04 Nov 2023, 14:07
ދިވެހި ރާއްޖޭގެ ގައުމީ ޔުނިވާސިޓީން ގްލޯބަލް ކޮލިޓީ އެކްރެޑިޓޭޝަން ހާސިލު ކޮށްފިއެވެ.
އެމްއެންޔޫއިން ބުނީ، މި ގްލޯބަލް ކޮލިޓީ އެކްރެޑިޓޭޝަނަކީ އިނގިރޭސި ވިލާތުގެ ކޮލިޓީ އެޝުއަރެންސް އެޖެންސީން ހިންގާ އިންޓަނޭޝަނަލް ކޮލިޓީ ރިވިއު އެއް ކަމަށެވެ.
ގައުމީ ޔުނިވާސިޓީއަށް މި ލިބުނު ކާމިޔާބީ ފާހަގަ ކުރަން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްއެންޔޫގެ ވައިސް ޗާންސެލާ ޑރ. މުހައްމަދު ޝަރީފް ވިދާޅުވީ މި އެކްރެޑިޓޭޝަނަކީ އިލްމީ ފެންވަރާއި، ދުނިޔޭގެ މިންގަނޑު ތަކަަށް އެ މުއައްސަސާއިން އަހަންމިއްޔަތުކަން ދޭ ކަމުގެ ވަރަށް ބޮޑު ދަލީލެއް ކަމަށެވެ.
އެމްއެންޔޫއިން ބުނީ މި އެކްރެޑިޓޭޝަނަކީ ފަސް އަހަރުގެ މުއްދަތަކަށް ސައްހަ އެއްޗެއް ކަމަށެެވެ. އަދި މިއީ އައިކިއުއާރުގެ ވަރުގަދަ މިންގަނޑުތައް ކާމިޔާބުކަމާއެކު ފުރިހަމަ ކުރާ ބައިނަލްއަގްވާމީ މުއައްސަސާތަކަކަށް ދޭ އެކްރެޑިޓޭޝަނެއް ކަމަންވެސް އެ ޔުނިވާސިޓިން ވަނީ ފާހަގަ ކުރައްވައިފައެވެ. މީގެ އިތުރުން މި އެކްރެޑިޓޭޝަނަކީ ކިއުއޭއޭގެ ފުރިހަމަ މެންބަރަކަށް ވުމަށް ވެސް ޝަރުޠު ފުރިހަމަވާ އެއްޗެއްކަމަށް އެމްއެންޔޫއިން ވަނީ ބުނެފައެވެ.
މީގެ އިތުރަށް އެމްއެންޔޫއިން ބުނީ މި އިވަލުއޭޝަނަކީ ގާތްގަނޑަކަށް ދެ އަހަރު ދުވަހުގެ މުއްދަތައް ކުރިއަށް ގެންދިޔަ ވަރަށް ހަރުކަށި އަދި ފުރިހަމަ އިވަލުއޭޝަނެއް ކަމަށެވެ. އެ ގޮތުން މި އިވަލުއޭޝަނުގައި ޔުނިވާސިޓީގެ ގަވަނަންސް އާއި، ކިޔަވައިދިނުމާއި، އުނގެނުމުގެ އުސޫލުތަކުގެ އިތުރުން މަންހަޖު ޑިޒައިން ކުރުމުގެ މަރުހަލާ އާާއި، ސްޓޫޑަންޓް ސަޕޯޓް މެކޭނިޒަމްތަކާއި، އިންޓަނޭޝަނަލް ކޮލިޓީ އެޝުއަރެންސް ޕްރޮޓޮކޯލްތައް ވަރަށް ފުރިހަމައަށް ބެލުން ހިންމެނޭކަމަށް އެ ޔުނިވާސިޓީން ވަނީ ބުނެފައެވެ.
އެގޮތުން މިއަދު ބޭއްވި ނޫސްވެރިންގެ ބައްދަލުވުމުގައި ޝަރީފް ވެސްވަނީ މިކަމާ ގުޅޭ ގޮތުން ވާހަކަ ދައްކަވާފައެވެ.
"އެކްރެޑިޓޭޝަން ޕްރޮސެސްއަށް ބަލާނަމަ، މި ޕްރޮސެސްގަ އަޅުގަނޑުމެންގެ އެކަޑަމިކް ޕްރޮގްރާމްތަކާއި، ފެކަލްތީ ތަކާއި، ޔުނިވާސިޓީގެ ގަވާނަންސްއާއި، އިންފްރާސްޓްރަކްޗާ އަދި ސްޓޫޑަންޓް ސަޕޯޓް ސާވިސެސްގެ ފުރިހަމަ ރިވިއުއެއް ވަނީ ބައްލަވާފަ" ޑރ. ޝަރީފް ވިދާޅުވިއެވެ.
އެމްއެންޔޫއިން ބުނީ ރިވިއު ޓީމުން ހެދި އެސަސްމަންޓުގައި ، އެމްއެންޔޫއިން ނަމުނާ ގޮތެއްގައި އަމަލުކުރާ ތިން ދާއިރާ އަކަށް އަލި އަޅުވައިލައްވައިފައިވާ ކަމަށެވެ. އޭގެ ތެރޭގައި ހިމެނެނީ ސިނާއަތުން ބޭރުގެ އެހެން ސްޓޭކް ހޯލްޑަރުންނާއެކު ބާއްވަމުން އަންނަ ގާތް ގުޅުންތަކާއި، މުސްތަގުބަލުގައި ޔުނިވާސިޓީތަކުގައި ތައުލީމު ހާސިލުކުރަން ތިބި ދަރިވަރުންނަށް، އެމްއެންޔޫއިން ހިންގާ އައުޓް ރީޗިން ޕްރޮސެސްތަކާއި، އެތެރޭގެ އަދި ބޭރުގެ ކޮލިޓީ އެޝުއަރެންސް މެކޭނިޒަމްގެ އިސްނެގުމެވެ.
އެމްއެންޔޫއަށް މި ޝަރަފު ހޯދައިދިނުމުގައި ތައުލީމީ އަދި އިދާރީ މުވައްޒަފުންގެ އިތުރުން ދަރިވަރުންގެ ޙިއްޞާ އެބައޮތް ކަން ފާހަގަ ކުރައްވާ ޑރ. ޝަރީފް ވަނީ އެ ހުރިހާ ފަރާތްތަކަށް ޝުކުރު އަދާކުރައްވައިފައެވެ.
އިތުރަށް ޑރ. ޝަރީފް ފާހަގަކުރެއްވި ގޮތުގައި މި ކާމިޔާބީއަކީ ހައިރާންވާންޖެހޭ ވަރުގެ ކާމިޔާބީއެއް ނޫނެވެ. ސަބަބަކީ އެމްއެންޔޫ އުފެދުނު ދުވަހުން ފެށިގެން ޚިދުމަތްތަކުގެ ފެންވަރު ދަމަހައްޓައި، އެ ޔުނިވާސިޓީގެ މިޝަންގައިވާ ގޮތުގެ މަތިން ބައިނަލްއަޤްވާމީ އެންމެ މަތީ ފެންވަރުގައި ޔުނިވާސިޓީ ދެމެހެއްޓުމަށް ކުރާ މަސައްކަތަކީ ސާބިތުކަމާއެކު ކުރާ މަސައްކަތަކަށް ވާތީއެވެ.
މިކަމާ ގުޅޭގޮތުން ކިއުއޭއޭގެ ހެޑް އޮފް އެކްރެޑިޓޭޝަން އެންޑް ކޮންސަލްޓެންސީ ކްރިސް ބްލެންޑް ވިދާޅުވީ، އެ ޔުނިވާސިޓީން ގްލޯބަލް ކޮލިޓީ އެކްރެޑިޓޭޝަން ހާސިލްކޮށްފައިވާކަން އިއުލާން ކުރުމުން ވަރަށް އުފާވި ކަމަށެވެ.
"އަޅުގަނޑުމެންނަށް ރާއްޖޭގައި ތިބި ކޮލީގުންނާއެކު މަސައްކަތްކުރުމުގެ ފުރުސަތު ލިބުމުން ވަރަށް އުފާވި، ކުރިއަށް އޮތްތަނުގައި އަނެއްކާވެސް އެ މީހުންނާއެކު މަސައްކަތް ކުރަން ފުރުސަތު ލިބޭނެ ކަމަށް އުންމީދު ކުރަން" ކްރިސް ބްލެންޑް ވިދާޅުވިއެވެ.
މި ކާމިޔާބީ ލިބުމާއެކު، އެމްއެންޔޫއިން ދޭ ޔަގީން ކަމަކީ ދުނިޔޭގެ ފެންވަރުގައިވެސް ތައުލީމީ ގޮތުން ކުރި ހޯދަން މަސައްކަތްކޮށް، ފެންވަރު މަތީި ތައުލީމެއް ދަރިވަރުންނަށް ފޮރުކޮށްދޭނެ ކަމެވެ.
މީގެ އިތުރަށް އެމްއެންޔޫއިން ބުނީ މި އެކްރެޑިޓޭޝަންގެ ސަބަބުން އެމްއެންޔޫއަކީ ކިއުއޭއޭ ކޮމިއުނިޓީގެ ބައިނަލްއަޤްވާމީ މެންބަރަކަށް ވެސް ވާނެ ކަމަށެވެ.