10 Nov 2023, 19:20
އިންތިޚާބީ ރައީސް ޑރ. މުހައްމަދު މުއިއްޒު ހުވާ ކުރައްވާ ރަސްމިއްޔާތުގެ ދައުވަތު އިންޑިއާގެ ބޮޑުވަޒީރު ނަރެންދުރަ މޯދީއަށް ފޮނުވާފައިވާކަން އެ ގައުމުގެ ސަރުކާރުން ކަށަވަރު ކޮށްދީފިއެވެ.
މިދިޔަ ރިޔާސީ އިންތިޚާބު ކާމިޔާބު ކުރެއްވި ޕީއެންސީގެ ރައީސް ޑރ. މުއިއްޒު ހުވާ ކުރެއްވުމުގެ ޖަލްސާ އޮންނާނީ އަންނަ ހުކުރު ދުވަހުގެ ހަވީރު 4:45 ގައި ޖުމްހޫރީ މައިދާނުގައެވެ. ހުވާ ކުރުމުގެ ޖަލްސާގެ އިންތިޒާމުތައް އަންނަނީ މަޖިލީހުގެ އިދާރާއިން ހަމަޖައްސަމުންނެވެ.
އިންޑިއާގެ އެކްސްޓާނަލް އެފެއާސް މިނިސްޓްރީގެ ތަރުޖަމާނު އެ ގައުމުގެ މީޑިއާގައި ވިދާޅުވެފައިވާ ގޮތުގައި، މުއިއްޒު ހުވާ ކުރެއްވުމުގެ ރަސްމިއްޔާތުގެ ދައުވަތު ވަނީ މޯދީއަށް ފޮނުއްވައިފައެވެ. އެކަމަކު، އެ ރަސްމިއްޔާތުގައި މޯދީ ބައިވެރިވެވަޑައިގަތުމާ މެދު އަދި ވަކި ގޮތެއް ނިންމައިފައެއް ނުވެއެވެ.
"[މުއިއްޒު ހުވާ ކުރެއްވުމުގެ ރަސްމިއްޔާތަށް] ވަޑައިގަތުމަށް ބޮޑުވަޒީރަށް ވަނީ ދައުވަތު އަރުވައިފައި. ވަޑައިގަންނަވާނީ ކޮން ބޭފުޅެއް ކޮން ހައިސިއްޔަތަކުން ކިހިނެއް ތަމުސީލު ކުރައްވަންކަން ފައިނަލްވީމާ ހާމަ ކުރާނަން. ދައުވަތު ވަނީ ލިބިފައި،" ތަރުޖަމާނާ ހަވާލާދީ އިންޑިއާގެ ނޫސްތަކުގައި ރިޕޯޓުކޮށްފައިވެއެވެ.
އިންތިޚާބީ ރައީސްގެ އޮފީހުގެ ތަރުޖަމާނު މުހައްމަދު ފިރުޒުލް އަބްދުﷲ ޚަލީލް ވެސް މީގެ ކުރިން ވަނީ އިންތިޚާބީ ރައީސް ހުވާ ކުރެއްވުމުގެ ރަސްމިއްޔާތަށް ސަރަހައްދުގެ ގައުމުތަކުގެ ވެރިންނަށް ދައުވަތު އަރުވާފައިވާނެކަން ކަށަވަރު ކޮށްދީފައެވެ.
ހުވާ ކުރެއްވުމުގެ ރަސްމިއްޔާތަށް އިންޑިއާގެ ބޮޑުވަޒީރަށް ދައުވަތު އަރުވާފައިވާއިރު، އިދިކޮޅުގައި ތިބިއިރު ޕީޕީއެމް/ޕީއެންސީން އެންމެ ބޮޑަށް ނުރުހުން ފާޅު ކުރީ އިންޑިއާ އެކު ހަދާފައިވާ އެއްބަސްވުންތަކާއި ރާއްޖޭގައި ގާއިމުވެ ތިބޭ އިންޑިއާ ސިފައިންނާ ގުޅޭ ގޮތުންނެވެ. އެގޮތުން، އެ ޕާޓީން ވަނީ 'އިންޑިއާ އައުޓް'ގެ ނަމުގައި މުޅި ރާއްޖޭގައި ވަރުގަދަ ސިޔާސީ ހަރަކާތެއް ހިންގައިފައެވެ.
އެކަމަކު، ރިޔާސީ ގަރާރަކުން އެ ހަރަކާތް މަނާ ކުރުމާ އެކު އިދިކޮޅުން ވަނީ 'އިންޑިއާ އައުޓް' ކެމްޕޭން ހުއްޓާލައިފައެވެ.
އިންތިޚާބުގެ ކެމްޕޭންގަޔާއި އަދި ކާމިޔާބު ކުރެއްވުމަށް ފަހުގައި ވެސް އިންތިޚާބީ ރައީސް ވަނީ ރާއްޖޭގައި ތިބި އިންޑިއާ ސިފައިން ފޮނުވައިލާނެކަން ތަކުރާރު ކުރައްވައިފައެވެ. އެ މަނިކުފާނު ވިދާޅުވީ، ޑިޕޮލޮމެޓިކް ހަމަތަކުގެ ތެރެއިން ރާއްޖޭގައި ގާއިމުވެ ތިބި ހުރިހާ އިންޑިއާ ސިފައިނުން އަނބުރާ ފޮނުވައިލާނެ ކަމަށެވެ. އަދި، އެކަން ކުރައްވާނީ ދެ ސަރުކާރުގެ މެދުގައި މަޝްވަރާ ކުރެވިގެން ޑިޕްލޮމެސީގެ ހަމަތަކުގެ ތެރެއިން ކަމަށް ވެސް އެ މަނިކުފާނު ވިދާޅުވިއެވެ.
ރާއްޖޭގައި ތިބި އިންޑިއާ ސިފައިން ފޮނުވައިލުމަކީ މުއިއްޒުގެ އެންމެ ބޮޑު އެއް ވައުދުފުޅެވެ.