02 Jan 2024, 19:21
މާލޭގެ ޒިކުރާ މިސްކިތުގެ ތެރެއަށް ކުކުޅު ބިސް ޖެހި މައްސަލައެއް މިއަދު ފެންމަތިވެއްޖެއެވެ.
މަންޒަރު ދުށް މީހަކު 'ސަން'އަށް ބުނީ އެ މައްސަލަ ފާހަގަވީ ފަތިސް ނަމާދު ވަގުތުގައި ކަމަށެވެ. އެގޮތުން އޭނާ މިސްކިތަށް ދިޔައިރު ބިސް ޖަހާފައި ހުރި މަންޒަރު ފެނުމާއެކު އެކަން މާލެ ސިޓީ ކައުންސިލަށް ރިޕޯޓްކުރި ކަމަށް އޭނާ ބުންޏެވެ.
އޭނާ ބުނީ، ޒިކުރާ މިސްކިތަކީ ކެމެރާ ހަރުކޮށްފައި ހުންނަ މިސްކިތެއް ކަމަށެވެ. އެހެންވެ މިސްކިތުގެ ކެމެރާތައް ބަލައި މިފަދަ ކަމެއް ކުރި މީހަކު ނުވަތަ ބަޔަކު ހޯދައިދިނުމަށް އެދުނު ކަމަށް އޭނާ ބުންޏެވެ.
"ސިޓީ ކައުންސިލަށް ރިޕޯޓްކުރުމުން އެބޭފުޅުން އެތަނަކަށް ނާދެ. މިސްކިތުގައި އުޅޭ މީހުން އެތަން ސާފުކުރީ،" އޭނާ ބުންޏެވެ.
ޛިކުރާ މިސްކިތް ތެރޭ ކުކުޅު ބިސްތައް ތަޅާފަ --- ފޮޓޯ/ ފޭސްބުކް/އަހްމަދު މުނައްވަރު
ބެލެވޭ ގޮތުގައި އެކަން ކޮށްފައި ވަނީ މަސްތުވާތަކެތި ބޭނުންކުރާ ޒުވާނެއް ކަމަށް، ކަމަށް ވެސް އޭނާ ބުންޏެވެ.
މީގެ އިތުރުން މީގެ ކުރިން ވެސް މިކަހަލަ މައްސަލައެއް ދިމާވެފައިވާ ކަމަށާއި ނަމަވެސް ސިޓީ ކައުންސިލުން ހައްލެއް ހޯދައިދީފައިނުވާ ކަމަށެވެ. އެގޮތުން މިސްކިތުގެ ވުޟޫ ކުރާ ތަނުގައި ނަޖިސް ހުރި މައްސަލައެއް ކުރިން ރިޕޯޓުކުރި ކަމަށް އޭނާ ބުންޏެވެ.
"ސިޓީ ކައުންސިލުން އެފަހަރުވެސް ބުނީ ކެމެރާތަކަށް އެ ފަދަ އަމަލެއް ކުރާ ތަނެއް އަރާފައެއް ނެތޭ. އެހެންވެ، އެ ކަން ކުރީ ކާކު ކަމެއް އަދިވެސް ނޭނގޭ." އޭނާ ބުންޏެވެ.
މި ކަމާ ގުޅިގެން ސޯޝަލް މީޑިއާގައި އާންމުން އަންނަނީ ކަންބޮޑުވުން ފާޅުކުރަމުންނެވެ.
ފޭސްބުކްގައި މީހަކު ކޮށްފައިވާ ޕޯސްޓެއްގައި ބުނީ މި ފަދަ އަމަލުތަކަކީ ވަރަށް ދަށު ދަރަޖައިގެ އަމަލުތައް ކަމަށެވެ. އަދި މި ފަދަ ކަންކަން ކުރާ މީހުންނަށް ފުރައްސާރަ ކުރެވެނީ ހެއްދެވި ފަރާތާއި އިސްލާމް ދީނަށް ކަމަށް އެ ޕޯސްޓުގައި ވަނީ ބުނެފައެވެ.
އެހެންވެ، އެކަމަށް އެދެވޭ ހައްލެއް ގެނައުމަށާއި ކަމާއި ގުޅުން ހުރި މީހުންނަށް ފިޔަވަޅު އެޅުމަށް އޭނާ ވަނީ ގޮވާލާފައެވެ.
ޒިކްރާ މިސްކިތުގައި މީހުންތަކެއް: އެމިސްކިތުގެ ތެރޭގައި ކުކުޅު ބިސްތަކެއް ތަޅާފަ ހުރި މައްސަލައެއް ވަނީ ފެންމަތިވެފަ-- ސަން ފައިލް ފޮޓޯ
"މިސްކިތުގައި ހަރުކޮށްފައި ހުރި ކެމެރާތަކުގެ ރެކޯޑިން ބަލައިގެން ވިޔަސް މިކަން ކުރި ބަޔަކު ނުވަތަ މީހަކު ހޯދާށެވެ. އަދި އެމީހަކު ދެވަނަ ފަހަރަށް މިވަރުގެ ކަމެއް ނުކުރާ ވަރު ކުރާށެވެ." އެ ޕޯސްޓުގައިވެއެވެ.
މި މައްސަލައިގައި މިހާތަނަށް 'ސަން'އަށް ސިޓީ ކައުންސިލްގެ ބަހެއް ލިބިފައެއް ނުވެއެވެ.