13 Dec 2023, 15:56
ޢިސްރާއީލު ސިފައިން ޣައްޒާގެ އުތުރުގައި އޮންނަ ކަމާލް ޢަދުވާން ހޮސްޕިޓަލަށް ވަދެގަނެއްޖެއެވެ.
ހޮސްޕިޓަލަށް ވަދެގަނެފައިވަނީ އެ ހޮސްޕިޓަލް ވަށައިގެން ބޮމުގެ ޙަމަލާތައް ދޭތާ އެތައް ދުވަހަކަށްފަހު ކަމަށް ފަލަސްޠީނުގެ ސިއްޙީ ވުޒާރާއިން ބުނެއެވެ.
ފަލަސްޠީނުގެ ސިއްޙީ ވުޒާރާގެ ތަރުޖަމާނު އަޝްރަފް އަލް ޤުދްރާ ވިދާޅުވީ ޢިސްރާއީލު ސިފައިން އަންގާރަ ދުވަހު ވަނީ ބެއިޠް ލަހިއްޔާގެ ހޮސްޕިޓަލުގެ ގޯތިތެރޭގައި ފިރިހެނުންނާއި އަންހެނުން އަދި ސިއްޙީ ފަރުވާދޭ ބައެއް މުވައްޒަފުންވެސް ހިމެނޭހެން އެންމެ ވަށާޖަހައި ބައިތިއްބާފައެވެ. އަދި އެ މީހުން ހައްޔަރުކޮށްގެން ގެންގޮސްދާނެ ކަމަށް ބިރު ގަންނަ ކަމަށްވެސް އަޝްރަފް ވިދާޅުވިއެވެ.
"އަޅުގަނޑުމެން ގޮވާލަން، އދ، ދުނިޔޭގެ ސިއްޙަތު ޖަމިއްޔާ އަދި ރެޑްކްރޮސްގެ ބައިނަލްއަޤުވާމީ ކޮމިޓީއަށް ހޮސްޕިޓަލުގައި ތިބި މީހުންގެ ފުރާނަ ސަލާމަތް ކުރުމަށް އަވަސް ފިޔަވަޅުތަކެއް އެޅުމަށް." އަޝްރަފް ވިދާޅުވިއެވެ.
ކަމާލް ޢުދުވާން ހޮސްޕިޓަލް ތެރޭގައި ހޮސްޕިޓަލްގެ މުވައްޒަފުންނާއި ބަލި މީހުންގެ އިތުރުން ގެދޮރު ގެއްލިފައިވާ ގިނަ ބަޔަކުވެސް އެބަ ތިއްބެވެ.
ހޮސްޕިޓަލަށް ޢިސްރާއީލު ސިފައިން ވަދެ، 15 އަހަރުން ދަށުގެ ކުދިން އަތް މައްޗަށް ނަގައިގެން ހޮސްޕިޓަލުން ބޭރަށް ނުކުންނަން އަޑުގަދަކުރާއިން އަންނަނީ ގޮވަމުންނެވެ.
ޣައްޒާގެ އުތުރު ސަރަޙައްދުގައި ޚިދުމަތް ދިނުން ނުހުއްޓި ހުރި ހަމައެކަނި ހޮސްޕިޓަލަކީ ކަމާލް ޢަދުވާން ހޮސްޕިޓަލެވެ. ފާއިތުވި ދުވަސްތަކުގައި ބޮން ގޮއްވުމާއި ވައިގެ ޙަމަލާތަކުގެ ސަބަބުން ހޮސްޕިޓަލްގެ ބޮޑު ބައެއް ހަލާކުވެ، އެތަނަށް ދާން އޮންނަ މަގުތައްވެސް ވަނީ ހަލާކުވެފައެވެ.
ޔަހޫދީ އިސްރާއީލުގެ ފައުޖުތަކުން ޣައްޒާއަށް ދެމުން އަންނަ ލާއިންސާނީ ޙަމަލާތަކުގައި މިހާތަނަށް 18000 ށް ވުރެ ގިނަ މީހުން ވަނީ ޝަހީދުކޮށްލައިފައެވެ.