04 Nov 2023, 18:30
ޓިކްޓޮކްގެ ސީއީއޯ ޝޯ ޒީ ޗީވް އަންނަ ހަފުތާގައި އީޔޫގެ މުހިންމު ކޮމިޝަނަރުންނާ ބައްދަލުކުރެއްވުމަށް ބްރަސަލްސްއަށް ވަޑައިގަންނަވާނެ ކަމަށް އެ ކުންފުނިން ބުނެފިއެވެ.
ޗީވް ބައްދަލުކުރާނީ އީޔޫގެ އިންޑަސްޓްރީ ޗީފް ތިއޭރީ ބްރެޓަންއާއި އީޔޫ ޑިޖިޓަލް ޗީފް ވެރާ ޖޯރޯވާ އަދި އީޔޫ އެންޓިޓްރަސްޓް ޗީފް ޑިޑިއޭ ރެއިންޑާސްއާ ކަމަށްވެސް ޓިކްޓޮކްގެ ބެލެނިވެރި ކުންފުނި ބައިޓްޑާންސްއިން ބުނެއެވެ.
މި ދަތުރުފުޅަކީ އިސްރާއީލުން ހަމާސްއަށް ދެމުންދާ ހަމަލާތަކާ ގުޅޭ ގޮތުން ދޮގު މައުލޫމާތު ފެތުރުމުގައި ޓިކްޓޮކްގެ ދައުރު އޮތް މިންވަރު ތަހުގީގު ކުރުމުން އިތުރުކޮށްފައިވާ ދަނޑިވަޅެއްގައެވެ.
ރެގިއުލޭޓަރުން ވަނީ އެ ޕްލެޓްފޯމްގެ ކޮންޓެންޓުން އިޖުތިމާއީ ނުރައްކާތަކަށް ހައްލެއް ހޯދުމަށް ޕްރެޝަރުކޮށްފައެވެ.
ޗީވްގެ މި ބައްދަލު ކުރެއްވުމުގައި، ޓިކްޓޮކްގެ ޑޭޓާ ސެކިއުރިޓީ އިމްޕްރޫވްމަންޓާއި އީޔޫގެ އާ ޑިޖިޓަލް އުސޫލާ އެއްގޮތަށް އަމަލުކުރުމާ ގުޅޭ ގޮތުން މައުލޫމާތު ފޯރުކޮށްދޭނެއެވެ.
ޓިކްޓޮކުން ވަނީ ޔޫރަޕްގައި ޓިކްޓޮކް ބޭނުންކުރާ މީހުންގެ މައުލޫމާތު އެ ސަރަހައްދުގައި ރައްކާކޮށް ކޮންޓެންޓް މޮޑަރޭޝަން ފުޅާކުރުމަށް މަސައްކަތްކޮށްފައެވެ. ނަމަވެސް އީޔޫގެ ލީޑަރުން ގެންދަވަނީ ދެފުށް ފެންނަ އަދި ޖަވާބުދާރީކުރުވުން އިތުރުކުރުމަށް ގޮވާލަމުންނެވެ.
މީގެ ކުރިންވެސް އީޔޫއިން ވަނީ ޓިކްޓޮކްގެ ނަޒާހަތްތެރިކަމާއި ރައްކާތެރިކަމުގެ ފިޔަވަޅުތަކާ ގުޅޭ ގޮތުން ތަފްސީލް ދިނުމަށް ސުންގަޑިއެއް ދީފައެވެ.
އީޔޫގައި ޓިކްޓޮކް މަނާ ނުކުރި ނަމަވެސް ޗައިނާގެ ނުފޫޒުގަދަ އެ ޕްލެޓްފޯމުން ކުރިމަތިވެދާނެ ނުރައްކާތަކާ މެދު އީޔޫއިން ވަނީ ވަރަށް ބޮޑަށް ކަންބޮޑުވުން ފާޅުކޮށްފައެވެ. ޗީވްގެ މި ދަތުރުން އަންގައިދެނީ އީޔޫގެ ރެގިއުލޭޓަރުންނާ އެކު ޓިކްޓޮކުން މަޝްވަރާ ކުރާން ބޭނުންވާ މިންވަރުކަން ރިޕޯޓްތައް ބުނެއެވެ.
ނަމަވެސް ޓިކްޓޮކްގެ އަމަލުތައް ޔޫރަޕްގެ މިންގަނޑުތަކާ އެއްގޮތް ކުރުމަށް ބޮޑެތި ގޮންޖެހުންތަކެއް އަދިވެސް އެބަހުއްޓެވެ. ޔޫރަޕްގެ އެންމެ މަތީ ފަންތީގައި މިހާރު ކުރިއަށްދާ މަޝްވަރާތަކުން ދައްކުވައިދެނީ ޔޫރަޕްގައި ޓިކްޓޮކަށް ކުރިމަތިވެދާނެ ބޮޑު ގޮންޖެހުންތަކުގެ މިންވަރެވެ.