް އާލަސްކަންފުޅަކަށް ފަރުވާ ދިނުމަށް މާލެ ގެނެސް އޭޑީކޭ ހޮސްޕިޓަލުގައި އެޑްމިޓްކުރީ މީގެ ދެ ދުވަސް ކުރިންނެވެ.
ސަންސިޔާމް ގްރޫޕް އޮފް ހޮޓެލްސްގެ ބާނީ ސިޔާމްގެ ބައްޕާފުޅު، ޤާސިމްއަކީ ކުޑަފަރީގެ ކަތީބުކަމާއި ރަށު ސްކޫލުގެ ނާޒިރުކަން ވެސް ކުރައްވާފައިވާ, ރަށާއި އަތޮޅުގެ ރައްޔިތުންގެ އިޙްތިރާމާއި ޤަދަރު ލިބިވަޑައިގެން ހުންނެވި ބޭފުޅެކެވެ.
ޤާސިމްގެ އެންމެ ދޮށީ ބޭފުޅަކީ ސިޔާމް މުޙައްމަދެވެ. ސިޔާމްއާ އެއްބަނޑު އެއްބަފާ ހަ ބޭފުޅުން ތިއްބަވައެވެ. އަދި އެހެން ބަނޑަކަށް ލިބުނު ތިން ބޭފުޅުންނާއެކު ޤާސިމްގެ ޖުމްލަ ނުވަ ބޭފުޅުން ތިއްބަވައެވެ.
ސަންސިޔާމް މީޑިއާގެ ބާނީގެ ލޮބުވެތި ބައްޕަ އަވަހާރަވުމުގެ ހިތާމައިގައި ބައިވެރިވެ، ސަން ސިޔާމް މީޑިއާގެ އެންމެހާ މުވައްޒަފުންގެ ނަމުގައި ސިޔާމްއަށާއި ޢާއިލާއަށް އިޙްލާސްތެރި ތަޢުޒިޔާ ދަންނަވަމެވެ. އަދި ބައްޕާފުޅުގެ ފުރާނަފުޅަށް ސުވަރުގޭގެ ދާއިމީ ނިޢުމަތް މިންވަރުކޮށްދެއްވުން އެދި ﷲގެ ޙަޟްރަތުގައި ދުޢާ ދަންނަވަމެވެ.