02 Jan 2024, 11:39
ރައީސް ޑރ. މުޙައްމަދު މުއިއްޒަކީ 100 އަހަރުން އެއްފަހު ގައުމަކަށް ދެއްވާނެ ފަދަ ހެޔޮ ވެރިއެއްކަމަށް، މި ސަރުކާރުގެ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސައީދު މިއަދު ވިދާޅުވެއްޖެއެވެ.
ދިވެހިރާއްޖޭގެ ޒަކާތު ހައުސް އިފްތިތާހުކުރުމަށް ބޭއްވި ހަފްލާގައި ވާހަކަދައްކަވަމުން ޑރ. ޝަހީމް ވިދާޅުވީ، ރައީސް ޑރ. މުއިއްޒު ވެރިކަމާ ހަވާލުވެވަޑައިގެންނެވި ވަގުތަކީ ގައުމުގެ އިސްލާމީ ޝަޚުސިއްޔަތު އިތުރަށް ވަރުގަދަ ކުރަން ޖެހިފައި އޮތް ވަގުތެއް ކަމަށެވެ.
ހަމައެއާއެކު، ރާއްޖޭގެ ގައުމީ ބަހާތައް ވަރުގަދަކޮށް، ރާއްޖޭގެ ގައުމީ ފޭރާން އަލުން ވިޔަން ޖެހިފައި އޮތް ވަގުތެއް ކަމަށް ވެސް ވިދާޅުވިއެވެ.
އެހެންކަމުން މި ފަދަ ވަގުތެއްގައި ރައީސް ޑރ. މުއިއްޒު ވެރިކަމާ ހަވާލުވުމަކީ ނިއުމަތެއްކަމަށް ވިދާޅުވިއެވެ.
"މިއީ ﷲ އައްޒަވަޖައްލު، ދިވެހި އުންމަތް، ދިވެހި ގައުމަށް ދަރުމަަކުރެއްވި ވަރަށް މަތުވެރި ނިއުމަތެއް، މި ވަގުތުގައި ރައީސް ޑރ. މުޙައްމަދު މުއިއްޒު ރާއްޖޭގެ ޒައާމަތުގައި ހުންނެވުމަކީ،" މިނިސްޓަރު ވިދާޅުވިއެވެ.
ދިވެހިރާއްޖޭގެ ޒަކާތު ހައުސް އިފްތިތާހުކޮށްދެއްވުމުގެ ރަސްމިއްޔާތުގައި ރައީސް ޑރ. މުއިއްޒާއި، މިނިސްޓަރު ޑރ. ޝަހީމް -- ފޮޓޯ: އިންފިނިޓް މޯމެންޓްސް/ މުޙައްމަދު މާވީ
މިނިސްޓަރު ވިދާޅުވީ މިފަދަ ވެރިއަކު ކޮންމެ އުންމަތަކަށް ވެސް އަންނަނީ 100 އަހަރުން އެއްފަހަރުގައިކަން ތާރީޚުން ހާމަވާކަމަށެވެ. އަދި މި ފުރުސަތަކީ ގައުމީ ފޭރާމާއި ޝަޚްސިއްޔަތު އަލުން އިއާދަކުރުމަށް އޮތް ފުރުސަތެއްކަމަށް ވެސް މިނިސްޓަރު ވިދާޅުވިއެވެ.
"އެހެންވީމާ މި ފުރުސަތު އަޅުގަނޑުމެން ނަގައިލައިގެން ނުވާނެ. ދިވެހި ލޮބުވެތި ރައްޔިތުންނަށް، އަޅުގަނޑު އެދެނީ، އިލްތިމާސްކުރަނީ ރައީސުލްޖުމްހޫރިއްޔާ ޑރ. މުއިއްޒުގެ އަތްޕުޅުގައި ހިއްޕެވުމަށް،" މިނިސްޓަރު ޝަހީމް ވިދާޅުވިއެވެ.
އޭނާ ވިދާޅުވީ އެއީ ވަޒީރަކަށް ވީތީވެ ދައްކަވާ ވަހަކައެއް ނޫންކަމަށެވެ. ނަމަވެސް އެއީ ފާއިތުވި މަދު ދުވަސްތަކުގައި، އިސްލާމީ ކަންތައްތައް ކުރިއަށް ގެންދިއުމަށް ރައީސް ދެއްވާ އެއްބާރުލުމާއެކު ފާހަގަވާ މުހިންމު ކަންކަން ކަމަށް ވިދާޅުވިއެވެ.
އަދި މިއީ ގައުމު ހަމަ މަގަށް ގެންދިއުމަށް ރައްޔިތުން އެއްބައިވަންތަކަމާއެކު މަސައްކަތް ކުރަންވީ ވަގުތުކަމަށް ވިދާޅުވިއެވެ.
ރައީސަށް ތައުރީފް ކުރައްވައި، މިނިސްޓަރު ގިނަ ވާހަަކަފުޅުތަކެއް ދެއްކެވިއިރު، މީގެ ކުރިން ވެސް ސަރުކާރުގެ ދިފާއުގައި މިނިސްޓަރު ވަނީ ވަހަކަދައްކަވައިފައެވެ.