02 Jan 2024, 09:06
ޝަރަފް އަބްދުﷲ އާއި އައިމިނަތު ރަޝްފާ (އާޝާ) ލީޑުން ފެނިގެންދާ ފިލްމު "މީ އިޝްގު"ގެ ސައުންޑްޓްރެކުން ވަރުގަދަ ޑާންސް ލަވައެއް ރިލީޒްކޮށްފިއެވެ.
ފިލްމުގެ ސައުންޑްޓްރެކުން ގިނަ ލަވަތަކެއް އަންނަނީ ރިލީޒްކުރަމުންނެވެ. މި ފަހަރު މި ރިލީޒް ކޮށްފައިވަނީ "ޝާހީ ލޮލުގައި" ކިޔާ ޑާންސް ނަމްބަރެއް ހިމެނޭ ލަވައެކެވެ. ލަވައިގެ މިއުޒިކް ވީޑިއޯ އާންމު ކޮށްފައިވާއިރު ފިލްމުގެ ލީޑް އެކްޓަރު އާޝާ މި ލަވައިގައި ނަށާ މަންޒަރުތައް ފެނިގެން ދެއެވެ.
މި ލަވަ ކިޔާފައިވަނީ މުހައްމަދު އަބްދުލް ގަނީ (ތޭރަވާ) އާއި މަރިޔަމް އަޝްފާއެވެ. ލަވައިގެ މިއުޒިކް ވީޑިއޯއިން ހޭވައްލާ ބޮޑުބެރު ގްރޫޕުގެ މެމްބަރުން ފެންނައިރު އަހްމަދު އިޝްފާން ވެސް ފެނިގެންދެއެވެ.
ލަވައިގެ މެލޮޑީ އާއި މިއުޒިކްގެ މަސައްކަތް ކޮށްފައިވަނީ ޝަހީދު ލެގަސީއެވެ. ލަވައިގެ ޑާންސް ކޮރިއޮގްރަފީގެ މަސައްކަތް ކޮށްފައިވަނީ ޑައިރެކްޓަރު އަޒްހާން އިބްރާހިމެވެ.
މީ އިޝްގު އިއުލާނުކޮށް ފިލްމުގެ މަސައްކަތް ފަށާފައިވަނީ މިދިޔަ އަހަރުގެ މާޗު މަހުގެ ތެރޭގައެވެ. އެއަށް ފަހު ފިލްމުގެ ގިނަ މަސައްކަތްތަކެއް ކުރަމުން ގޮސް ފިލްމުގެ ޝޫޓިން ވަނީ މިދިޔަ ނޮވެމްބަރު މެދުތެރޭގައި ނިންމާފައެވެ.
މި ހޮނިހިރު ދުވަހު ޕްރިމިއާ ކުރުމަށް ހަމަޖެހިފައިވާ މި ފިލްމުގެ ޓިކެޓު މިހާރު ވަނީ ވިއްކަން ފަށާފައެވެ. އޮލިމްޕަސް ކައުންޓަރުން ޓިކެޓު ވިއްކަމުންދާއިރު ޓިކެޓު ބުކް ކުރުމަށްޓަކައި ގުޅާނީ 9633326 އަށެވެ.
މި ފިލްމަކީ އާޝާއާއި ޝަރަފު އެކީގައި މަސައްކަތް ކުރާ ތިންވަނަ ޕްރޮޖެކްޓެވެ. އަދި ޖޯޑެއްގެ ގޮތުގައި ދެ މީހުން ފެނިގެންދާ މިއީ ދެވަނަ ފަހަރެވެ. މީގެ ކުރީން އުފައްދާފައިވާ ވެބް ސީރީޒެއް ކަމަށްވާ "ހިނދުކޮޅެއް"ގައި ވެސް ދެ މީހުން ވަނީ ޖޯޑެއްގެ ގޮތުގައި ފެނިގެން ގޮސްފައެވެ.
މިއީ އަޒްހާން ޑައިރެކްޓު ކުރާ ފުރަތަމަ ފިލްމެވެ.
View this post on Instagram