25 Dec 2023, 23:05
އަންނަ ސީޒަނުގައި ބާސެލޯނާ އިން ޕޯޗުގަލް ޑިފެންޑަރު ޖޮއާއޯ ކަންސެލޯ ބޭނުންވާނަމަ، 30 މިލިއަން ޔޫރޯ (33 މިލިއަން ޑޮލަރު)އަށް ވިއްކައިލުމަށް މެންޗެސްޓާ ސިޓީން ނިންމާފައިވާކަމަށް ރިޕޯޓުކޮށްފިއެވެ.
މި ސީޒަނުގައި ލޯނުގެ ދަށުން ސިޓީން ބާސާއާ ކަންސެލޯ ގުޅުނީ ލޯނު އެއްބަސްވުމެއްގެ ދަށުންނެވެ.
ބާސާއަށް ގުޅުމަށްފަހު، ކަންސެލޯ ރަނގަޅު ކުޅުމެއް ދައްކަމުންދާއިރު، މިހާރު އޭނާ ހިމެނިފައިވަނީ ކޯޗު ޒަވީގެ މުހިންމު ކުޅުންތެރިއެއްގެ ގޮތުގައެވެ.
ރިޕޯޓުތައް ބުނާ ގޮތުގައި ސްޕެއިންގެ ޗެމްޕިއަން ބާސާއިން ދާއިމީ ކޮންޓްރެކްޓެއްގެ ދަށުން ކަންސެލޯ ބޭނުންވާއިރު، އޭނާއަށް 30 މިލިއަން ޔޫރޯ ދެއްކުމަށް ސިޓީން ވަނީ ބާސާއަށް އަންގައިފައެވެ.
ނަމަވެސް މާލީ ހާލަތާ ގުޅިގެން ދާއިމީ ކޮންޓްރެކްޓެއް ހުށަހެޅުމަށް ބާސާއަށް އުނދަގޫތަކެއް ކުރިމަތިވާނެކަމަށް ރިޕޯޓުތައް ބުނެއެވެ.
ކަންސެލޯގެ އިތުރުން ޕޯޗުގަލް ފޯވަޑް ޖޮއާއޯ ފީލިކްސްއަށް ވެސް ދާއިމީ ކޮންޓްރެކްޓެއް ހުށަހަޅަން ބާސާއިން ބޭނުންވެއެވެ. ނަމަވެސް މާލީ ހާލަތާ ގުޅިގެން އެ ކްލަބުން މިހާރު އެތުލެޓިކޯ މެޑްރިޑާއެކު މަސައްކަތްކުރަމުންދަނީ މި ސީޒަނުގެ ނިޔަލަށް ލޯނު އެއްބަސްވުން އާކުރުމަށެވެ.
ބާސާގެ ރައީސް ޖޮއާން ލަޕޯޓާ ވެސް ދާދިފަހުން ބުނެފައިވާ ގޮތުގައި، ކަންސެލޯއާއި ފީލިކްސްއަށް ދާއިމީ ކޮންޓްރެކްޓެއް ހުށަހެޅޭނެ ގޮތެއް ހޯދުމަށް ލަލީގާއާއެކު ވަނީ މަޝްވަރާތަކެއް ފަށައިފައެވެ.