05 Nov 2023, 13:12
ޣައްޒާ (5 ނޮވެންބަރު 2023): ޣައްޒާގެ އާންމުން މެރުމަށް އަމާޒުކޮށްގެން އިސްރާއީލު ހިންގަމުން ގެންދާ ގަތުލުއާންމުތަކުގައި ޣައްޒާގެ ޖަބާލިޔާ ރެފިއުޖީ އަވަށުގެ ސްކޫލަކަށް ހަމަލާދީ 15 މީހުން ޝަހީދުކޮށް 70 އަށް ވުރެ ގިނަމީހުން ޒަޚަމްކޮށްލައިފިއެވެ.
އެމެރިކާއާއި ޔޫރަޕްގެ ތާއީދާއި އެހީތެރިކަމާއެކު އިސްރާއީލުން ހިންގާ މި ގަތުލުއާންމުތަކުގައި މިހާތަނަށް 700އަށް ވުރެ ގިނަ ގަތުލުއާންމު ހިންގާފައިވާއިރު އެންމެ ފަހުން ގަތުލުއާންމު ހިންގީ ޣައްޒާގެ ޖަބާލިޔާ ރެފިއުޖީ އަވަށުގައި ހުންނަ އދ.އިން ހިންގާ އަލްފަޚޫރާ ނަމަކަށް ކިޔާ ސްކޫލްގައެވެ.
ޣައްޒާގެ ސިއްހަތާބެހޭ ވުޒާރާ ބުނާގޮތުން ރޭ އަލްފާޚޫރާ ސްކޫލަށް އިސްރާއީލުން ދިން ހަމަލާގައި ޝަހީދު ކޮށްލާފައިވާ 15 މީހުންގެ ހަށިތައް ނެގުމުގެ މަސައްކަތް ގެންދަނީ ކުރަމުންނެވެ. ޒަޚަމްވީ 70 އަށްވުރެ ގިނަ މީހުންގެ ހަށިތައްވަނީ އިސްރާއީލުން ބޮންއަޅައި ވައްޓާލި އެސްކޫލުގެ އިމާރާތުގެ ދަށުގައެވެ.
އެމީހުން ސަލާމަތް ކުރުމުގެ ކަންތައް ކުރިޔަށް ގެންދިޔުމަށްވަނީ ބޮޑެތި ދަތިތައް ދިމާވެފައެވެ. އެއީ އިސްރާއީލުން ހުއްޓުމެއްނެތި ބޮން އަޅަމުން ގެންދިޔުމާއި އިމާރާތްތަކުގެ ބައިތަކުގެ ދަށުން މީހުން ސަލާމަތް ކުރާނެ ތަކެއްޗާއި ސާމާނު ނެތުމެވެ.
މި ސްކޫލަށް ހަމަލާދިނުމުގެ ކުރިން އިއްޔެ އިސްރާއީލުވަނީ ފަލަސްތީނުގެ ރެޑް ކްރެސެންޓް ޖަމާއަތުގެ އެމްބިޔުލާންސަކަށްވެސް ހަމަލާދީ 15 މީހުން ޝަހީދުކޮށްލައި އިތުރު 60 އެއްހާ މީހުން ޒަޚަމުކޮށްލާފައެވެ.
އިސްރާއީލުގެ ވައިގެ ސިފައިން މި އެންބިއުލަންސަށް މިސައިލުން ހަމަލާތައް ދީފައިވަނީ ޣައްޒާގެ އައްޝިފާ ހޮސްޕިޓަލުގެ ކައިރީގައި އާންމުންގެ އެތައް ސަތޭކަ ބަޔަކު ހަރަކާތްތެރިވަމުން ދިޔަ ވަގުތެއްގައެވެ. ހަމަލާ އަމާޒުވި އެންބިއުލަންސް އޮތީ އައްޝިފާ ހޮސްޕިޓަލުގެ ކައިރީގައެވެ.
އިސްރާއީލުން ޣައްޒާގެ އާންމުން މެރުމުގެ މަގްސަދުގައި ހިންގަމުން ގެންދާ ގަތުލުއާންމުތަކުގައި ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ ޢަދަދު ވަނީ 10،000އަށް ވުރެ މައްޗަށް ގޮސްފައެވެ. މީގެތެރޭގައި ހަތަރުހާހަށް ވުރެ ގިނަ ކުޑަކުދިންނާއި 3،000އަށް ވުރެ ގިނަ އަންހެނުން ހިމެނެއެވެ. އަދި މުސްކުޅި އުމުރުގެ ހާހެއްހާ މީހުންނާއި ޒުވާން އުމުރާއި މެދުއުމުރުގެ ދެހާހަށްވުރެ ގިނަ މީހުން ހިމެނެއެވެ. ޒަޚަމް ކޮށްލާފައިވާ މީހުންގެ ޢަދަދު ވަނީ 33،000އަށްވުރެ މައްޗަށް ގޮސްފައެވެ.
އިސްރާއީލުން އެންމެފަހުން ގަތުލުއާންމު ހިންގި ފާޚޫރާ ސްކޫލަކީ އިސްރާއީލުން ޖަރީމާތަކުގެ ސަބަބުން ގެދޮރު ގެއްލި މަގުމަތިވެ ރެފިއުޖީންނަށް ވެފައިވާ ޣައްޒާގެ އާންމުން ރައްކާތެރިކަން ހޯދުމަށްޓަކައި އޭގެތެރެއިން އެތައް ސަތޭކަ ބަޔަކު ތިބި ސްކޫލެއްކަމަށް ފަލަސްތީނުގެ ރެފިއުޖީންނާބެހޭ އދ.ގެ އިދާރާ ޔުނައިޓެޑް ނޭޝަންސް ރިލީފް އެންޑް ވަކްސް އޭޖެންސީ ބުނެއެވެ.
އިއްޔެ އެމެރިކާއާއި ޔޫރަޕްގެ ގައުމުތަކުގައި އެތައް މިލިޔަން ބަޔަކުވަނީ ޣައްޒާގެ އާންމުންނާ ދެކޮޅަށް އިސްރާއީލު ހިންގަމުން ގެންދާ ގަތުލުއާންމުތަކާ ދެކޮޅަށް އަޑުއުފުލައި އެގަތުލުއާންމުތައް ހިންގުން ވަގުތުން ހުއްޓާލުމަށް ގޮވާލައި މުޒާހަރާކޮށްފައެވެ. މި މުޒާހަރާތައް ކޮށްފައި މިވަނީ އިސްރާއީލުގެ އަނިޔާވެރިކަމާ ދެކޮޅަށް މުޒާހަރާ ނުކުރުމަށް އެމެރިކާއާއި ޔޫރަޕްގެ ސަރުކާރުތަކުން އެގައުމުތަކުގެ އާންމުންނަށް އިންޒާރުކޮށްފައި ވަނިކޮށް އެއިންޒާރުތަކަށް ގޮންޖެހުމަށްފަހުގައެވެ.
އެމެރިކާއާއި ޔޫރަޕްގެ ފުލުހުންވަނީ މުޒާހަރާތަކުގެ ބައިވެރިންގެ ގަޔަށް ކަރުނަގޭސް ޖަހައި ލަޓިބުރިން ހަމަލާދީ މުޒާހަރާތައް ހުއްޓުވުމަށް ގިނަ މަސައްކަތްތަކެއް ކޮށްފައެވެ. މުޒާހަރާތަކުގައި ބައިވެެރިވި ބައެއް މީހުން ވަނީ ހައްޔަރުވެސް ކޮށްފައެވެ.