15 Nov 2023, 10:48
ރެއާލް މެޑްރިޑްގެ މިޑްފީލްޑަރު ޖޫޑް ބެލިންހަމްގެ ކޮނޑަށް ލިބުނު އަނިޔާއާ ގުޅިގެން އިނގިރޭސި ގައުމީ ސްކޮޑުން ވަކިވެއްޖެއެވެ.
ކޮނޑަށް ލިބުނު އަނިޔާއާ ގުޅިގެން ރެއާލުން އެންމެ ފަހުން ކުޅުނު ދެ މެޗުގައި ވެސް ބެލިންހަމް ފެނިފައެއް ނުވެއެވެ. އޭގެ ފަހުން އިނގިރޭސި ގައުމީ ޓީމުގެ މެޑިކަލް ޓީމުން ބެލިންހަމްގެ އަނިޔާގެ ތަފުސީލުތައް ބެލުމަށް ފަހު، ސްޕެއިންގައި ފަރުވާއަށް މަޑުކުރުމަށް ވަނީ އިރުޝާދު ދީފައެވެ.
ބެލިންހަމްގެ އިތުރުން ޗެލްސީގެ ޑިފެންޑަރު ލެވީ ކޮލްވިލްގެ ކޮނޑަށް ލިބުނު އަނިޔާއަކާ ގުޅިގެން އޭނާ ވެސް ވަނީ ސްކޮޑުން ވަކިވެފައެވެ. އޭނާއަށް އަނިޔާވީ އިނގިރޭސި ޕްރިމިއާ ލީގުގައި މެންޗެސްޓާ ސިޓީ އަތުން 4-4ގެ ނަތީޖާއަކުން ޗެލްސީ އެއްވަރުވި މެޗުގައެވެ.
އަނިޔާއާ ގުޅިގެން ބެލިންހަމް އާއި ކޮލްވިލްއަށް އިނގިރޭސިން ޔޫރޯ ކޮލިފައިންގައި ކުޅޭ ފަހު ދެ މެޗު ގެއްލޭނެއެވެ. ޔޫރޯ 2024 މިހާރު ޖާގައެއް ކަށަވަރުކޮށްފައިވާ އިނގިރޭސިން އަންނަ ހުކުރު ދުވަހު މަލްޓާއާ ދެކޮޅަށް ނުކުންނަ އިރު، އަންނަ ހޯމަ ދުވަހު ނުކުންނަން ޖެހޭނީ ނޯތު މެސެޑޯނިއާއާ ދެކޮޅަށެވެ.
އަނިޔާގެ މައްސަލަތަކާ ގުޅިގެން އެ މެޗުތަކަށް އިނގިރޭސިން ނުކުންނަން ޖެހޭނީ އެ ޓީމުގެ އެންމެ ވަރުގަދަ ސްކޮޑާއެކުގައެއް ނޫނެވެ. މީގެ ކުރިން އަނިޔާއާ ގުޅިގެން ނިއުކާސަލް ޔުނައިޓެޑުގެ ފޯވަޑް ކެލަމް ވިލްސަން އާއި ޓޮޓެންހަމް ހޮޓްސްޕާގެ މިޑްފީލްޑަރު ޖޭމްސް މެޑިސަން ވެސް ވަނީ ސްކޮޑުން ވަކިވެފައެވެ. އަނިޔާގެ މައްސަލަތަކާ ގުޅިގެން ސްކޮޑުން ވަކިވި ކުޅުންތެރިންގެ ބަދަލުގައި ސައުތުގޭޓް ވަނީ ސިޓީގެ ރިކޯ ލެވިސް އާއި ޗެލްސީގެ ކޯލް ޕާމާ އަދި އެޒްރީ ކޮންސާއަށް ފުރުސަތު ދީފައެވެ.
އަނިޔާގެ މައްސަލަތަކުގެ އިތުރުން އަމިއްލަ ކަންތައްތަކަކާ ގުޅިގެން ވެސް ދެ ކުޅުންތެރިޔަކު ވަނީ ސްކޮޑުން ވަކިވެފައެވެ. އެއީ މެންޗެސްޓާ ޔުނައިޓެޑުގެ ފޯވަޑް މާކަސް ރަޝްފޯޑާއި މެންޗެސްޓާ ސިޓީގެ މިޑްފީލްޑަރު ކެލްވިން ފިލިޕްސްއެވެ.