02 Jan 2024, 12:13
ދައުލަތުގެ ހިލޭ ބޭސް ފަރުވާ ސްކީމުގެ ތެރެއިން މިހާރު ހޯދޭ މެޑިކަލް ޗެކަޕް އައިޖީއެމްއެޗުން ހަދައިދެނީ ހަފުތާއަކު 40 މީހުންނަށް ކަމަށް އެ ހޮސްޕިޓަލުން މިއަދު ބުނެފިއެވެ.
އައިޖީއެމްއެޗުން މައުލޫމާތު ދިން ގޮތުގައި، އެ ހޮސްޕިޓަލުން މެޑިކަލް ޗެކްއަޕް ހެދުމަށް ނަން ނޯޓުކޮށްދެނީ ކޮންމެ ހަފުތާއެއްގެ ބުދަ ދުވަހާއި ހޮނިހިރު ދުވަހުުގެ ހެނދުނު 08:00 އިން މެންދުރުފަހު 15:00އާ ހަމައަށެވެ.
އެ ހޮސްޕިޓަލުން މެޑިކަލް ޗެކްއަޕް ހަދައިދެނީ ކޮންމެ ހަފުތާއެއްގެ އާދިއްތަ ދުވަހާއި ބުރާސްފަތި ދުވަހު ކަމަށް ބުންޏެވެ.
މިއިން ކޮންމެ ދުވަހަކު މެޑިކަލް ޗެކްއަޕް ހަދައިދެނީ 20 މީހުންނަށް ކަމަށް ވެސް އެ ހޮސްޕިޓަލުން ބުންޏެވެ. އެއީ، ހަފުތާއަކު 40 މީހުންނެވެ.
އުމުރުން 50 އަހަރުން މަތީގެ މީހުންނަށް އާސަންދައިގެ ދަށުން ހިލޭ މެޑިކަލް ޗެކަޕް ހެދޭނެކަމަށް ނެޝަނަލް ސޯޝަލް ޕްރޮޓެކްޝަން އެޖެންސީއިން ވަނީ އިއްޔެ ބުނެފައެވެ. އަދި، ދެވަނަ މެޑިކަލް ޗެކަޕެއް ހަދަން ޖެހޭ މީހުންނަށް ޑޮކްޓަރެއްގެ ލިޔުމާއެކު މެޑިކަލް ދެވަނަ މެޑިކަލް ޗެކަޕެއް ވެސް އާސަންދައިގެ ދަށުން ހެދޭނެއެވެ. އެގޮތުން:
އޭޕްރީލް 1 އިން ފެށިގެން 35 އަހަރާއި 49 އަހަރާ ދެމެދުގެ މީހުންނަށް ހިލޭ މެޑިކަލް ޗެކަޕް ހެދޭނެ
- އޭޕްރީލް 1 އިން ފެށިގެން 19 އަހަރުން ދަށުގެ ކުދިންނަށް ހިލޭ މެޑިކަލް ޗެކަޕް ހެދޭނެ
- ޖުލައި 1 އިން ފެށިގެން 19 އަހަރާއި 34 އަހަރާ ދެމެދުގެ މީހުންނަށް ހިލޭ މެޑިކަލް ޗެކަޕް ހެދޭނެ
މެޑިކަލް ޗެކްއަޕް ހެދުމުގެ ޚިދުމަތް ފުޅާވެގެން އަންނައިރު ޑިމާންޑާ އެއްވަރަށް ޚިދުމަތް ދިނުމަށް އެ ހޮސްޕިޓަލުގައި ހާއްސަ ކްލިނިކެއް ވެސް ތައްޔާރުކުރަން ރާވައިފައިވާ ކަމަށް ވެސް އެ ހޮސްޕިޓަލުގެ ސީއީއޯ އިބްރާހިމް އަބްދުއްރައްޒާގު ހަލީމް ވަނީ މީގެ ކުރިން ވިދާޅުވެފައެވެ.
އަދި، ހުޅުމާލޭ ހޮސްޕިޓަލުގައި ވެސް އެ ކަމަށް ޚާއްސަ ކްލިނިކެއް ތައްޔާރުކޮށްފައިވާނެ ކަމަށް އޭނާ ވިދާޅުވިއެވެ.
މި ޚިދުމަތްތައް އާސަންދަ މެދުވެރިކޮށް ފޯރުކޮށްދިނުމަށް ރައީސް ޑރ. މުހައްމަދު މުއިއްޒުގެ ކެބިނެޓުން ނިންމެވީ، މި މަހުގެ ފަސްވަނަ ދުވަހެވެ.
ދަރިމައިވުމުގެ ފަރުވާ އާސަންދައިން ދިނުމަކީ ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ. އަދި، ފުރަތަމަ 14 ހަފުތާ ތެރޭގައި ކުރަން ވެސް ނިންމަވައިފައިވާ ކަމެކެވެ.