22 Nov 2023, 15:24
ޕީޕީއެމުން ސަސްޕެންޑް ކުރި ނަމަވެސް ޕާޓީގެ މަސައްކަތްތަކާ ދުރު ނުވާނެ ކަމަށާއި މަސައްކަތް ކުރަމުން ގެންދަނީ ސީދާ ކުރީގެ ރައީސް އަބްދުﷲ ޔާމީންގެ އޯޑަރަށް ކަމަށް، މުޙައްމަދު މަލީހް ޖަމާލް މިއަދު ވިދާޅުވެއްޖެއެވެ.
މަލީހް އިސްވެ ހުންނަވައި ރޭ ވަނީ ޕީޕީއެމްގެ ނަމުގައި ކުއްލި ގޮތަކަށް ނޫސްވެރިންގެ ބައްދަލުވުމެއް ބާއްވަވާފައެވެ. އެ ބައްދަލުވުމުގައި މަލީހް އިއުލާން ކުރެއްވީ ޕާޓީގެ ކަންކަން ބެލެހެއްޓުމަށް 13 މެންބަރުންގެ ކޮމިޓީއެއް ޔާމީން އުފައްދަވާފައިވާ ކަމަށެވެ.
މިއާ އެކު ޔާމީނާއި ރައީސް ޑރ. މުޙައްމަދު މުއިއްޒާ ދެމެދު ސިޔާސީ ގޮތުން ހިޔާލު ތަފާތުވުންތަކެއް އުޅޭ ކަމަށް ދެކެވޭ ވާހަކައަށް ހެކި ލިބިގެން ދިޔައެވެ.
ޕީޕީއެމްގެ ދެ ނައިބު ރައީސުން ކަމަށްވާ މިހާރުގެ ސަރުކާރުގެ ޑިފެންސް މިނިސްޓަރު ޣައްސާން މައުމޫނާއި ފިޝަރީޒް މިނިސްޓަރު އަޙްމަދު ޝިޔާމް ސޮއިކޮށް މަލީހަށް މިއަދު ފޮނުއްވި ސިޓީގައި ވިދާޅުވެފައިވަނީ މަލީހް ޕީޕީއެމް ބައިބައި ކުރުމަށް މަސައްކަތް ކުރާ ކަމަށެވެ. އެހެންވެ، މިއަދުން ފެށިގެން ޕާޓީގެ ހަރަކާތްތަކުގައި ބައިވެރިނުވެވޭ ގޮތަށް މަލީހް ސަސްޕެންޑްކޮށް އޭނާގެ މައްސަލަ ސުލޫކީ ކޮމެޓީއަށް ފޮނުވި ކަމަށް ސިޓީގައި ވިދާޅުވެފައިވެއެވެ.
އެކަމާ ގުޅޭގޮތުން "ސަން"އިން ސުވާލު ކުރެއްވުމުން މަލީހް ވިދާޅުވީ ދެ ވަޒީރަކު ސޮއި ކުރައްވައި އޭނާއާ މެދު ފިޔަވަޅު އަޅުއްވާފައިވަނީ އެ ދެ ވަޒީރުންގެ ވަޒީފާގެ ދިފާއުގައި ކަމަށެވެ. އަދި، އެއީ ޕާޓީގެ އަސާސީ ގަވާއިދުގެ ދަށުން އެޅުއްވޭނެ ފިޔަވަޅެއް ނޫން ކަމަށް މަލީހް ވިދާޅުވިއެވެ.
"މިއީ ރައީސް ޔާމީންގެ ސީދާ ލަފާފުޅުގެ މަތިން އަޅުގަނޑުމެން ކުރަމުންދާ ކަމެއްގައި ދެކޮޅު ނުބަލައި އަދި ޕްރެސް ކޮންފަރެންސް ވެސް ނުބަލައި ޕީޕީއެމްގެ ދެ ޑެޕިއުޓީ ލީޑަރަކަށް ނުކުރެއްވޭނެ ކަމެއް އެ ކުރެއްވީ. ރައީސް ޔާމީނާއި ޕީޕީއެމްގެ ދިފާއުގައި މި ކުރާ މަސައްކަތުގައި އެއްވެސް ގޮތަކަށް ފަހަތަށް ޖެހުމެއް ނޯންނާނެ،" މަލީހް ވިދާޅުވިއެވެ.
"އެހެން ފޮނުވާ ސިޓީއަކަށް އަޅުގަނޑުމެން ބޯތިރިއެއް ނުކުރާނަން... އަޅުގަނޑު މަސައްކަތް ކުރަނީ ސީދާ ރައީސް ޔާމީންގެ ލަފާގެ މަތިން،"
މަލީހް ވިދާޅުވީ ރޭގެ ނޫސްވެރިންގެ ބައްދަލުވުމުގައި އެއްވެސް ގޯސް ވާހަކައެއް ނުދައްކަވާ ކަމަށެވެ. ޔާމީން ކޮމިޓީއެއް ނަންގަވަން ޖެހުނީ ޕާޓީގެ ގިނަ އާއްމު މެންބަރުންތަކެއް ޔާމީނަށް މެސެޖު ފޮނުވައި ހަދަމުންދާތީ އެ ހުރިހާ މެސެޖްތަކަށް ރިޕްލައި ދެއްވުމަކީ އެ މަނިކުފާނަށް ފަސޭހަ ކަމަކަށް ނުވާތީ ކަމަށް މަލީހް ވިދާޅުވިއެވެ.
މަލީހް ވިދާޅުވީ ޕީޕީއެމްގެ އެއްވެސް މެންބަރަކު ޕީއެންސީއަށް ނުވައްދާނެ ކަމަށް ރައީސް މުއިއްޒާއި ރައީސްގެ ހާއްސަ އެޑްވައިޒަރު އަބްދުއްރަހީމް އަބްދުﷲ ވިދާޅުވި ނަމަވެސް އަމަލު ކުރައްވަމުން ގެންދަވަނީ އެ އުސޫލުން ނޫން ކަމަށެވެ. އެގޮތުން ލ. ފޮނަދޫ ކައުންސިލްގައި ތިބި ޕީޕީއެމްގެ ހުރިހާ މެންބަރުން ޕީއެންސީއަށް މި ފަހުން ވައްދާފައިވާކަން މަލީހް ފާހަގަ ކުރެއްވިއެވެ. އަދި، ފެށިނީއްސުރެ ޕީޕީއެމް އޮފީހުގައި ހިންގަމުން ދިޔަ ޕީއެންސީގެ ވަކި އޮފީހެއް ހުޅުވުމަކީ ވެސް ކަންބޮޑުވުމެއް ކަމަށް އޭނާ ވިދާޅުވިއެވެ.
"މި ވަގުތަކީ އެއްވެސް ގޮތެއްގައި ދެ ޕާޓީގެ ދެމެދުގައި ހިލާފުތަކެއް އުފެދެން ޖެހޭ ވަގުތެއް ނޫން. މިއީ އެއްބައެއްގެ ގޮތުގައި ރީއްޗަށް ކުރިއަށް ދާންވީ ވަގުތު،" މަލީހް ވިދާޅުވިއެވެ.