03 Nov 2023, 13:03
އައިސީސީ ކްރިކެޓް ވޯލްޑް ކަޕްގެ ސެމީފައިނަލުން ޖާގަ ކަށަވަރު ކުރި ފުރަތަމަ ޓީމަކަށް އިންޑިއާވެއްޖެއެވެ.
އިންޑިއާއިން މި މުބާރާތުގެ ސެމީފައިނަލްގެ ޖާގައެއް ކަށަވަރު ކުރީ ސްރީލަންކާއާ ބައްދަލުކުރި މެޗު ކާމިޔާބުކޮށްގެންނެވެ. އިންޑިއާގެ މުންބާއީގައި ކުޅުނު މިމެޗު އިންޑިއާއިން ކާމިޔާބުކުރީ 302 ލަނޑުގެ ބޮޑު ތަފާތަކުންނެވެ.
އިންޑިއާގެ ފަރާތުން މޮޅު ކުޅުމެއް ފެނުނު މިމެޗުގައި ޓޮސް ދިމާވުމުން ސްރީލަންކާއިން ބޭނުންވީ އެންމެ ފުރަތަމަ ފީލްޑް ކުރާށެވެ. ނަމަވެސް ސްރީލަންކާގެ މިނިންމުން ރަނގަޅު ނިންމުމަކަށް ނުވިއެވެ. މިގޮތުން އިންޑިއާއިން އެންމެ ފުރަތަމަ ކުޅެން އަރާ 50 އޯވަރުގެ ތެރޭގައި އަށް ކުޅުންތެރިން ނުބައިވެގެން 357 ލަނޑު ހެދިއެވެ.
އިންޑިއާ ޓީމަށް އެންމެ ރަނގަޅަށް ކުޅެފައިވަނީ 92 ލަނޑު ހަދައިދިން ޝުބްމަން ގިލްއެވެ. އަދި 49 ވަނަ ސައްތަ ހެދުމާއި މިމެޗުގައިވެސް ވަރަށް ގާތް ކުރި ވިރާތު ކޯލީވަނީ 88 ލަނޑު ހަދައިދީފައެވެ. ހަމަ އެއާއެކު ޝްރެޔާސް އިޔަރު ވަނީ 82 ހަދައިދީފައެވެ. މިއީނިންގްސްގައި ސްރީލަންކާ ޓީމަށް އެންމެ ރަނގަޅަށް އުކާފައިވަނީ 10 އޯވަރު 80 ލަނޑަށް ފަސް ވިކެޓް ނަގައިދިން ދިލްޝާން މަޑުޝަންކާއެވެ.
ޖަވާބުގައި ސްރީލަންކާއިން ކުޅެން އަރާ 19 އޯވަރު ހަތަރު ބޯޅައަށް ހުރިހާ ކުޅުންތެރިން ނުބައިވެގެން ހެދުނީ 55 ލަނޑެވެ. މިމެޗުގެ ފުރަތަމަ ފަސް ވިކެޓް ގެއްލުނު އިރު ހެދިފައިވަނީ އެންމެ ދެ ލަނޑެވެ. ސްރީލަންކާ ޓީމްގެ ފަސް ކުޅުންތެރިން މިމެޗުގައި ނުބައިވެފައިވަނީ އެންމެ ލަނޑެއްވެސް ނުހެދިއެވެ.
ސްރީލަންކާގެ ކުޅުންތެރިންނަށް ރަނގަޅު ކުޅުމެއް ނުދެއްކުނީ މިމެޗުގައި އިންޑިއާގެ އުކުންތެރިންގެ މޮޅު އުކުމުގެ ސަބަބުން ކަމަށް ގިނަ ބަޔަކު ގަބޫލް ކުރެއެވެ. މިގޮތުން މުހަންމަދު ޝާމީ ވަނީ ފަސް އޯވަރު 18 ލަނޑަށް ފަސް ވިކެޓް ނަގާފައެވެ. މިއާއެކު އޭނާވެފައިވަނީ ވޯލްޑް ކަޕްގައި އިންޑިއާއަށް އެންމެ ގިނަ ވިކެޓް ނަގައިދީފައިވާ ކުޅުންތެރިޔާ އަށެވެ. ޝާމީގެ އިތުރުން މުހައްމަދު ސިރާޖުވަނީ ހަތް އޯވަރު 16 ލަނޑަށް ތިން ވިކެޓް ނަގައިދީފައެވެ.
މިކާމިޔާބީ ވެފައިވަނީ ކްރިކެޓް ވޯލްޑް ކަޕްގެ ތާރީޚުގައި އިންޑިއާއަށް ހޯދުނު އެންމެ ތަފާތު ބޮޑު ނަތީޖާއަށެވެ. އަދި މިއާއެކު މިފަހަރުގެ ވޯލްޑް ކަޕުގެ ސެމީފައިނަލުން ޖާގަހޯދި ފުރަތަމަ ޓީމަށް އިންޑިއާ މިވަނީ ވެފައެވެ. އަދި ސްރީލަންކާ މިވަނީ މިފަހަރުގެ ވޯލްޑް ކަޕަށް އަލްވާދައު ކިޔާފައެވެ.