23 Nov 2023, 21:21
ޕީޕީއެމްގެ ރައީސް، އަބްދުﷲ ޔާމީން އަބްދުލްގައްޔޫމު ރޭ އެކުލަަވައިލެއްވި ސްޓިއަރިން ކޮމިޓީގައި އިސްކޮށް ހުންނަވާ، ކުރީގެ ސައިންސް މިނިސްޓަރު މަލީހް ޖަމާލް، ޕީޕީއެމުން ވަކިކޮށްފިއެވެ.
މަލީހު ވަކިކުރަން ނިންމީ އެ ޕާޓީގެ ސުލޫކީ ކޮމިޓީންނެވެ. މަލީހު ޕީޕީއެމުން ވަކިކުރިކަން އެންގި އެންގުމުގައި ސޮއިކުރައްވައިފައިވަނީ ޕީޕީއެމްގެ ދެ ނައިބު ރައީސުންކަމަށްވާ މިނިސްޓަރު އަހްމަދު ޝިޔާމާއި، މިނިސްޓަރު ޣައްސާން މައުމޫނެވެ.
އޭނާ ޕާޓީން ވަކިކުރަން ނިންމައި އެ ކަން އެންގި ލިޔުމުގައިވަނީ މަލީހު ޕީޕީއެމްގެ ނަން ބަދުނާމުކުރުމުގެ މަސައްކަތްކުރާކަމަށް ބުނެފައެވެ.
އަދި ޕާޓީ ބައިބައިކުރުމުގެ މަސައްކަތް މަލީހު ކުރައްވަމުން އަންނަކަމަށް ޕާޓީގެ ލީޑާޝިޕަށް ފާހަގަކުރެވިފައިވާކަމަށް ވެސް އެ ލިޔުމުގައިވެއެވެ.
އޭނާ ޕާޓީން ވަކިކުރުމާއެކު ނުރުހުން ފާޅުކުރައްވައި އެކްސްގައި ކުރެއްވި ޕޯސްޓެއްގައިވަނީ 'މި ދަނީ ގަދަ ހިފުމަކަށް'ކަމަށް ވިދާޅުވެ ބަހުގެ ހަމަލަތަކެއް ރައްދުކުރައްވައިފައެވެ.
"މި ދަނީ ގަދަ ހިފުމަކަށް. ފުރާޅުން ޓިނު ނަގައި، ކޮންކްރީޓް ސްލެބަކަށް ބަދަލުކޮށްފައި މި ކަން ނިންމާނީ. ކަނެއްގައި އަތް ދަށުވިޔަސް ބާ ޓިނު ގަނޑެއްގެ އަތް ދަށުނުވާތި،" މަލީހުގެ ޕޯސްޓުގައިވެއެވެ.
ޕީޕީއެމްގެ ސުލޫކީ ކޮމިޓީން އިއްޔެ މަލީހު ސަސްޕެންޑުކުރީ ޕީޕީއެމްގެ ރައީސް އަބްދުﷲ ޔާމީން ވިދާޅުވެގެންކަމަށް ބުނެ އޭނާ ހިމެނިވަޑައިގަންނަވާހެން 13 މެމްބަރުންގެ ކޮމިޓީއަކާ ޕީޕީއެމް ހިންގުން ހަވާލުކުރީކަމަށް ބުނެ މަސައްކަތް ކުރައްވަން ފެއްޓެވުމުންނެވެ.
މިދިޔަ އަންގާރަ ދުވަހުގެ ރޭ އެ ކޮމިޓީގެ މެމްބަރުން ކުއްލި ނޫސްވެރިންގެ ބައްދަލުވުމެއް ވެސް ބާއްވައިފައިވެއެވެ.
އެ ކޮމިޓީންވަނީ މީޑިއާތައް ހިމަނައިގެން ވަކިން ގްރޫޕެއް ވެސް ހަަދައިފައެވެ.
ނަމަވެސް މިރޭ މަލީހު ވަކިކުރިކަން އެންގި ލިޔުމުގައިވަނީ އެ ހުރިހާ ކަމެއްކޮށްފައިވަނީ ޕާޓީގެ ލީޑާޝިޕަށް އެންގުމެއް ނެތިކަމަށެވެ.