02 Jan 2024, 19:48
ޣައްޒާގެ އާންމުންނަށް ބޭނުންވާ އިންސާނީ އެހީތެރިކަން އިތުރުކުރަން ޖެހޭ ކަމަށާއި ޣައްޒާއަށް މިހާރު އެތެރެކުރާ އެހީގެ މިންވަރަކީ އެ ސިޓީގެ އާބާދީގެ އެންމެ 10 އިންސައްތައަށް ބޭނުންކުރެވޭ ވަރުގެ އެހީ ކަމަށް އިސްރާއީލު މީޑިއާތަކުން ބުނެފިއެވެ.
އިސްރާއީލުގެ ނޫހެއް ކަމުގައިވާ ހާރޭޒްއިން ބުނީ ޣައްޒާގެ އާބާދީގެ ގިނަ މީހުން ތިބީ ބަނޑުހައިހޫނުކަންމަތީގައި ކަމަށެވެ. އެގޮތުން 2.3 މިލިއަން މީހުންގެ އާބާދީއެއް އޮންނަ ޣައްޒާގެ 90 އިންސައްތަ މީހުން މުޅި ދުވަހު ކަހަލަ ގޮތަކަށް ތިބެނީ ނުކައި ކަމަށްވެސް އެ ނޫހުން ބުނެއެވެ.
އިސްރާއީލުން ޣައްޒާގެ އާންމުންނަށް ދެމުންގެންދާ އުދުވާނީ ހަމަލާތަކާއި ލާއިންސާނީ އަމަލުތައް އިސްރާއީލުގެ މީޑިއާތަކުން ދުނިޔެއަށް ފޮރުވަމުންދާ ކަމަށްވެސް ހަރޭޒް ނޫހުން ތުހުމަތުކުރެއެވެ.
ޣައްޒާގައި އިސްރާއީލުގެ ފައުޖުތަކުން ހިންގަމުންދާ ޖަރީމާތަކުގެ ސަބަބުން އެ ސިޓީގެ ދެބައިކުޅަ އެއްބަޔަށްވުރެ ގިނަ މީހުންނަށް ވަނީ އެމީހުންގެ އަމިއްލަ ގެދޮރު ދޫކޮށްލަން މަޖުބޫރުވެފައެވެ.
ހަނގުރާމައިގެ ހާލަތުއޮތް ޣައްޒާއަށް މެދުކެނޑުމެއްނެތި ދެމުންދާ ހަމަލާތަކާހެދި ކާބޯތަކެއްޗާއި ބޭހާއި، ބޭސް ފަރުވާއަށް ބޭނުންވާ ސާމާނު އަދި ކަރަންޓަށްވެސް ވަނީ ބޭނުންޖެހިފައެވެ.
އދ.ގެ ކޮންފަރެންސް އޮން ޓްރޭޑް އެންޑް ޑިވެލޮޕްމަންޓް (ޔޫއެންސީޓީއޭޑީ) އިން އޮކްޓޯބަރުމަހު ބުނެފައިވާ ގޮތުން ޣައްޒާގައި ތިބި ފަލަސްތީނުގެ 80 އިންސައްތަ މީހުން އަހަރުތަކެއް ވަންދެން ވަނީ ބައިނަލްއަގުވާމީ ގޮތުން ލިބޭ ކާބޯތަކެއްޗަށް ބަރޯސާ ވެފައެވެ.
އޮކްޓޯބަރު މަހުގެ ހަތް ވަނަ ދުވަހުން ފެށިގެން އިސްރާއީލުން ޣައްޒާއަށް ދެމުންދާ ހަމަލާތަކުގައި މިހާތަނަށް 21،800 އަށްވުރެ ގިނަ ފަލަސްތީނު މީހުން ވަނީ ޝަހީދުކޮށްލައިފައެވެ. އޭގެތެރޭގައި ގިނައީ ކުޑަކުދިންނާއި އަންހެނުންނެވެ.