02 Jan 2024, 16:59
މަސްތުވާތަކެތި ބޭނުންކުރާ މީހުންނަށް ފަރުވާ ދޭ ރިހެބިލިޓޭޝަން ސެންޓަރުތައް ހިންގުމުގެ ހުއްދަ، ރާއްޖެއާއި ރާއްޖެއިން ބޭރުގެ އަމިއްލަ ފަރާތްތަކަށް ދިނުމަށް ސަރުކާރުން ނިންމައިފައިވާކަން މިއަދު އިއުލާންކޮށްފިއެވެ.
މިފަދައިން ސަރުކާރުން ނިންމީ އާދީއްތަ ދުވަހު ބޭއްވި ވަޒީރުންގެ މަޖިލީހުގައި، ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން މިކަމަށް އެދި ހުށަހެޅުމާ ގުޅިގެންނެވެ.
މިކަން އިއުލާނުކުރެއްވީ މިއަދު ބޭއްވި ނޫސްވެރިންގެ ބައްދަލުވުމެއްގައި ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމެވެ. އޭނާ ވިދާޅުވީ، އެ މައްސަލައާ ގުޅޭ ގޮތުން މަޝްވަރާކޮށް، ކަމާ ގުޅުން ހުރި ފަރާތްތަކުގެ އެހީތެރިކަމާއެކު ކޮމިއުނިޓީ ބޭސްޑް ރިހެބިލިޓޭޝަން ޕްރޮގްރާމް ހިންގުމަށް ނިންމާފައިވާ ކަމަށެވެ.
އެ ސެންޓަރުތައް ހިންގާނީ ރާއްޖޭގެ ގާނޫނާއި ގަވާއިދާ އެއްގޮތްވާ ގޮތުގެ މަތިންނާއި އިސްލާމީ ހަމަތަކަށް ފެތޭ ގޮތަށް ކަމަށް އޭނާ ވިދާޅުވިއެވެ.
"މިގޮތުން މި ޕްރޮގްރާމް ފުރަތަމަ ހިންގާ ތިން ސަރަހައްދެއްގެ ގޮތުގައި މިލަދުންމަޑުލު ދެކުނުބުރި ނ. ވެލިދުއާއި މާލެ އަތޮޅު ކ. ކާށިދުއާއި އަދި ހައްދުންމަތި އެއީ ލ. އަތޮޅުގައި ކޮންމެވެސް އެއް ރަށެއް ކައުންސިލާ ވާހަކަ ދައްކައިގެން ހަމަޖައްސައިގެން ކުރިއަށްގެންދިޔުމަށް މަޝްވަރާ ކުރެވި ވަނީ ނިންމިފައި،" ނާޒިމް ވިދާޅުވިއެވެ.
މަސްތުވާތަކެއްޗަށް ފަރުވާ ދިނުމުގެ ގޮތުން، ސަރުކާރުން މިހާރުވެސް އަންނަނީ ކ. ހިންމަފުށީގައި ރިހެބިލިޓޭޝަން ސެންޓަރަކާއި ހުޅުމާލޭގައި ހާފްވޭ ހައުސްއަކާއި މާލޭގައި ރިހެބް ސެންޓަރެއް ހިންގަމުންނެވެ.
ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން މީގެ ކުރިން ވިދާޅުވެފައިވާ ގޮތުގައި، މަސްތުވާތަކެއްޗާ ދެކޮޅަށް އުފައްދާފަައިވާ ޓާސްކްފޯހުގެ މަސައްކަތުން މިދިޔަ މަހު ދެ ހަފުތާއެއް ތެރޭގައި ފަސް މިލިއަނަށް ވުރެ ގިނަ ރުފިޔާގެ މަސްތުވާތަކެއްޗާއި ރާ އަތުލައިގެންފައިވާ ކަމަށް ވިދާޅުވެފައެވެ.