02 Jan 2024, 14:45
ޕޯލިއޯ އާއި މީސްލްސް ހިމެނޭ ގޮތަށް ބަލިތަކުން ދިފާއުވުމަށް ކުޑަކުދިންނަށްދޭ ވެކްސިންގެ އެތައް ހާސް ޑޯޒެއް ޣައްޒާއަށް ފޯރުކޮށްދީފައިވާ ކަމަށް ފަލަސްތީނުގެ ސިއްޙީ ވުޒާރާއިން ބުނެފިއެވެ.
އިސްރާއީލުން އެއްގަމު މަގުން ޣައްޒާއަށް ދެމުންދާ ހަމަލާތަކުގެ ސަބަބުން އާންމު ސިއްޙީ ހިދުމަތްދިނުން ވަނީ ހުއްޓިފައެވެ. އޭގެތެރޭގައި ކުޑަ ކުދިންނަށް ދޭ ވެކްސިންވެސް ހިމެނެއެވެ.
މިހާރު އަށް މަހާއި 14 މަހާ ދެމެދުގެ މުއްދަތަކަށް ވެކްސިން ދިނުމަށް ފުދޭ ވަރަށް ވެކްސިން ޑޯޒް ޣައްޒާއަށް އެތެރެކޮށްފައިވާ ކަމަށް ސިއްޙީ ވުޒާރާއިން ބުނެއެވެ. ވެކްސިންތައް ޣައްޒާއަށް ގެނެސްފައިވަނީ މިސްރާއި ޣައްޒާ ގުޅޭ ރަފަޙް ބޯޑަރު ހުރަސްކޮށް މިސްރު ސަރުކާރު އެހީގައި ފިނި ކޮށްގެނެވެ.
ބަލިތައް ފެތުރުން ކޮންޓްރޯލު ކުރުމަށް ޣައްޒާއަށް ވެކްސިން ވެއްދުމަށް ހުއްދަ ދޭނެ ކަމަށް އިސްރާއީލުން ވަނީ ބުނެފައެވެ.
ސިއްޙީ ވުޒާރާގެ އޮފިޝަލެއް ކަމަށްވާ ޔާސިރު ބައުޒިއާ ވިދާޅުވީ ޣައްޒާގައި އަލަށް އުފަންވާ ކުދިންގެ އަދަދު 60،000 އެއްހާ ކަމަށް ލަފާކުރެވޭ ކަމަށާއި އެއީ އާންމުކޮށް ވެކްސިން ޖަހާ ކުދިން ނަމަވެސް ޣައްޒާގެ މިހާރުގެ ހާލަތު އޮތް ގޮތުން އެ ކުދިންނަށް ވެކްސިންދިނުން ވަނީ ހުއްޓައިލައިފައި ކަމަށެވެ.
އޭނާ ވިދާޅުވީ އެ ވެކްސިންތައް ކުޑަކުދިންނަށް ދިނުމަކީ އުނދަގޫ ކަމެއް ކަމަށާއި ސަބަބަކީ ޣައްޒާގެ އާބާދީގެ ބޮޑު ބަޔަކަށް އެ މީހުންގެ ގެދޮރުން ދޫކޮށްލަން މަޖުބޫރުވެފައިވުމެވެ. ޣައްޒާގެ އެތައް ހާސް ބަޔަކު އަންނަނީ ވަގުތީ ހިޔާތަކުގައާ އެ ނޫންވެސް ތަންތަނުގައި ދިރިއުޅެމުންނެވެ.
ރުބެއްލާ، ޕޯލިއޯ، މީސްލްސް އަދި މަމްޕްސް ފަދަ ބަލިތަކާ ދެކޮޅަށް ވެކްސިން ދޭ ކަމަށާއި ބައެއް ވެކްސިންތައް އދގެ ކުޑަކުދިންގެ ފަންޑު ޔުނިސެފުން ވެސް ހަދިޔާކޮށްފައިވާ ކަމަށް ސިއްޙީ ވުޒާރާއިން ހާމަކުރެއެވެ.