02 Jan 2024, 18:09
ގޫގުލްއާ ދެކޮޅަށް އަމިއްލަ ބަޔަކު ކުރި ދައުވާއަކަށް ފަސް ބިލިއަން ޑޮލަރުގެ ބަދަލެއް ދޭން އެ ކުންފުނިން އެއްބަސްވެއްޖެއެވެ.
ރޮއިޓާސްއާއި، ވޮޝިންޓަން ޕޯސްޓުންވެސް މިކަން ކަށަވަރު ކޮށްދީފައިވާއިރު، އެ މައްސަލަ ހުށަހަޅާފައިވަނީ، ގޫގުލްގެ ބްރައުޒާ ކްރޯމްގެ އިންކޮގްނިޓޯ މޯޑުގައި ނެޓް ބޭނުންކުރާ މީހުންގެ ހަރަކާތްތައް އެ ކުންފުނިން ޓްރެކް ކުރި ކަމަށްބުނެއެވެ. އެ މީހުން ވަނީ އެ މައްސަލައިގައި ބަދަލުގެ ގޮތުގައި ފަސް ބިލިއަން ޑޮލަރު ހޯދަން ގޫގުލްގެ މައްޗަށް ދައުވާކޮށްފައެވެ.
ދެހާސް ވިހި ވަނަ އަހަރު ހުށަހެޅި ކްލާސް އެކްޝަން އެ ދައުވާގައި ވަނީ ގޫގުލް އިންކޮގްނިޓޯ މޯޑުގައި ސައިޓްތައް ބްރައުޒް ކުރާ މީހުންގެ ހަރަކާތްތައް ގަވައިދާ ޚިލާފަށް ޓްރެކް ކުރާ ކަމަށް ތުހުމަތުކޮށްފައެވެ. އަދި ވެބް އެކްޓިވިޓީ މޮނިޓާ ކުރުމަށް ގޫގުލްއިން އެކި ވަސީލަތްތަކާއި ޚިދުމަތްތަކަށް ބަރޯސާވެ، ފެޑެރަލް ވަޔަޓެޕިން އާއި ކެލިފޯނިއާ ޕްރައިވެސީ ގާނޫނާ ޚިލާފުވެފައިވާ ކަމަށްވެސް ދައުވާގައި ބުނެފައިވެއެވެ.
މައްސަލަ ހުށަހެޅި ފަރާތްތަކުން ވަނީ ހެކީގެ ގޮތުގައި ގޫގުލްގެ އެތެރޭގެ އީމެއިލްތަކެއްވެސް ހުށަހަޅާފައެވެ. އިންކޮގްނިޓޯ މޯޑް މާކެޓްކޮށްފައި ވަނީ ބްރައުޒިން ހިސްޓްރީ އާއި ސައިޓް ޑޭޓާ ރައްކާކުރުން ހުއްޓުވާ ފީޗާއެއްގެ ގޮތުގައި ކަމަށް ވާތީ، ގޫގުލް އިން ވަނީ ކަސްޓަމަރުންނަށް އޮޅުވާލާ ޓްރެކިންގެ މިންވަރާ މެދު މަކަރު ހަދަފައި ކަމަށްވެސް އެ ދައުވާގައި ބުނެފައިވެއެވެ.
އެ މައްސަލައާ ގުޅިގެން ގޫގުލްއިން އޭރު ބުނެފައި ވަނީ އިންކޮގްނިޓޯ މޯޑުން ޑިވައިސް ލެވެލްގައި މައުލޫމާތު ހިފެހެއްޓުމަށް ހުރަސް އެޅޭ ކަމަށާއި ނަމަވެސް ވެބްސައިޓްތަކުން އަމިއްލައަށް އެއްވެސް މައުލޫމާތެއް އެއްނުކުރާ ކަމަށެވެ.
ގޫގުލްއިން އެފައިސާ ދައްކަން އެއްބަސްވެފައިވީ ނަމަވެސް އެ ސެޓްލްމަންޓް ހަމަޖައްސާނެ ތާވަލެއް ނުވަތަ ގޮތެއް އަދި އެކުންފުނިން ހާމަކޮށްފައެއް ނުވެއެވެ. މައްސަލައިގެ ހުރިހާ އަޑުއެހުންތަކެއް އަދި ނުނިމޭތީ ކޯޓުންވެސް އަދި އެމައުލޫމާތު ހާމަކޮށްފައެއް ނުވެއެވެ.
މި އެއްބަސްވުން ހަދާފައި މިވަނީ ގޫގުލް އިން އެ މައްސަލަ ބޭރުކޮށްލުމަށް ކުރި މަސައްކަތް ނާކާމިޔާބުވިތާ ކުޑަ އިރުކޮޅެއް ފަހުންނެވެ. މިއީ އިންކޮގްނިޓޯ ބްރައުޒާ ސެޝަންތައް މޮނިޓާ ކުރާ ކަމަށް އިއުތިރާފުވި ފުރަތަމަ މައްސަލަ ކަމަށް ރިޕޯޓުތައް ބުނެއެވެ.
ދެހާސް އަށް ވަނަ އަހަރު ތައާރަފުކުރި ގޫގުލް ކްރޯމްގެ އިންކޮގްނިޓޯ މޯޑުގެ މައިގަނޑު ސިފަތަކަކީ ހިސްޓްރީ، ކުކީޒް ނުވަތަ ސައިޓް ޑޭޓާ ފަދަ އެއްވެސް މައުލޫމާތެއް އެއް ނުކުރުމެވެ. އިންކޮގްނިޓޯ ސެޝަނެއްގައި ޒިޔާރަތްކުރާ ސައިޓްތައް ވެސް ބޭނުންކުރާ މީހާގެ ކްރޯމް ހިސްޓްރީގައި ނުފެންނާނެއެވެ.
މި ފީޗާގެ ސަބަބުން އިންކޮގްނިޓޯ އަކީ އެ ޑިވައިސް ބޭނުންކުރާ އެހެން މީހުންނަށް ފެންނަން ބޭނުން ނުވެދާނެ ގޮތަށް ސިއްރުން ޕޭޖްތަކަށް ޒިޔާރަތް ކުރުމަށް ބޭނުންތެރި މޯޑެކެވެ. ނަމަވެސް އިންޓަނެޓްގެ ޚިދުމަތް ދޭ ފަރާތްތަކާއި ވަޒީފާ ދޭ ފަރާތްތަކާއި ސްކޫލުތަކުން ނެޓްވޯކް ޓްރެފިކް މޮނިޓާ ކުރާނަމަ އިންކޮގްނިޓޯއިން ސިއްރެއް ނުކުރެވެއެވެ. މީގެ އިތުރުން އިންކޮގްނިޓޯ ސެޝަނެއް ނިމުމުން ކޮންމެ ވެސް އެއް ޑައުންލޯޑެއް ނުވަތަ ބުކްމާކެއް ރައްކާ ކުރެވިފައި ހުންނާނެއެވެ.
ގޫގުލްއިން ކުރިންވެސް ސާފުކޮށްދީފައިވާ ގޮތުގައި އިންކޮގްނިޓޯއިން ހުރަސް އަޅަނީ ހަމައެކަނި އެ ބޭނުންކުރާ ޑިވައިސްގެ ޓްރޭސިބިލިޓީއަށް ކަމަށްވާއިރު، ބައެއް ފާޑުކިޔުންތެރިން ބުނަނީ މި ތަފާތަކީ ބޭނުންކުރާ މީހުންނަށް އެހާ ސާފުކޮށް ދީފައިވާ ތަފާތެއް ނޫން ކަމަށެވެ.