12 Nov 2023, 11:24
ލިވަޕޫލްގެ ކޮލަމްބިއާ ފޯވަޑް ލުއިސް ޑިއާޒްގެ ބައްޕަ ރަހީނުކުރި މައްސަލައިގައި ހަތަރު މީހަކު ހައްޔަރުކޮށްފިއެވެ.
ލުއިސް ޑިއާޒްގެ ބައްޕަ ލުއިސް މެނުއަލް ޑިއާޒްއާއެކު މަންމަ ސިލެނިސް މަރުލަންޑާ، ކޮލަމްބިއާގައި ރަހީނުކޮށްފައިވަނީ މީގެ ދެ ހަފުތާ ކުރިންނެވެ. ރަހީނުކުރިތާ ގިނަ އިރުތަކެއް ނުވެ މަރުލަންޑާ ދޫކޮށްލި އިރު، ޑިއާޒް ދޫކޮށްލާފައިވަނީ މިދިޔަ ބުރާސްފަތި ދުވަހުއެވެ.
ލުއިސް ޑިއާޒްގެ ބައްޕަ އާއި މަންމަ ރަހީނުކޮށްފައިވަނީ ކޮލަމްބިއާގެ ޖަމާއަތެއް ކަމަށްވާ ނޭޝަނަލް ލިބަރޭޝަން އާމީ (އީއެލްއެން) އިންނެވެ. އެ ޖަމާއަތުން ޑިއާޒްގެ ބައްޕަ ހަވާލުކޮށްފައިވަނީ އިންސާނީ ހިދުމަތް ފޯރުކޮށްދޭ ކޮމިޝަނަކާއެވެ. އެއަށްފަހު ހެލިކޮޕްޓަރެއްގައި އޭނާގެ އާއިލާ ގާތަށް, ލަ ގުއާޖިރާއަށް ވަނީ ގެންގޮސްފައެވެ.
ކޮލަމްބިއާ ފުލުހުން ބުނީ ރަހީނުކުރި ކަމުގެ ތުހުމަތުގައި މިހާތަނަށް ޖުމުލަ ހަތަރު މީހަކު ހައްޔަރުކޮށްފައިވާ ކަމަށާއި އެމީހުން ހޯދާފައިވަނީ ސީސީޓީވީ ފުޓޭޖުތައް ބަލައިގެން ކަމަށެވެ. އަދި އެމީހުންނަށް ދައުވާ އުފުލުުމަށް ފޮނުވާނެ ކަމަށް ވެސް ބުންޏެވެ.
ޑިއާޒްގެ ބައްޕަ ދޫކޮށްލުމާއެކު ނޫސްވެރިންނާ ވާހަކަދައްކަމުން އޭނާ ބުނީ އުނދަގޫ ދުވަސްތަކެއް ހޭދަކުރަން ޖެހުނު ނަމަވެސް، ރަހީނުކުރި މީހުން ވަރަށް ރަނގަޅަށް ކަންކަން ކޮށްދީފައިވާ ކަމަށާއި އުނދަގޫތަކާ ކުރިމަތިލާން ޖެހުނީ އާއިލާ އާއި އެކުވެރިންނާ ދުރުގައި ހުންނަން ޖެހުމުން ކަމަށެވެ. އަދި އެއްވެސް އިރެއްގައި އެމީހުން ފައިސާއަށް ޑިމާންޑުކޮށްފައި ނުވާ ކަމަށް ވެސް އޭނާ ބުންޏެވެ.
އީއެލްއެން އިން ޑިއާޒްގެ ބައްޕަ ދޫކޮށްލާފައިވަނީ އޭނާ ދޫކޮށްލާނެކަމުގެ ޔަގީންކަން ދިނުމަށްފަހުއެވެ. ރަހީނުކުރީ އޭނާއަކީ ޑިއާޒްގެ ބައްޕަކަން ނޭނގި ކަމަށް އެ ގްރޫޕުން ބުނެފައިވެއެވެ.