06 Dec 2023, 15:50
ނުހިއްކާ އޮތް ފަޅަކުން ގޯތި ދިނީ އެ ތަންތަން ހިއްކުމުގެ މަސައްކަތް ވަރަށް އަވަހަށް ނިމޭނެކަމުގެ ޔަގީންކަން އޮތުމުންކަމަށް ކުރީ ސަރުކާރުގައި ގެދޮރުވެރިން ކޮމިޓީގައި އިސްކޮށް އުޅުއްވި ކުރީގެ ސްޓޭޓް މިނިސްޓަރު އަކްރަމް ކަމާލުއްދީން މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ޕެޓިޝަން ކޮމިޓީގައި ގެދޮރުވެރިންގެ ފްލެޓް މައްސަލައިގައި ކުރީ ސަރުކާރުން މަސައްކަަތް ކުރި ގޮތް އޮޅުންފިލުވަދޭން މިއަދު އަކްރަމް ވަނީ ކޮމިޓީއަށް ހާޒިރުވެލައްވައިފައެވެ.
ކޮމިޓީގައި ދެކެވުނު ވާހަކަތަކުގެ ތެރެއިން އުނގޫފާރު ދާއިރާގެ މެމްބަރު މުޙައްމަދު ވަހީދު (ވައްޑެ)ވަނީ ބިނާވެށީގެ ނަމުގައި އޮތް ޕްލޭނަކާއެކު ކަމަށް ބުނެ ރަށްރަށުގައި ހިއްކައިފައި އޮތް ބިމަކުން ނުދެވި ހުރި ގޯތި، ނުހިއްކާ އޮތް ބިމަކުން ދޫކުރި އުސޫލު ހާމަކޮށްދެއްވަން އެދިވަޑައިގެންފައެވެ.
އެ ސުވާލަށް ޖަވާބު ދެއްވަމުން އަކްރަމް ވިދާޅުވީ، އެއިރު ސަރުކާރުގެ މަގްސަދަކީ ކޮންމެހެން ބިމެއް ދިން ކަމުގެ ރަޖިސްޓްރީ ދިނުން ނޫން ކަމަށެވެ.
"އަޅުގަނޑުމެންގެ މަގްސަދަކަށްވީ އެ ދިނުމޭ ހަމަ. އެހެންވީމާ މި ދެންނެވީ އެ ހިއްކެމުން ދަނީއޭ. ނިމެމުންނޭ އެ ދަނީ،" އަކްރަމް ވިދާޅުވިއެވެ.
އޭނާ ވިދާޅުވީ ބިނާވެށި ޕްލޭންގެ ދަށުން ގޯތި ނުދެވުނީ އެ ޕްލޭންގެ އުސޫލުތަކުގެ ބައެއް ކަންކަމުގައި ހުރި ދަތިތަކެއްގެ ސަބަބުން ކަމަށެވެ.
އޭނާ ވިދާޅުވީ މި ވަގުތު ގުޅީފަޅު އޮންނާނީ އާބަންކޯގެ އިހްތިޞާސްގެ ތެރޭގައި ކަމަށެވެ. ގިރާވަރުފަޅު އޮންނާނީ އެ ތަން ތަރައްގީކުރާ ފަންޑް ކޯޕަރޭޝަންގެ އިހްތިޞާސްގެ ތެރޭގައި ކަމަށެވެ.
އެއާއެކު އޭނާ ވިދާޅުވީ، އެ މަސައްކަތުގައި އެއްވެސް ގޯހެއް ހަދައިފައި ނުވާ ކަމަށެވެ. ހަމައެއާއެކު އަވަސް އަރުވައިލުމުގެ އެއްވެސް ނިޔަތެއް ވެސް ނެތް ކަމަށެވެ.
"ތެޅިފޮޅިގަނެގެންނެއް ނޫން މި ކަން ކުރީ އިނގޭތޯ،" ފްލެޓަށް އެދިފައި ތިބި ހުރިހާ ރައްޔިތުންނަށް ފްލެޓް ލިބޭނެކަން ހާމަކުރައްވައި އަކްރަމް ވިދާޅުވިއެވެ.
އަދި ފުރަތަމަ 4،000 މީހުން ކަނޑައެޅީ ނިމެމުން އަންނަނީ ފުރަތަމަ 4،000 ފްލެޓްކަމަށްވުމުން ކަމަށް ވިދާޅުވިއެވެ. އަދި އެ ފްލެޓްތައް ދިނުމުގައި އިސްކަންދިނީ އެންމެ މަތިން ޕޮއިންޓް ލިބުނު މީހުންނަށް ގުރުއަތު ތަރުތީބުން ލިބޭ މީހުންނަށް ކަމަށް އަކްރަމް ވިދާޅުވިއެވެ.
މީގެ އިތުރުން އަކްރަމް ވިދާޅުވީ މައްސަލަ ޖެހޭ ހިސާބަކީ އޭސީސީން އެ މަސައްކަތް ހުއްޓަން އެނގުން ކަމަށެވެ. ނަމަވެސް އެއީ އޭނާ ގަބޫލުކުރައްވާ ގޮތުގައި އޭސީީސީއަށް މަސައްކަތް ހުއްޓަން ނޭންގޭނެ ކަމަށާއި، އޭސީސީއަށް އޮންނާނީ ލަފާ ދިނުމުގެ ފުރުސަތުކަމަށް އަކްރަމް ވިދާޅުވިއެވެ.