24 Nov 2023, 10:32
"ފާފައެއް ނުކުރާނެ އިންސާނެއް ނުވާނެއެވެ. ނަމަވެސް ފާފަތަކާއިމެދު ހިތާމަކޮށް ތައުބާވުމުން ފާފަ ފުއްސަވާދެއްވައެވެ. ގިނަގިނައިން ފާފަ ފުއްސެވުމަށް އެދި ދުޢާކޮށް ތައުބާވާށެވެ. އެއްވެސް ހާލެއްގައި ﷲގެ ރަހުމަތާއިމެދު އުއްމީދު ކަނޑާނުލާށެވެ."
***
އައްޒަހްރާ އޭނަގެ އަންހެންދަރި މާހްޒަބީންއަށް ގުޅިއެވެ."މާދަން ނާދެވޭނެތަ؟ މަންމަގެ ހިތް ނުތަނަވަސްވަނީ. ކުރެވުނު ފާފަތަކުގެ ސަބަބުން ކަން ނޭގޭ، މިއީ ރަގަޅުކަމެއްނޫން..........."
"މަންމާ ހެޔޮނުވާނެ..."މާހްޒަބީން ތަންކޮޅެއް ނުރުހިފައި ކިޔާލިއެވެ.
"އެވާހަކަ ނުދައްކާވަރެއް ނޫން، މަންމަގެ މިއުމުރުގައި މިފަދަ ފާފައެއްގެ މަތީގައި ހުރެގެން ދުނިޔެދޫކޮށް ﷲގެ ހަޟުރަތަށް ގޮސް ދޭނީ ކޮން ޖަވާބެއްތަ؟ ވެލީގެ ދާނުގައި ނިދަން ޖެހޭ ދުވަސް ވަރަށް ކައިރިވެއްޖެ. މަންމަ ބިރުގަނޭ......"
"ޕްލީޒް ވަކިވުމުގެ ވާހަކަ ނުދައްކާ.. ޒުވާން ކުދިންވެސް މަރުވާންވީމަ މަރުވޭ."
"ކޮންއިރަކު އަންނަނީ؟ މިފަދަ ވާހަކައެއް ފޯނުން ދައްކަން ފަސޭހައެެއްނޫން. މަންމަ ބޭނުން މާހް ކައިރީގައި ހުރެ މި މައްސަލައަށް ހައްލެއް ހޯދަން..............."
"އޯކޭ އޯކޭ މަންމާ، ބިޒީކަމުން އަދި ނުދެވިގެން މަންމައަށް އެނގެއެއްނު ވިލްދާންގެ ސްކެޖޫލް ހުންނަގޮތުން ހިތަށް އަރާއިރަށް ނުދެވޭނެކަމާއި އަދި އޭނަގެ ގޮތްދޫނުކުރާކަން................." މާހްޒަބީންގެ ހިތް މަންމަގާތު ހުޅުވައިލަން ފަސްނުޖެހެނީ މަންމައަށްވުރެ ސިއްރު ފޮރުވަން ދަންނަ އިތުބާރުކުރެވޭ އެހެން ފަރާތެއް މި ކާއިނާތުގައި ނުވާނެކަމަށް އޭނަ ގަބޫލުކުރާތީއެވެ. މަންމައާއި އަނގަތަޅައިލަން ދުވާލުން ކޮންމެވެސް ވަގުތުކޮޅެއް ހުސްކޮށްދެވެއެވެ. ނަމަވެސް މާހްޒަބީންގެ ތާވަލުގެ ތެރޭގައި ދުނިޔަވީ ބައިވަރުކަންތައް ހިމަނާލާފައިވާތީ ދެވެނީ ކުޑަކުޑަ ވަގުތުކޮޅެކެވެ. އެވަގުތުކޮޅުގައިވެސް މަންމަގެ ހާލާއި ޝަކުވާތަކަށް އަޑުއެހުމުގެ ބަދަލުގައި މަންމައަށް ޖެހެނީ އޭނަގެ ވާހަކަތައް އަހަން ހުރުމަށެވެ. އައްޒަހްރާ ފޯނު ބާއްވާފައި މަޑުމަޑުން މޭގައި ފިރުމަންފެށިއެވެ. ލޯ ތެމުނީ ހިތަށް ކުރި އުދަގޫވި އިހުސާސްތަކުންކަން ޔަގީނެވެ. ހިނދުކޮޅެއްވަންދެން އެ އަލި މޫނުން ހިތާމައިގެ ކުލަވަރު ފެނިލިޔަސް ދާދިއަވަހަށް އެ ހުރިހާ ޝުއޫރުތައް ފޮރުވާލައިފިއެވެ. މައިންނަކީ ހިތްވަރުގަދަ ބަޔެއްނޫންހެއްޔެވެ؟ ދަރިންނަށްޓަކާ ނުވާނީ ކޮން ގުރުބާނީއެއްހެއްޔެވެ؟
***
"ވެލްވެޓް މެންޝަން"ގައި އައްޒަހްރާގެ ދައުރު ވަރަށް ބޮޑެވެ. ގެ ހިންގުމާއި ޚަރަދުތައް ބެލެހެއްޓުމުން ފެށިގެން ދަރިން ތަރުބިއްޔަތުކުރުމާއި ދީނީ ކަންތައްތަކަށް ބާރު އެޅުމަކީވެސް އޭނަގެ މަސްއޫލިއްޔަތެވެ. ޒިންމާތައް ބޮޑުވެގެންގޮސް ބައެއްފަހަރު ލޭމައްޗަށް ދާވަރުވިޔަސް އައްޒަަހްރާ ހިތްވަރާއެކު މަސައްކަތްކުރީ ބަލިކަށިނުވެ ފިޔަވަޅުތައް ނެގުމަށެވެ. ބަގުރޫޓުވަމުން ދިޔަ ޖަވާހިރު ވިޔަފާރި ކޮޅަށް ޖެހޭތޯ މަސައްކަތްކުރަމުން ދިޔައީ ނެތް ހިތްވަރުލާފައެވެ. އޭނަގެ ވިޔަފާރީގެ ބައިވެރިޔާ ގެ ފަރުވާކުޑަކަމާއި ހިންގުންތެރިކަން ކުޑަވުމުގެސަބަބުން ވިޔަފާރިއަށް ގެއްލުންވަމުން ދިޔައެވެ. އެކަން ފޫބައްދަން ނަގަމުންދާ ލޯނުތަކުންވެސް ދަރަނިވެރިވުން ނޫންކަމެއް ނުވިއެވެ. އެންމެފަހު ލޯނު ނަގަންޖެހުނީވެސް ފިހާރަ ހުންނަ އިމާރާތް ރަހުނު ކޮށްފައެވެ.
އައްޒަހްރާގެ ކޮޓަރީގެ މެދުގައި ހުރި ބޮޑު އެނދަށް އަރާ ރަޖާގެ ދަށަށް ވަދެއޮތް އަލްބާންގެ އަތުން ފޯނު ދޫކޮށެއްނުލައެވެ. އައްޒަހްރާ އެނދުމަތީގައި ހުރި ފޮށިން އެކި ކުލައިގެ ޖަވާހިރުތައް އަތުރާފައި އަލްބާންގެ ސަމާލުކަން އަތުލަން މަސައްކަތްކުރިއެވެ.
"މިއީ ފީރޯޒެއް. ކިހާ ރީތި. ދަރިފުޅަށް މީ އަސްލު ނޫނީ މަސްނޫއީ ފީރޯޒެއްކަން ޔަގީންކުރާނެ ގޮތް ބުނެދެންތަ؟"
"މްމްމްމ.."އަލްބާން އިނީ ފޯރިއާއެކު ޕަބްޖީ ކުޅުމުގައި ގެއްލިފައެވެ. މަންމަ ދެއްކި ވާހަކަތަކެއް އޭނަގެ ކަންފަތަކަށް ނުވަނެވެ. އައްޒަހްރާ ފަހަރަކު ކުލައަކުން ޖަވާހިރެއް ނަގަމުން ދިޔައެވެ.
"މިއީ ކަނޑު ނީލަމެއް..އަލްބާންގެ ކައިވެނީގެ ދުވަހު އަންހެންކުއްޖާގެ ގައިގާ މި ޖަވާހިރުން ގަހަނާ އަޅުވައިލީމަ ހާދަ ޗާލުވާނެއޭ...އަލްބާން...އިހަށް ފޯނު ބާއްވަބަލަ. މި ވިޔަފާރިއަށް ވަންނާނެ އެހެން ކުއްޖެއް މަންމަގެ ނެތޭ...ޒަވިއާރުއަކީ ބޭސްވެރިއެއް. ދެން ހުރީ މުރުތަސިމް....ޕައިލެޓުންނަށް ވިޔަފާރީގެ ކޯންޗެއް އެނގޭނީ؟ މިއީ ޔާގޫތެއް. ނީލަމަށްވުރެ މި އަގުބޮޑުވާނެ.ސަބަބަކީ މީގައި މިހިރަ ނާދިރު ކުލައާއި ލިބުމުގައި ހުރި ތަދުކަން. ކިހާ ރީތި ކުލައެއް. އިރުގެ އައްޔަށް ގެންދިޔައީމަ މި ވިދާނެ.." އައްޒަހްރާ ވާހަކަދައްކަން އިނދެފައި އަލްބާންގެ ބުރަކަށީގައި މަޑުމަޑުން ޖަހައިލިއެވެ."ކޮން އިރެއް ފޯނުގައި އޮންނަތާ....މަންމަ ދެއްކި ވާހަކަ އިވުނުތަ؟"
"ސޮރީ މަންމާ ކީކޭ ބުނީ؟ ޔާގޫތުއައި ނާދިރާ މިގެއަށް އަންނާނެއޭ ދޯ..ޕައިލެޓުންތަ؟ މުރުތަސިމްގެ ފްރެންޑްސް؟" އަލްބާން މަންމަގެ މޫނަށް ކުޑަކޮށް ބަލާލިއެވެ. އަލްބާންއަށް އޭނަގެ މަންމަގެ ވާހަކައިން ނެގުނު ތަންކޮޅެއް ލަފާކޮށްލިގޮތަށް ވާހަކަދެއްކިއެވެ. އައްޒަހްރާ ބޯހޫރައިލީ މާޔޫސީގޮތަކަށެވެ.
"މަންމަ ކިޔާ އެއްޗެއް ތި ކަންފަތަކަށް ނީވުނު. އަލްބާންއަށް މަންމައަށްވުރެ ފޯނުވިއްޔަ މުހިއްމީ......"
"ފޯނެއްނޫން. ޕަބްޖީ މަންމާ.."
"ހެވޭދެން..މަންމަ ބުނެ ބުނެ އާދޭސްކޮށް މަންމަގެ މި ވިޔަފާރިއަށް މަންމަގެ ދަރިއެއް ވަންނަން ނޫޅުނު. މަންމަ ނެތް ދުވަހަކުން ވާނީ ކިހިނެއް؟"
"މަންމަ ނެތް ދުވަހެއް ނާންނާނެ..ކޮންމެވެސް ތަނެއްގައި މަންމަ އަބަދަށް ވާނެ..އެކަހަލަ ވާހަކަ ނުދައްކާ...."އަލްބާން ތެދުވެފައި މަންމަގެ ކަދުރާއަށް އަތް ވައްޓައިލިއެވެ."މަންމަ ނޫނީ އަޅުގަނޑުގެ ހުރީވެސް ކާކު؟"
"އެކަމެއް ނޭގޭ...މަންމަ ދެރަވަނީ އަލްބާން ކުޑަކުއްޖެއްހެން އުޅޭތީ. ހަރުވާ އުމުރު ތިއީ.."
"ޖަވާހިރު ވިޔަފާރި ފޫހި. މަންމަ އެހެން ކަމެއްދައްކާ..."
އައްޒަހްރާ ހުރިހާ ޖަވާހިރުތައް ފޮށްޓަށް ލައިގެން ގޮސް ތިޖޫރީއަށް ލާ ރައްކާކުރިއެވެ. އަލްބާން އެއްވެސް ވަރަކަށް ޝައުގެއް ނެތްކަމެއްގެ ތެރެއަށް ވައްދާނެގޮތެއް އޭނަގެ ވިސްނުމަކަށް ނައެވެ. ވިޔަފާރިނޫނީ ދެން ދައްކަން އޮތީ ކޮންކަމެއްހެއްޔެވެ؟ ދަރިފުޅުގެ ހުރިހާ ވަގުތެއް ހުސްކޮށްލަނީ ކުޅިވަރާއި ކެއުމާއި ނިދުމުގައެވެ. ނަމާދަށް އަދި އަޅުކަންތަކަށް އެހާފަރުވާކުޑައެވެ. އަންހެންދަރިން ބުނާނީ މަންމަ އަލްބާންއާއި ޖޫރީ ލޯބިންގޮސް ހަލާކުކުރަނީ ކަމުގައެވެ. ހަނގުވީމަ ވަކި ޚާއްސަ އިމްތިޔާޒެއް ބަހައްޓަން ނުޖެހޭނެކަމަށެވެ. އެހެން ކުދިންނަށް ނުވިސްނެނީއެވެ. އެކުދިންނަށްވެސް މަންމަ ކޮށްނުދެނީ ކޮންކަމެއްހެއްޔެވެ؟ އައްޒަހްރާ ނިތްމަތީގައި އަތް ބާއްވާލައިގެން އޮތްއިރު ޚިޔާލުގެ ވާފަށް އެއްލައިލެވުނީ މާ ދުރަށެވެ. މާޒީގެ ތެރެއަށެވެ. އަތުން ހެދުނު ގޯސްތައް ރަގަޅުކުރާނެ ގޮތެއްވެސް އޭނައަަކަށް ނޭގެއެވެ.
***
އައްޒަހްރާ އެކަނިމާއެކަނި ސިޓިންރޫމްގައި އާއްމުކޮށް އިންނަ ސޯފާގައި އިށީދެލައިގެން އިންއިރު އަތުގެ އިނގިލީގައި ތަސްބީހައެއް އަޅުވާފައިއޮތެވެ. މަރު ކައިރީގައި އޮތްކަމުގެ އިހުސާސް ބޮޑުވާވަގުތުގައި އިންތިހާއަށް ބިރުގަނެއެވެ. ތަފާތު ޚިޔާލުތަކެއްގައި އިންދާ އަލްބާން ޝަކުވާކުރަމުން އައިސް މަންމަގެ އުނގުގައި ބޯ އަޅައިލިއެވެ. ޖޫރީ ގަސްތުގައި ބޯޅަ އެއްލުމުން ބާރަށް ޖެހި ބޮލަށް އަނިޔާވީއެވެ. އައްޒަހްރާ އަލްބާންގެ ވަރުގަދަ އިސްތަށިގަނޑު ދުރުކޮށްލާފައި އަތްލާ ބަލައިލިއިރު ދުޅަތަނެއް ނުފެނުނެވެ. ބިލާލް ގާތު ބުނެގެން އައިސްޕެކް ގެނެސްދިނުމުން އައްޒަހްރާ އަލްބާންގެ ބޮލުގައި ފިރުމަމުން ގަނޑުފެން އަޅާދޭންފެށުމުން ލިބުނު އަރާމުގައި ލޯ މަރައިލެވުނެވެ. އިރުކޮޅެއްނުވަނީސް ކަފަގަނޑެއްފަދަ އެއްޗެއް އަތުތެރޭ ލެއްވުމުން އޭނަ އޭގައި ބައްދައިލިއެވެ. އަލްބާންގެ އެ ކަންނޭލަކީ އޭނަގެ ބައިވެރިޔާއެވެ. މުރުތަސިމް ހީގަތް އަޑުއިވުނެވެ.
"ސާބަހޭ އަލް...ޖޫރީއަށްވުރެ ފަހުން ވިހެއީ މީނަ ތަ؟" ޒަވިއާރުގެ އަޑުވެސް އިވުނެވެ.
"ހެޑް އިންޖަރީއެއްވީ...ޖޫރީއާއިހެދި..މަގޭ އަތުން އެކުއްޖާ މަރުވާނެ.."އަލްބަން އަތުތެރޭގައި އޮތް ބާލީހުގައި މޫނު ފޮރުވައިލިއެވެ.
"އައްސަލާމް އަލައިކުމް....ރަގަޅު ވަގުތެއްގައިތަ ދައްތައަށް މިގެއަށް ވަދެވުނީ؟"އައްޒަހްރާގެ ކޮއްކޮ ސަކީނާ އެތެރެއަށް ވަނެވެ. ސަކީނާ ބިޔަކަމާއި ބަރުހެލިކަމުން ހިނގާބިގާވެ އުޅެން ދަތްޗެވެ. ސަކީނާގެ ދަރިން ތިބެނީ ކާއެއްޗެހި ފޮރުވާފައެވެ. މަންމަގެ ކެއުން ހައްދުން ނެއްޓިފައިވާތީއެވެ. ދޭތެރެއަކުން ކެއުމުގެ ނުބައި އާދަ ހުއްޓުވާނެ އޭނައަކަށްވެސް ނޭގެއެވެ.
"އެންމެންގެ ހާލުރަގަޅުތަ؟"ސަކީނާ ވާހަކަދައްކަމުން ހިނގައިގަތީ ބަދިގެއާއި ވީ ދިމާލަށެވެ.
"އަލްބަން ބޮލަށް އަނިޔާވެގެން.."
"ހެމެރެޖްވެފައި ކަން ނޭގޭ. ސީޓީ ސްކޭނެއް ހަދަން ގެންދެބަލަ ދޮންބެ.."ޖޫރީ ހީގަތެވެ."ބޯޅައިން ނުވެސް ޖެހޭ. ހީ ޕްރިޓެންޑެޑް ޓު ބީ ސިކް މަންމަގެ ޕިޓީ ހޯދަން...އެކްޓިންއޭ..ނޫންތަ އަލް..އިސްތަށްޓެއްގައިވެސް ބޯޅަނުޖެހޭ. މިބުނީ ދޮގެއްތަ؟"
"ދައްތައަށް އެނގޭތަ؟ ރޭގައި ވަރަށް ނުބައި ހުވަފެނެއް ފެނިއްޖެ..."ސަކީނާ ބަދިގެއިން ގެނައި ކެރެޓް ހަލްވާއާއި ޕިއްޒާފޮތި އަދި ޖޫސްތަށި ހިފައިގެން ސޯފާގައި ވެޑުވިގަތެވެ.
"ނުބައި ހުވަފެން ކިޔާ ނުދިނިއްޔާ ރަަގަޅުވާނީ..."
"އެހާ ނުބައި ހުވަފެނެއްނޫން. ކަޅުފެންގަނޑެއް ފެނުނީ. ޗަކަވެފައި އޮތީ. އެއީ ރަގަޅު ހުވަފެނެއްނޫން..އެވަރު އެނގޭ..ކަނާތު ލޯވެސް އެބަތަޅުވާ. ކޮންމެވެސް ނުބައިކަމެއްވާން އުޅެނީ........."
"ދައްތާ. ސުޕަސްޓިޝަސްވާކަށް ނުވާނެޔޯ..."އަލްބަން ކުޑަކޮށް އެސްފިޔަތަޅުވައިލިއެވެ."އައި ހޯޕް މަރުވަނީ އަޅުގަނޑަށް ނުވާނެކަމަށް..ނުބައި ކަމަކަށް އޮންނާނީ މަރުދޯ....."
"އެނޫނަސް ދުނިޔޭގައި މުސީބާތްތައް ޖެހޭ.."
އެންމެން ވާހަކަދައްކަން ތިބި ގަޑީގައި އައްޒަހްރާގެ މޫނުމަތިން ބަޔާންނުކުރެވޭފަދަ ފިނިކަމަކާއި ހިތްހަމަޖެހުމުގެ ކުލަވަރުފެނުނެވެ. އެންމެން މަޑުމަޑުންގޮސް އަވަދިވުމުން އެކަނިވެރިކަމާއި ފަޅުކަން އޭނަ ވަށާލައިފިއެވެ. އެފަދަ ވަގުތުތަކުގައި އޭނަގެ އެކުވެރިޔަކީ ފޮތްތަކެވެ. ފޮތްތައް ކިތަންމެ ގިނައިން ކިޔެވިޔަސް ވަރުބަލިކަމެއް ފޫހިކަމެއްނެތެވެ. އައްޒަހްރާ ތެދުވެގެންގޮސް ފޮތް ހަރުގަނޑުގެ ކައިރީގައި ހުއްޓުނެވެ. އޭނަ ކިޔަވާ ގުރުއާން ފޮތްގޮނޑީގައި ބާއްވައިގެން ބަގަރާ ސޫރަތުން ދަސްވި ހިސާބު ފާހަގަކޮށް ކިޔަވަންފެށުމުން އެކަނިވެރިކަން ފިލިއެވެ.
***
ރަމަޟާންމަހު އުމްރާދަތުރުގައި ދާހިތުން އައްޒަހްރާ ދަރިންނާއި ވާހަކަދެއްކުމުން އެކީގައި ދެވޭނެ ކުއްޖަކު ނެތުމުން ދަތުރު ކެންސަލްކުރަން ޖެހުނެވެ. އުމްރާދަތުރު ގްރޫޕްތަކުގެ ވާހަކަތައް އަލްބާން ކިޔާދީފައިވާތީ އެކަމާއިމެދު އެރޭ ވިސްނާފައި އައްޒަހްރާއަށް މޮޅު ޚިޔާލެއް އައެވެ. އަމިއްލަ ގްރޫޕެއް ހަދައިގެން މީހުން އުމްރާއައި ހައްޖަށް ގެންދިޔުމުން އެކުރެވެނީ ދެެދުނިޔެއަށްވެސް ފައިދާ ހުރި ވިޔަފާރިއެކެވެ. އަލްބާން ފަދަ ދަތުރުުކުރާހިތުން އުޅޭ ކުއްޖަކަށް އެފަދަ މަސައްކަތެއް ރަގަޅުވެދާނެއެވެ. އައްޒަހްރާ ފަތިސްނަމާދަށް ތެދުވެފައި ހުރިހާކުދިންގެ ކޮޓަރީގައި ޓަކިދިނެވެ. އެތެރެއިން ޚަބަރެއް ހިލަމެއްނުވިއެވެ.
އިރުއަރަންދެން ޒިކުރުކުރުމާއި ގުރުއާން ކިޔެވުމުގައި އިނުމަށްފަހު ޟުހާ ނަމާދުވެސް ކޮށްލިއެވެ. ވެލްވެޓް މެންޝަންގެ ހަތަރުފާރުން އެތެރޭގައި އާދައިގެ މަތިން ދުވަސް ފެށިއެވެ. ބަދިގޭގައި ބިލާލް ކުރާ މަސައްކަތް ބަލަން ހުރެފައި ނިކުމެ ފެންޑާގައި ފޮތް ކިޔަން އިންދާ ޒަވިއާރުއާއި މުރުތަސިމް ޑިއުޓީއަށް ދާންވެގެން ތެދުވުނެވެ. ޖޫރީގެވެސް ސްކޫލް ގަޑިޖެހެނީއެވެ. ހޭނުލެވުނީ އަލްބާންއަށެވެ.އެންމެން އެކީގައި ނާސްތާކުރިއެވެ. އައްޒަހްރާ ގަސްތަކަށް ފެންދިނެވެ. ކުދިން ގެއަށް އަންނަންވާއިރަށް ފޮނި އެއްޗެއް ތައްޔާރުކުރަން ފެށީ ވަގުތު ދުއްވައިލުމަށެވެ.
އަލްބާން ނިދިން ހޭލިގޮތަށް މޫނު ދޮވެލައިގެން މިސްރާބުޖެހީ ބަދިގެއަށެވެ. ހުދު ޓީޝާޓަކާއެކު ސޯޓެއްލައިގެން ތުވާލި ކޮނޑުމައްޗަށް އެއްލާލާފައި އޮތްއިރު އިސްތަށިގަނޑުވެސް އޮތީ ކުޑަކޮށް ތެމިފައެވެ.
"އަދި ކިރިޔާ ހޭލީ؟ކޮންއިރެއް މަންމަ ގޮވާތާ؟ފަތިސް ނަމާދަށް އެރިންތަ؟"
"އާހް....."އަލްބާންއަށް ބޮލުގައި ހިފަހައްޓައިލެވުނެވެ."މަންމާ އިރުއަރާއިރަށް ނޯ ލެކްޗާ ޕްލީޒް............."
"މަންމަ އަލްބާންއާއި ވާހަކައެއް ދައްކަން ބޭނުންވެގެން ކޮންއިރެއް ހުންނަތާ...."
"ވިޔަފާރީގެ ވާހަކަ....ނޫނީ...."އަލްބާން ލޯ ކުޑަކޮށްލިއެވެ."ކޮބާ ބަދިގޭގައި އުޅޭ މަންޖެ....ބިލާލް.........ގެނޭ ކޮފީ..."
ބިލާލް ރޯޅިއެއްހާ ބާރުމިނުގައި ކޮފީޖަގާއި އެހެން ސާމާނުތައް ގެނެސް މޭޒަށް އަރުވާފައި ލޯމަތިން ގެއްލުނެވެ.
އައްޒަހްރާ އުމްރާގްރޫޕްތަކުގެ މަސައްކަތް ހުންނަގޮތައި އެކަމުގެ ފައިދާއާއި ބެހޭގޮތުން ވާހަކަދައްކަންފެށުމާއެކު އެ ދަނީ ކޮންދިމާލަކަށްކަން އޭނަ ދެނެގަތެވެ.
"އަލްބަން ކުރަން ރަގަޅުކަމެއް..."
"ތިކަމާ ވިސްނާނީ..."އަލްބާންގެ ހިތް އެވަގުތުވެސް ގޮތެއް ނިންމިއެވެ. އުމްރާ ދަތުރަކީ ޖަވާހިރުގެ ވިޔަފާރިއަށްވުރެ އެންމެ ތަންފުކެއްވެސް ޝައުގުވެރިވާކަހަލަ ކަމެއްނޫނެވެ. ޓްރެވެލް އެޖެންސީއެއް ނަމަ ތަންކޮޅެއް ރަގަޅުވީސްކަން ނޭގެއެވެ.އޭނަ ކުރާހިތްވާ މަސައްކަތަކީ ނިދުމާއި ގޭމް ކުޅުމެވެ.ކެއުމެވެ. އެކަހަލަ މަސައްކަތެއް ކުރަން ލިބިއްޖެއްޔާ ވެދާނެއެވެ. އަލްބާންގެ ޕޭންކޭކުގައި މޭޕްލް ސިރަޕް ޖަހާދޭން ޖެހުނީވެސް އޭނަގެ މަންމައަށެވެ. އަލްބާންއަށް ވެވެންޏާ އިނގިއްޔެއްގެ ކުރިވެސް ހިއްލާނުލާނެއެވެ.
އައްޒަހްރާ މުޅިންވެސް ދެއްކީ އުމްރާއާއި ހައްޖުގެ ވާހަކައެވެ. އެބިމުގެ ހުރި މާތްކަމުގެ ވާހަކައެވެ.
***
ޒަވިއާރު ޑިއުޓީއިން އައިއިރު ފަހެއްޖަހާ ބޮޑުވެއްޖެއެވެ. އައްޒަހްރާވެސް އަސުރަށްފަހު ސައިބޮއިގެން ގުރުއާން ކިޔަވަން އިންދާ ޒަވިއާރް އެކޮޓަރިއަށް ދިޔައެވެ. މަންމަގެ ލޭގެ ޕްރެޝާ ހުރިވަރު ބަލައިލިއިރު ތަންކޮޅެއް މަތިވުމުން އެތެރެހަށީގެ ޑޮކްޓަރަށް ދައްކާނީކަމުގައި ބުނެލިއެވެ. މަންމަ ގަވާއިދުން ބޭސްކަންތޯ އެހިއެވެ.
"ޒަވިއާރު. މީހަކާއި ނީދެ ހުރެ މުސްކުޅި ތިވަނީ؟ މަންމަ އަންހެންކުއްޖަކު ހޯދަންތަ؟ "
"އަދި ކިޔަވަން ދާން މިއުޅެނީ. އެކަމައި ވިސްނާނީ ފަހުން...މަންމާ..އެވާހަކަ ބުނަން މިއައީ..........."
"ރަގަޅުކަމެއް ތިއީ."
"ސާޖަރީގެ ރޮގުން ކުރިއަށް ދާން އަދި ބޭނުންވާތީ...އެކަމަކު...ލޯނެއް ބޭނުންވޭ. އަމިއްލަގޮތުން އެޕްލައިކޮށްގެން އެމެރިކާއަށް ދާންކަމަށް ނިންމީ..."ޒަވިއާރު މަންމަގެ އަތުގައި ހިފަހައްޓާލައިގެން އިނެވެ. ދަރިފުޅުގެ ލޮލުން ފެނުނު އުއްމީދުގެ ވިދުވަރު ދެމެހެއްޓުމަށް އޭނަ ކޮންމެފަދަ ގުރުބާނީއެއްވެސް ވެދާނެއެވެ. ޒަވިއާރުގެ ކިޔެވުމަށް ލޯނުދޭވަރަށްވުރެ ކުންފުނީގެ ވިޔަފާރި ދަށްވިޔަސް ލޯނެއް ނަގައިގެންވެސް އޭނަ ދަރިފުޅަށް ކިޔަވާދޭނެއެވެ. ހިތާމައަކީ އެހެން ޒުވާންފަދައިން ޒަވިއާރުވެސް ސަރުކާރުން ސްކޮލާޝިޕެއް ލިބެންދެން މަޑުނުކުރުމެވެ. އައްޒަހްރާގެ ބޮލުގައި އެހެން ޒިންމާއެއް އެޅުނީއެވެ.
***
އަލްބާންގެ ކޮޓަރިއަށް ވަދެފައި އައްޒަހްރާގެ ފިޔަވަޅު ހުއްޓުނެވެ.
ނުނިމޭ