11 Nov 2023, 11:59
ޔަހޫދީ އިސްރާއީލުން ޣައްޒާއަށް ދެމުންގެންދާ ހަމަލާތަކާއިހެދި ޣާއްޒާގެ ހުޅަނގުގައި ހުންނަ އެ ސިޓީގެ ހަމައެކަނި ކުޑަކުދިންގެ ހޮސްޕިޓަލް، އަލް ނަސްރު ހޮސްޕިޓަލް ބަންދުކުރަން ޖެހިއްޖެއެވެ.
ޔަހޫދީން ޣައްޒާއަށް ދެމުންގެންދާ ހަމަލާތަކުގައި ނަސްރު ހޮސްޕިޓަލަށް އަމާޒުކޮށް ވަރުގަދަ ހަމަލާތަކެއް ދީފައިވެއެވެ. އެގޮތުން ވޭތުވެދިޔަ 24 ގަޑިއިރު ތެރޭގައި އެ ހޮސްޕިޓަލަށް ދެ ފަހަރެއްގެ މަތިން ހަމަލާތައް އަމާޒުކޮށްފައިވާ ކަމަށް އެ ހޮސްޕިޓަލުގެ ޑިރެކްޓަރު މުސްތަފާ އަލް ކަލްހަލޫތު ވިދާޅުވިއެވެ.
"ފުރަތަމަ ހަމަލާ އަމާޒު ކޮށްފައި ވަނީ ހޮސްޕިޓަލުގެ މައި ދޮރާއްޓަށް. ދެވަނަ ހަމަލާ ދީފައި ވަނީ ކުޑަކުދިންނަށް ފަރުވާ ދިނުމަށް ބޭނުން ކުރާ ވޯޑަކަށް. އައި.ސީ.ޔޫ އަދި ތުއްތު ކުދިންނަށް ފަރުވާ ދިނުމަށް ބޭނުން ކުރާ އިންކިޔުބޭޓަރުތަކަށް އޮކްސިޖަން ފޯރުކޮށްދެވޭނެ ގޮތެއް ނެތް. ކަރަންޓު ކެނޑިއްޖެއްޔާ ގިނަ އަދަދެއްގެ ބަލި މީހުންގެ ފުރާނަ ގެއްލޭނެ،" ކަހްލޫތާ ހަވާލާދީ މިޑްލް އީސްޓް މޮނިޓާ އިން ރިޕޯޓުކުރެއެވެ.
އަލް-ނަސްރު ހޮސްޕިޓަލުގެ އިތުރުން ޣައްޒާގައި ހުންނަ އެހެން ހޮސްޕިޓަލްތަކަށް ވެސް ޔަހޫދީންގެ ހަމަލާތައް އަމާޒު ކުރަމުންދާ ކަމުގައި ފަލަސްތީނުގެ ސިއްހަތާ ބެހޭ ވުޒާރާއިން ބުނެއެވެ. އެ ގޮތުން އިންޑޮނީޝިޔާ ހޮސްޕިޓަލަށް ވަރުގަދަ ހަމަލާތަކެއްދީ ގިނަ އަދަދެއްގެ ބަޔަކު ޒަހަމު ކޮށްލާފައިވާ ކަމުގައި އެ ވުޒާރާއިން ބުނެއެވެ. ހަމަލާތައް ދީފައިވާއިރު، އިސްރާއީލުގެ ހަމަލާތަކުގެ ސަބަބުން ގެދޮރު ދޫކޮށްލަން މަޖުބޫރުވެފައިވާ އެތައް ބަޔަކު އެ ހޮސްޕިޓަލްގެ ހިޔާވަހިކަން ތިއްބެވެ.
ޣައްޒާގައި ހުންނަ އެންމެ ބޮޑު ހޮސްޕިޓަލް އަލް ޝިފާ ހޮސްޕިޓަލަށްވެސް ފާއިތުވި 24 ގަޑިއިރުގެ ތެރޭގައި އިސްރާއީލުން ވަނީ އަސްކަރީ ޓޭންކާއި މަތިންދާބޯޓުތައް ބޭނުންކޮށްގެން ހަމަލާތައް ދީފައެވެ. އެ ހަމަލާތަކުގައި ހަ މީހުން ޝަހީދު ކޮށްލާފައިވާއިރު، ގިނަ އަދަދެއްގެ ބަޔަކު ވަނީ ޒަހަމު ކޮށްލާފައެވެ. އަލް-ރަންތީސީ ހޮސްޕިޓަލަށް ވެސް ޔަހޫދީން ހަމަލަދީފައިވެއެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ އިސްރާއީލުން ޣައްޒާގައި ހިންގަމުންދާ ލާއިންސާނީ ޖާރީމާތަކުގައި ޝަހީދު ކޮށްލާފައިވާ މީހުންގެ އަދަދު ވަނީ 11000 ށް މައްޗަށް އަރާފައެވެ. އޭގެ ތެރޭގައި 4300 އަށްވުރެ ގިނަ ކުޑަކުދިން ހިމެނޭއިރު، ޒަޚހަމު ކޮށްލާފައިވާ މީހުންގެ އަދަދު މިހާރު ވަނީ 24,000 އަށް އުފުލިފައެވެ.