13 Dec 2023, 19:41
މި އަހަރުގެ މެދަކާ ހިސާބުން ރާއްޖެއިން ހިމަބިހި ފެނުމާ ގުޅިގެން އިތުރަށް ބަލި ފެތުރުނަ ނުދިނުމަށް ޓަކައި މީސްލްސް ވެކްސިން ދިނުމުގެ ގައުމީ ކެމްޕެއިނެއް ފެށުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) ނިންމައިފިއެވެ.
އެޗްޕީއޭ އިން މިއަދު ކުރި އިއުލާނެއްގައި ބުނީ މާދަމާ ފަށާ އެ ކެންޕޭންގައި ވެކްސިން ދިނުމަށް ހަމަޖެހިފައިވަނީ ދިވެހިންގެ ތެރެއިން ދެ ޑޯޒު ފުރިހަމަނުކޮށް ތިބި 18 މަހާއި 49 އަހާރާއި ދެމެދުގެ މީހުންނަށް ކަމަށެވެ.
އަދި ބިދޭސީންގެ ތެރެއިން ވެސް ދެ ޑޯޒު ހަމަނުވާ ފަރާތްތަކަށް މި ކެމްޕެއިންގެ ތެރެއިން ވެކްސިން ދިނުމަށް ހަމަޖެހިފައިވާ ކަމަށް އެޗްޕީއޭއިން ބުންޏެވެ.
މި ކެމްޕޭންގައި މާލޭގެ ވެކްސިން ސެންޓަރުގެ އިތުރުން އަތޮޅުތެރޭގެ ހޮސްޕިޓަލްތަކުގައި ވެސް ވެކްސިން ދޭނެކަމަށް އެޗްޕީއޭއިން ބުނެއެވެ.
މި މަހު އެކެއްގައި ހދ. ކުޅުދުއްފުށީގައި ވެސް ވަނީ ހިމަބިހިން ރައްކާތެރިވުމުގެ ކެމްޕެއިނެއް ފަށައިފައެވެ.
އެޗްޕީއޭއިން މީގެކުރިން ބުނެފައިވަނީ މި މަހުގެ އެއްވަނަ ދުވަހުފެށި ކެމްޕެއިނާއެކު ކުރިއަށް އޮތް ދެ ހަފުތާ ތެރޭގައި ރާއްޖޭގެ އެކި ހިސާބުތަކުގައި ވެކްސިން ޖެހުމުގެ މަސައްކަތް ފެށޭނެ ކަމަށެވެ.
މީގެކުރިން 2020ވަނަ އަހަރު ހިމަބިހީގެ ކޭސްތަކެއް ފެނި މުޅި ރާއްޖެއަށް ހުޅުވާލައިގެން އެމްއާރު ކެމްޕޭން ފެށިއެވެ. އެހެންނަމަވެސް ކޮވިޑުގެ ބަލިމަޑުކަމާއެކު އެ ކެމްޕެއިން ހުއްޓައިލަން ޖެހުނީއެވެ.
މިދިޔަ ސެޕްޓެމްބަރު މަހާއި އޮގަސްޓު މަހު ވެސް ހިމަބިހީގެ ކޭހެއް ފެނިފައިވެއެވެ.
ރާއްޖޭގައި އެމްއާރު ވެކްސިން ތައާރަފްކޮށްފައިވަނީ 1983 ވަނަ އަހަރެވެ. އެއަށްފަހު 2017ވަނަ އަހަރު ދިވެހިރާއްޖެއަކީ ހިމަބިހި ނައްތައިލެވިފައިވާ ގައުމެއްގެ ގޮތުގައި ދުނިޔޭގެ ސިއްހަތު ޖަމިއްޔާއިން ކަނޑައެޅިއެވެ.