02 Jan 2024, 09:12
"ޑާކްރެއިން" އިން ތައްޔާރުކޮށްފައިވާ ޑްރާމާ އަދި ރޮމޭންސް ފިލްމު "ނޮވެމްބަރ"ގެ ވަދާއީ ޝޯތައް ރިލީޒްކުރުމަށް ތައްޔާރުވެއްޖެއެވެ.
މިދިޔަ މަހުގެ ހަތަރު ވަނަ ދުވަހު ދައްކަން ފަށާފައިވާ ފިލްމު ނޮވެމްބަރުގެ ފަހުގެ ޝޯތައް އަޅުވާނީ ހަފުތާ ބަންދާ ދިމާކޮށެވެ. އެގޮތުން ޑާކްރެއިން އިން ހާމަކޮށްފައިވާ ގޮތުގައި ފިލްމު ދައްކާނީ މާދަމާ ރެއާއި ހުކުރު ދުވަހުގެ ރެއެވެ.
މި ޝޯތަކަށް އަދިވެސް ޖާގަ އޮތް އިރު ޓިކެޓު ބުކް ކުރުމުގެ ފުރުސަތު ވަނީ ހުޅުވާލާފައެވެ. ޑާކްރެއިން އިން ހާމަކުރާ ގޮތުގައި 9911229 އަށް ވައިބާ ނުވަތަ ވަޓްސްއެޕް މެސެޖު ކޮށްލައިގެން ޓިކެޓު ގަނެލެވޭނެއެވެ. އެއާއެކު ޓިކެޓް ގަންނަން ގެއިން ބޭރަށް ދާކަށް ނުޖެހޭނެއެވެ.
މި ފިލްމަކީ މަރިޔަމް މަޖުދާ އާއި މުހައްމަދު ޖުމައްޔިލު ނިމާލް ލީޑުން ފެނިގެންދާ ފިލްމެކެވެ.
ސިންގަޕޫރުގައި ކުޅެފައިވާ ފިލްމު "ނޮވެމްބަރު" އަކީ ޑާކްރެއިން އެންޓަޓެއިންމެންޓުން މިދިޔަ އަހަރު އެންމެ ފޯރިއާއެކު ނެރުމަށް ހަމަޖެހިފައިވާ އެއް ފިލްމެވެ.
މަޖުދާ އާއި ޖުމައްޔިލްގެ އިތުރުން ފިލްމުގެ އިތުރު ރޯލުތަކުން ފެންނާނީ އާއިޝަތު ޔާދާ އާއި އައިޝަތު ޢަލީ އާއި އިސްމާއީލް ވަޖީޙްއެވެ.
ނޮވެމްބަރު ދައްކަން ފެށުމާއެކު އާންމުންގެ ފަރާތުން ފިލްމަށް އަންނަނީ ބޮޑު ތަރުހީބެއް ލިބެމުންނެވެ. އެތައް ބަޔަކު ބުނަނީ ފިލްމަކީ ހަމަ ލޯބީގެ އަސަރު ގަދަ ފިލްމެއް ކަމަށެވެ.
ކޮވިޑަށް ފަހު 2021 ވަނަ އަހަރު ފުރަތަމަ ދެއްކުމަށް ތާވަލުކުރި މި ފިލްމު ވަނީ އެކި ސަބަބުތަކާ ގުޅިގެން ޑިލޭ ވެފައެވެ. މިއީ މި ފަހުގެ ތާރީހެއްގައި އެޅުވި އެންމެ ކޮންޓްރޮވާޝަލް އެއް ފިލްމުވެސް މެއެވެ. އެއީ ފިލްމުގެ ލީޑު ޖުމައްޔިލްގެ މައްސަލައެއް ކޯޓުގައި ބަލަމުން ދާއިރު ފިލްމު ޕްރިމިއާ ކުރުމުންނެވެ.
View this post on Instagram