01 Jan 2024, 18:48
އިއްޔެ މާލެއަށް ވެހުނު ވާރެއާ ގުޅިގެން ފެން ބޮޑުވުމުގެ ސަބަބުން ގޭގެއަށް ގެއްލުން ލިބި ހާލުގައި ޖެހުނު 41 މީހަކު މިހާރު ވަގުތި ހިޔާތަކަށް ބަދަލުކޮށްފައިވާ ކަމަށް ނެޝަނަލް ޑިޒާސްޓާ އޮތޯރިޓީ (އެންޑީއެމްއޭ)އިން މިއަދު ބުނެފިއެވެ.
ފެން ބޮޑުވުމުގެ ހާދިސާގެ އެންމެ ފަހުގެ މައުލޫމާތު ހިއްސާކުރުމަށް މިއަދު ބޭއްވި ނޫސްވެރިންގެ ބައްދަލުވުމެއްގައި އެންޑީއެމްއޭގެ ޑެޕިއުޓީ ޗީފް އެގްޒެކެޓިވް މުހައްމަދު ފިކުރީ ވިދާޅުވީ، އެ 41 މީހުންނަނީ އަށް ގެޔަކަށް ނިސްބަތްވާ މީހުން ކަމަށެވެ.
އޭނާ ވިދާޅުވީ، ފެން ބޮޑުވެ ގެއްލުން ލިބުމުގެ ސަބަބުން 180 ރިޕޯޓެއް ކޮށްފައިވާ ކަމަށެވެ. އޭގެ ތެރޭގައި މީހުން ދިރިއުޅޭ ގެތަކާއި، ފިހާރަތަކާއި، ސަރުކާރު އޮފީސްތަކުގެ އިތުރުން ޕްރައިވެޓް އޮފީސްތައް ހިމެނޭ ކަމަށްވެސް އޭނާ ވިދާޅުވިއެވެ.
ރިޕޯޓުތައް ލިބުމުން މީހުން ދިރިއުޅޭ ތަންތަން ދެނެގަންނަން އެންޑީއެމްއޭއިން މަސައްކަތް ކުރި ކަމަށް ފިކުރީ ވިދާޅުވިއެވެ. އަދި ބެލި ބެލުމުން، މީހުން ދިރިއުޅެނީ އޭގެ ތެރެއިން 164 ތަނެއްގައިކަން އެނގުނު ކަމަށް އޭނާ ވިދާޅުވިއެވެ.
އެ ގެތަކުގެ ޚާއްޞަ އެސަސްމަންޓެއް ހެދިކަން ވެސް އޭނާ ފާހަގަކުރެއްވިއެވެ.
"މި 164 ގެޔަށް އަޅުގަނޑުމެން ވާނި އިނީޝަލް ރެޕިޑް އެސަސްމަންޓް ހަދަން ޓީމުތައް ފޮނުވާފަ. އިނީޝަލް ރެޕިޑް އެސަސްމަންޓް ހަދަން ދިޔަ ޓީމު ތަކުން މި 164 ގެޔަށް ޒިޔާރަތްކޮށް، ވަގުތުން ވަގުތަށް އެ ބޭފުޅުންގެ ހުރި، ބޭނުންތައް ދެނެގަތުމުގެ މަސައްކަތްތައް ކުރި،" ފިކުރީ ވިދާޅުވިއެވެ.
އެ އެސަސްމަންޓުތަކުގެ ނަތީޖާއިން އެންގުނު ގޮތުގައި އޭގެ ތެރެއިން 12 ވަރަކަށް ގޭގެ މީހުންނަށް ކެއިން ބުއިމާއި ވަގުތީ ހިޔާ ފޯރުކޯށްދޭން ޖެހޭކަން އެނގުނު ކަމަށް އޭނާ ވިދާޅުވިއެވެ.
މާލޭގައި ފެންބޮޑުވުމުގެ މައުލޫމާތު ދިނުމަށް އެންޑީއެމްއޭއިން މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން -- ސަން ފޮޓޯ: އިންފިނިޓް މޯމެންޓްސް/ އަޙްމަދު އަމަން ލަތީފް
އެހެންވެ، 11 ގެޔަކަށް ކެއިން ބުއިމަށް ބޭނުންވާ ސާމާނު ފޯރުކޮށްދީ އޭގެ ތެރެއިން އަށް ގެޔެއްގެ މީހުންނަށް ވަގުތީ ހިޔާ ފޯރުކޮށްދިނީ ކަމަށްވެސް އޭނާ ވިދާޅުވިއެވެ.
ފިކުރީ ވިދާޅުވީ ވަގުތީ ހިޔާގެ ގޮތުގައި ނަގާފައި ވަނީ މާލޭގެ ގެސްޓް ހައުސްތަކެއް ކަމަށެވެ. އެ ތަންތަން ނަގާފައި ވަނީ ތިން ދުވަހަށް ކަމަށާއި އެ މުއްދަތުގައި އެ މީހުން އެ ތަންތަނުގައި ތިބޭނީ ސަރުކާރުގެ ޚަރަދުގައި ކަންވެސް އޭނާވަނީ ފާހަގަކުރެއްވިއެވެ.
އެ ތިން ދުވަހުގެ މުއްދަތުގެ ތެރޭގައި ގެތައް ސާފުކޮށް، ބަދަލުވާން ޖެހޭނެ ކަމަށް ވެސް އޭނާ ވިދާޅުވިއެވެ.
މީގެ އިތުރުން، ނަޖިސް ފެން ޖެހިގެން ގެއްލުން ވެފައި ހުރި އެނދު ފަދަ މުދާ ގަނެވޭނެ ހާލަތެއްގައި ނެތްނަމަ އެ އާއިލާތަކަށް ގޮދަޑި ފޯރުކޮށްދޭނެކަން ވެސް ފިކުރީ ވިދާޅުވިއެވެ. އެހެންނަމަވެސް އެންޑީއެމްއޭގެ އެސަސްމަންޓުން ދެން އިތުރަށް ދޭ ފައިސާއަކުން އެ ގޮދަޑީގެ އަގު އުނި ކުރާނެ ކަމަށްވެސް އޭނާ ވިދާޅުވިއެވެ.
މިދިޔަ ހަފުތާއިން ފެށިގެން މުޅި ރާއްޖެއަށް ވެސް އިރުވައި މޫސުމުގެ ވިއްސާރަކުރަމުން އަންނައިރު، ކަނޑުތައް ވެސް ގަދައެވެ.
މި އަހަރު މޫސުން ރަނގަޅުނުވެ، ދިގުލައިގެން ގޮސްފައިވަނީ މި ސަރަހައްދުގެ އަރަބިކަނޑުގައި އުފެދިފައިވާ ކޮޅިގަނޑުތަކެއްގެ ސަބަބުން ކަމަށް މީގެ ކުރިން މެޓު އޮފީހުން ވަނީ ބުނެފައެވެ.