07 Nov 2023, 14:29
ދިގު މުއްދަތަކަށް ހުޅުމާލެއިން ބިންތަކެއް ދޫކުރާ މައްސަލައިގައި، އެންޓި ކޮރަޕްޝަން ކޮމިޝަން (އޭސީސީ) އިން އާބަންކޯއަށް ވަދެއްޖެއެވެ.
އޭސީސީގެ މީޑިއާ އޮފިޝަލަކި 'ސަން' އަށް ވިދާޅުވީ އެ ކޮމިޝަނުން ތަހުގީގު ކުރަމުންދާ މައްސަލައަކާ ގުޅޭގޮތުން ތަހުގީގު ޓީމެއް އާބަންކޯގައި ހަރަކާތްތެރިވާ ކަމަށެވެ.
އޭސީސީން މިދިޔަ މަހު ވަނީ ވެރިކަން ބަދަލުވުމުގެ މި މުއްދަތުގެ ތެރޭގައި އެފަދަ އެއްވެސް މުއާމަލާތެއް ނުކުރުމަށް އާބަންކޯއަށް އަންގާފައެވެ.
މިކަމާ ގުޅޭ ގޮތުން އާބަންކޯގެ ބަހެއް އަދި ވަނީ ލިބޭގޮތް ނުވެފައެވެ.
ހުޅުމާލޭގެ ބިންތަކަކާ ގުޅޭ ވިޔަފާރީގެ މުއާމަލާތުތަކެއް ކުރަމުންދާ ކަމަށް ބުނެ އިންތިޚާބީ ރައީސް ޑރ. މުހައްމަދު މުއިއްޒުގެ އޮފީހުން ވެސް މި ފަހުން ވަނީ ކަންބޮޑުވުން ފާޅުކޮށްފައެވެ.
އެ އޮފީހުން ބުނެފައިވަނީ ހުޅުމާލޭގެ ބިންތަކަކީ، ދައުލަތުގެ ރައުސްމާލުގައި ހިމެނޭ އެންމެ އަގު ބޮޑު 'އެސެޓް'ތައް ކަމަށެވެ.
އެހެންވެ، މި މަރުޙަލާގައި އަވަސް އަރުވާލައިގެން، އެ ބިންތަކާ ގުޅޭ ވިޔަފާރީގެ މުޢާމަލާތްތައް ހިންގުމަކީ އިންތިޚާބީ ރައީސްގެ އޮފީހުން ކަންބޮޑުވާ ކަމެއް ކަމަށާއި އަދި، ވަކީން ޚާއްސަކޮށް، މި މުޢާމަލާތްތަކުގެ ތެރޭގައި، ބޭރުގެ ފަރާތްތަކަށް ބިން "ލީޒް"ކުރުމުގެ މުޢާމަލާތްތަކެއް ހިމެނޭތީ އިތުރަށް ކަންބޮޑުވާ ކަމަށް ވަނީ ބުނެފައެވެ.