02 Jan 2024, 14:28
އެކި ސަބަބުތަކާއި ގުޅިގެން ސިއްޙީ ދާއިރާއިން ދުރުވެފައިވާ ޚިދުމަތްތެރިންނަށް އަލުން ވަޒީފާ ދިނުމަށް ނިންމައި، އެ ކަމަށް ޚާއްސަ އުސޫލުތަކެއް ކަނޑައަޅަން ނިންމައިފައިވާ ކަމަށް ރައީސް އޮފީހުން މިއަދު ބުނެފިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހީމް ވިދާޅުވީ، މިހާރުން މިހާރަށް ވަޒީފާއަށް ނިކުންނަށް ބޭނުންވާ މީހުންނަށް ވެސް އެ ފުރުސަތު ފަހިކޮށްދޭނެ ކަމަށެވެ.
އެގޮތަށް ނިންމީ އެންމެ ފަހުން އޮތް ކެބިނެޓް ބައްދަލުވުމުގައި ހެލްތު މިނިސްޓްރީން އެ ކަމާ ގުޅޭގޮތުން ހުށައެޅި ކަރުދާހަކަށް ބިނާކޮށް މަޝްވަރާކުރުމަށްފަހު ކަމަށް އޭނާ ވިދާޅުވިއެވެ.
އެގޮތުން މި ކަަމަށް ޚާއްސަ ސްކީމެއްގެ ދަށުން ދާއިރާއަށް އަވަސް ރެކްރޫޓްމަންޓު ޕްރޮސެސްއެއްގެ ތެރެއިން ވަޒީފާ ހަމަޖައްސައިދިނުމަށް ނިންމާފައިވާ ކަމަށް އޭނާ ވިދާޅުވިއެވެ. އެއީ ވަކި އަދަދެއް ކަނޑައަޅައިގެން ކުރާ ކަމެއް ނޫންކަމަށް ވެެސް ވިދާޅުވިއެވެ.
ހަމައެއާއެކު ރިޓަޔާކޮށްފައިވާ ނުވަތަ 55 އަހަރު މަތީ ފަރާތްތަކަށް ވަޒީފާ ދޭނީ ސިއްހީ ގޮތުންނާއި ތައުލީމާއި ތަޖުރިބާ އަދި ހުނަރަށް ބަލައި، ކޮންޓްރެކްޓު އުސޫލުން ވަޒީފާ ދޭން ވެސް ނިންމައިފައިވެއެވެ.
އަދި ބޭނުންވާ ފަރާތްތަކަށް ފްލެކްސިބަލް ވޯކިން އަވާޒް ތައާރަފްކޮށް އަށް ގަޑިއިރަށްވުރެ މަދުން މަސައްކަތްކުރަން ބޭނުންވާ މީހުންނަށް އެ ފުރުސަތު ދޭން ހަމަޖެހިފައިވާކަމަށް ވެސް ވިދާޅުވިއެވެ.
އެއީ އެ މީހުން މަސައްކަތްކުރާ ވަގުތަށް ބަލައި އުޖޫރައެއް ދިނުމަށް ކަނޑައަޅައި ސިވިލް ސާވިސްގެ ގަވާއިދުގައި ހިމަނައިގެން ކުރާނެ ކަމެއްކަމަށް ވެސް ވިދާޅުވިއެވެ.
ސިއްހީ ދާއިރާގެ އިތުރުން އެހެނިހެން ދާއިރާތަކުގެ ކުރީގެ ޚިދުމަތްތެރިންނަށް ވަޒީފާ ދިނުމަށް މަޝްވަރާތަކެއްކޮށް، ސަރުކާރުގެ ފުރަތަމަ 14 ހަފުތާ ނިމުމުގެ ކުރިން ކެބިނެޓަށް ހުށަހަޅުއްވާނެ ކަމަށް ނާޒިމް ވިދާޅުވިއެވެ.
ރާއްޖޭގައި މިހާރު ވެސް ގިނަ އަދަދެއްގެ ހެލްތު ވޯކަރުން ރިޓަޔާކޮށްފައި އެބަތިއްބެވެ. އެއީ މީގެ ކުރީގެ އަހަރުތަކުގައި ރާއްޖެއަށް ސިއްހީ ދާއިރާގައި މުހިންމު ގިނަ ޚިދުމަތްތަކެއްކޮށްފައި ތިބި މީހުންނެވެ.
އެގޮތުން ގައިންގަޔަށް އަރައި ބަލިތައް ނައްތައިލުމުގެ ކެމްޕޭންތަކާއި، އެ ނޫން މުހިންމު ގިނަ ކަންކަމުގައި އެ ފަދަ ހެލްތު ވޯކަރުންގެ ތަޖުރިބާ ފާހަގަކުރެވެއެވެ.