02 Jan 2024, 08:59
ބޮލީވުޑްގެ އިތުރުން އިންޑިއާގެ ސައުތު ސިނަމާގެ ފިލްމުތައް ވެސް ކުޅެފައިވާ ބަތަލާ ރަކުލް ޕްރީތު ސިންގާއި ލޯބިވެރިޔާ ޖެކީ ބަގްނާނީގެ ކައިވެނި އަންނަ މަހު ކުރަން ނިންމައިފައިވާ ކަމަށް ރިޕޯޓު ތަކުން ބުނެފިއެވެ.
ކުރިން ބައެއް ފިލްމުތަކުން ފެނިފައިވާ ޖެކީ ބަގްނާނީ އާއި ރަކުލްގެ ކައިވެނި ކުރުމަށް ނިންމައިފައިވަނީ ކުރިޔަށް އޮތް ފެބްރުއަރީ މަހުގެ 22ވަނަ ދުވަހު އިންޑިއާގެ ގޯއާގައެވެ.
އިންޑިއާގެ ފިލްމީ ޚަބަރުތައް ގެނެސްދޭ ހިންދުސްތާން ޓައިމްސްއާ ހަވާލާދީ ރިޕޯޓުތަކުން ބުނެފައި ވަނީ، ރަކުލްގެ ކައިވެނީގެ ޙަފްލާގައި ބައިވެރިވުމަށް ދައުވަތު ދެވޭނީ ހަމައެކަނި އާއިލާގެ މެމްބަރުންނަށް ކަމަށާއި، އަދި ދެ މީހުންގެ ވެސް ވަރަށް ގާތް ރަޙްމަތްތެރިންނަށް ކަމަށެވެ.
ކައިވެނީގެ ޚަބަރުތައް އެހާ ބޮޑަށް އިއުލާނު ކުރަން ބޭނުންނުވާ ކަމަށާއި ދެ މީހުންގެ އާއިލާއިން ވެސް ބޭނުން ވަނީ ކައިވެނީގެ ހަފްލާތައް ވަރަށް ޕްރައިވެޓްކޮށް ގެންދިއުމަށް ކަމަށް ރިޕޯޓު ތަކުން ވަނީ ބުނެފައެވެ.
ރަކުލާއި ޖެކީގެ ކައިވެނީގެ ޚަބަރުތައް މީޑިއާ ރިޕޯޓުތަކުން ތިލަކޮށްފައިވާއިރު ދެ މީހުން ވެސް މި ވަގުތު ދަނީ ބެންގްކޮކްގެ ތައިލެންޑްގައި ޗުއްޓީ ހޭދަކުރަމުންނެވެ.
ރިޕޯޓުތަކުން ބުނެފައިވާ ގޮތުން ކައިވެނީގެ ކުރިން ޖެކީގެ ގާތް ރަޙްމަތްތެރިންގެ ފަރާތުން ދޭ ހާއްސަ ބެޗެލާ ޕާޓީ ތައިލޭންޑްގައި ބޭއްވުމަށް ވަނީ ހަމަޖެހިފައެވެ.
ބަތަލާ ރަކުލް ލޯބިވެރިޔާ ޖެކީއާ އެކު-- ފޮޓޯ/ މޫވީ ޓޯކީސް
ފިލްމު "ޔާރިއާން"އިން 2014ވަނަ އަހަރު ބޮލީވުޑަށް ތައާރަފްވި ރަކުލްގެ މަގުބޫލު ފިލްމުތަކުގެ ތެރޭ "ދޭ ދޭ ޕިޔާރު ދޭ"، "ސަރުދާރު ކާ ގްރޭންޑް ސަން"، "ރަން ވޭ" އަދި "ތޭންކް ގޯޑް" ހިމެނެއެވެ.
އެކްޓުކުރުމަށް ވުރެ ބޮޑަށް މިހާރު ފިލްމު ޕްރޮޑިއުސްކުރުމުގެ މަސައްކަތުގައި ހަރަކާތްތެރިވާ ޖެކީއާއި ރަކުލް ލޯބީގެ ގޮތުން ގުޅިގެން އުޅޭކަން އިއުލާނު ކުރީ 2021ވަނަ އަހަރު ބަތަލާގެ އިންސްޓަގްރާމް މެދުވެރިކޮށެވެ.
ރަކުލް ދެން އެންމެ އަވަހަށް ބެލުންތެރިންނަށް ފެންނާނީ ސައުތު އެކްޓަރު ކަމާލް ހާސަންއާއެކު ކުޅޭ ފިލްމު "އިންޑިއަން2"އިންނެވެ.
މަޝްހޫރު ފިލްމު ޕްރޮޑިއުސަރު ވާޝޫ ބަގްނާނީގެ ދަރިފުޅު ޖެކީ ޕްރޮޑިއުސްކުރާ ފިލްމު "ބަޅޭ މިޔާން ޗޯޓޭ މިޔާން" ވެސް އަންނަ އަހަރުގެ އޭޕްރިލް މަހު ސިނަމާތަކަށް ގެންނަން ވަނީ ނިންމައިފައެވެ.