19 Nov 2023, 16:44
ޔޫރޯ 2024 ކޮލިފައިން ގްރޫޕް ބީގައި ފަރަންސޭސިވިލާތާއި ޖިބްރޯލްޓާ ބައްދަލުކުރި މެޗް ފަރަންސޭސިވިލާތުން ވަރަށް ފަސޭހަ ކަމާއެކު ކާމިޔާބުކޮށްފިއެވެ.
ފަރަންސޭސިވިލާތުގައި ކުޅުނު މި މެޗް އެ ޓީމް ކާމިޔާބުކުރީ 14 ލަނޑު ސުން ލަނޑުންނެވެ. މިއީ ފަރަންސޭސިވިލާތުގެ ތާރީހްގައި މިހާތަނަށް ހޯދުނު އެންމެ ބޮޑު ކާމިޔާބީއެވެ.
މިއަންނަ އަހަރު ޖަރުމަނުވިލާތުގައި ބޭއްވުމަށް ހަމަޖެހިފައިވާ ޔޫރޯ މުބާރާތުން ފަރަންސޭސީންނަށް ޖާގަ ކަށަވަރު ވެފައިވީނަމަވެސް އެޓީމުން މިމެޗްގައި ވެސް ނެރެފައިވަނީ ވަރުގަދަ ޓީމެކެވެ. ނަތީޖާ އަކަށް ވެގެންދިޔައީ މެޗްގެ ތިން ވަނަ މިނެޓްގައި މެޗްގެ ފުރަތަމަ ލަނޑު ފެނިގެންދިއުމެވެ. ނަމަވެސް މި ލަނޑަކީ ފަރަންސޭސީން އުފެއްދި ހަމަލާއެއްގައި ޖިބްރޯލްޓާގެ އީތަން ސަންޓޯސް އަތުން ބައިކޮޅަށް ވަން ލަނޑެކެވެ. އަދި އޭގެ އެއް މިނެޓްފަހުން މާކަސް ތުރާމް ވަނީ ފަރަންސޭސީންގެ ލީޑު ފުޅާކޮށްދީފައެވެ.
މިމެޗްގައި ފަރަންސޭސީންގެ ތިންވަނަ ލަނޑު މެޗްގެ 16 ވަނަ މިނެޓްގައި ޖަހައިދިނީ ޒުވާން ކުޅުންތެރިޔާ ވޯރެން ޒައާ އެމެރީއެވެ. މި މެޗްގައި ކުޅުމާއެކު ޒައާ އެމެރި ވެގެން ގޮސްފައިވަނީ 1914 ވަނަ އަހަރަށް ފަހު ފަރަންސޭސި ޤައުމީ ޓީމަށް ކުޅުނު އެންމެ ޒުވާން ކުޅުންތެރިޔާ އަަށެވެ. އޭނާގެ އުމުރަކީ 17 އަހަރާއި 8 މަސް 11 ދުވަހެވެ.
މި މެޗްގައި ޖިބްރޯލްޓާއަށް އިތުރު މައްސަލަ ތަކާ ކުރިމަތިވެގެން ދިޔައީ މެޗްގެ 18 ވަނަ މިނެޓްގައި ސަންޓޯސްއަށް ސީދާ ރަތް ކާޑެއް ދެއްކުމުންނެވެ. މި މެޗްގައި އެ ޓީމްގެ ހަތަރު ވަނަ ލަނޑު މެޗްގެ 30 ވަނަ މިނެޓްގައި ލިބުނު ޕެނަލްޓީއަކުން ކާމިޔާބުކޮށްދިނީ ކެޕްޓަން ކިލިއަން އެމްބާޕޭއެވެ. މީގެ އިތުރުން މި މެޗްގައި އެމްބާޕޭ ވަނީ އިތުރު ދެ ލަނޑު ޖަހައިދީ ހެޓްރިކެއްވެސް ހަދައިފައެވެ.
މި މެޗްގައި މީގެ އިތުރުން ފަރަންސޭސި ޓީމަށް ލަނޑު ޖަހައިދީފައިވަނީ ޖޮނަތަން ކްލައުސް، ޔޫސުފް ފޮފާނާ، އެޑްރިއެން ރެބިއޯ އަދި މޫސާ ޑެންބެލޭ އެއް ލަނޑު އަދި ކިންގްލީ ކޯމަން އާއި އޮލިވާ ޖިރޫއިން ކުރެ ކޮންމެ ކުޅުންތެރިޔަކު ދެލަނޑެވެ.
މިއާއެކު ފަރަންސޭސިވިލާތް މިހާރު ވަނީ ކުޅުނު ހަތް މެޗްވެސް ކާމިޔާބުކޮށް 21 ޕޮއިންޓް ހޯދައިފައެވެ. އަދި ޖިބްރޯލްޓާ އުޅެނީ ޕޮއިންޓެއް ނުލިބި އެންމެ ފުލުގައެވެ.