02 Jan 2024, 20:45
މާލޭގެ ޒިކުރާ މިސްކިތުގެ ތެރެއަށް ކުކުޅު ބިސް ޖެހި މައްސަލައެއް ފުލުހުން މިއަދު ތަހުގީގު ކުރަން ފަށައިފިއެވެ.
މިއަދު ފަތިސް ނަމާދަށް މީހުން ޒިކުރާ މިސްކިތަށް ދިޔައިރު، މިސްކިތް ތެރެއަށް ބިސް ޖަހާފައި ހުރި މަންޒަރު ފެންނަ ފޮޓޯތަކެއް ސޯޝަލް މީޑިއާގައި ވަނީ އާންމުވެފައެވެ.
ފުލުހުން "ސަން"އަށް ބުނީ އެ މައްސަލަ ރޭ ދަންވަރުގެ ވަގުތެއްގައި ފުލުހުންނަށް ހުށަހަޅާފައިވާ ކަމަށެވެ.
އެ މައްސަލައިގައި ތުހުމަތު ކުރެވޭ މީހާ މިހާރު ދެނެގަނެވިފައިވާ ކަމަށް ވެސް ފުލުހުން ބުންޏެވެ.
އެ މައްސަލަ ތަހުގީގު ކުރަމުން އަންނަ ކަމަށް ބުނި ނަމަވެސް އޭނާ ހައްޔަރުކޮށްފައިވާ ކަމެއް ފުލުހުން ނުބުނެއެވެ.
'ސަން'އަށް ބުނި ގޮތުގައި ބިސް ޖަހާފައި ހުރި މަންޒަރު ފެނުމާއެކު އެކަން ވަނީ މާލެ ސިޓީ ކައުންސިލަށް އަންގައިފައެވެ. ނަމަވެސް އެހައި ތަނަށް، ސިޓީ ކައުންސިލުން އެކަމާ ގުޅިގެން ފިޔަވަޅެއް އަޅާފައިނުވާ ކަމަށް އޭނާ މައުލޫމާތު ދިނެވެ.
މީގެ ކުރިން ވެސް ޒިކުރާ މިސްކިތް ނަޖިސް ކުރުމުގެ މައްސަލައެއް ކައުންސިލަށް ހުށަހަޅާފައިވާ ކަމަށާއި ނަމަވެސް ފިޔަވަޅެއް އަޅާފައިނުވާކަން އޭނާ ފާހަގަކުރިއެވެ.
އެ މައްސަލައިގައި މިހާތަނަށް 'ސަން'އަށް ސިޓީ ކައުންސިލްގެ ބަހެއް ލިބިފައެއް ނުވެއެވެ.