28 Dec 2023, 00:05
ރައްޔިތުންގެ މަޖިލީހުގައި އިދިކޮޅު އެމްޑީޕީ ތަމްސީލުކުރާ މެންބަރުންތަކެއް ވެރިކަން ކުރާ މައި ޕާޓީ ޕީއެންސީއަށް ސޮއިކުރަން ނިންމާފައި ވަނިކޮށް، މިރޭ އެ ޕާޓީގެ ޕާލިމެންޓްރީ ގްރޫޕު (ޕީޖީ)ގެ ބައްދަލުވުމެއް ބާއްވައިފިއެވެ.
އެމްޑީޕީ ޕީޖީގެ ބައްދަލުވުމުގައި ރައްޔިތުންގެ މަޖިލީހުގެ ރައީސް މުޙައްމަދު އަސްލަމާއި މަޖިލީހުގެ ނައިބު ރައީސް އަހުމަދު ސަލީމް ވެސް ބައިވެރިވެވަޑައިގަތެވެ.
އެ ބައްދަލުވުމާ ގުޅޭގޮތުން 'ސަން'އާ ވާހަކަދައްކަވަމުން ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމް ވިދާޅުވީ އެ ބައްދަލުވުމުގައި މައިގަނޑު ގޮތެއްގައި ކުރިއަށް ދިޔައީ މަޖިލީހުގައި މިވަގުތު ހިނގާ ކަންތައްތަކުގެ މަޝްވަރާތައް ކަމަށެވެ.
އަދި ސަރުކާރު ޒިންމާދާރުކުރުވުމާ ގުޅޭ ގޮތުން ވެސް މަޝްވަރާތައް ކުރިއަށް ދިޔަ ކަމަށް މީކާއިލް ވިދާޅުވިއެވެ.
އެ ބައްދަލުވުމުގެ ފޮޓޯއެއް މަކުނުދޫ ދާއިރާގެ މެންބަރު މުޙައްމަދު ރާއީ އެކްސްގައި ހިއްސާކުރައްވާފައިވާއިރު އޭނާއާއި މީކާއިލާއި އަސްލަމާއި ސައްލެގެ އިތުރުން ހަނިމާދޫ ދާއިރާގެ މެންބަރު އަބްދުލްޣަފޫރު މޫސާއާއި ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސައިން)އާއި މަނަދޫ ދާއިރާގެ މެންބަރު އަހުމަދު ހާރޫން ހުންނެވިއެވެ.
ނަމަވެސް، ސްކޫލް ޗުއްޓީއާ ދިމާކޮށް ބައެއް މެންބަރުން މާލޭގައި ނެތް މި ދަނޑިވަޅުގައި ޕީޖީގެ ގިނަ މެންބަރުންނެއް ނެތެވެ.
އެމްޑީޕީ ތަމްސީލުކުރައްވާ 56 މެންބަރުން މިހާރު މަޖިލީހުގައި ތިއްބަވައެވެ.
އެމްޑީޕީގެ ޕީޖީން އެ ބައްދަލުވުން ބާއްވާފައިވާއިރު އެ ޕާޓީގެ "ހަޔެއްކަ" މަޖިލިސް މެންބަރުން ޕީއެންސީއަށް ސޮއިކުރަން ނިންމާފައިވާ ކަމަށް ޕީޖީގެ އިސް މެންބަރަކު މިރޭ 'ސަން'އަށް ވިދާޅުވިއެވެ. އަދި އެ މެންބަރުން ޕީއެންސީއަށް ސޮއިކުރަނީ މާދަމާ ޕީޕީއެމް، ޕީއެންސީން ބާއްވާ ޖަލްސާއެއްގައި ކަމަށް ވެސް ވިދާޅުވިއެވެ.
ނަމަވެސް އެއީ ކޮން މެންބަރުންނެއް ކަމެއް މިހާތަނަށް ކަށަވަރުވެފައިނުވެއެވެ.
"ސަން"އަށް އެނގިފައިވާ ގޮތުގައި އެމްޑީޕީގެ މެންބަރުން ސަރުކާރު ހިންގާ ޕާޓީއަށް ބަދަލު ވަނީ އެކި ސަބަބުތަކާ ހެދިއެވެ. އޭގެ ތެރޭގައި އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިޚާބުގައި އެ ޕާޓީން ވާދަކުރާނެ ބައެއް ދާއިރާތަކަށް ޕްރައިމަރީއަކާ ނުލައި ޓިކެޓް ދިނުން ހިމެނެއެވެ. އަދި އެ އިންތިޚާބުގައި ޕާޓީގެ ފަރާތުން މެންބަރުންނަށް ޚަރަދު ނުކުރާނެ ކަމަށް އެމްޑީޕީން އަންގާފައިވާ ކަމަށާއި އެކަމާ ވެސް ބައެއް މެންބަރުން ނުރުހުން ވެފައިވާ ކަމަށް މައުލޫމާތު ލިބިފައިވެއެވެ.
މީގެ އިތުރުން، ބައެއް މެންބަރުން ޕީއެންސީއަށް ބަދަލުވަނީ ސަރުކާރުގެ ވަޒީފާ ކަށަވަރު ކުރުމަށް ކަމަށް ވެސް އެ ޕާޓީގެ މަޖިލިސް މެންބަރަކު "ސަން"އަށް ވިދާޅުވިއެވެ.