31 Oct 2023, 15:03
އިންތިޚާބީ ރައީސް ޑރ. މުޙައްމަދު މުއިއްޒު ހުވައިކުރައްވާ ހަފްލާއަށް 1،000 އާންމުންނަށް ވަދެވޭ ގޮތް ހަަމަޖެއްސުމަށް ޓަކައި މަސައްކަތް ކުރަމުން އަންނަކަމަށް އިންތިޚާބީ ރައީސްގެ އޮފީހުން މިއަދު ބުނެފިއެވެ.
މީގެ ކުރިން ރައްޔިތުންގެ މަޖިލީހުން ބުނި ގޮތުގައި 3،500 މެހެމާނުންނަށް ދައުވަތު ދޭއިރު، އާންމު ރައްޔިތުންނަށް އެ ހަފުލާއަށް ނުވަދެވެއެވެ. ނަމަވެސް އެއިރު ވެސް މަޖިލީހުން ބުނި ގޮތުގައި އާންމުންނަށް ވަދެވޭނެ އިންތިޒާމެއް ހަަމަޖެހުމަކީ އެކަށީގެންވާ ކަމެކެވެ.
އެއާއެކު މިއަދު އެ ކަމާ ގުޅޭގޮތުން އިންތިޚާބީ ރައީސްގެ އޮފީހުގެ ތަރުޖަމާނު ފިރުޒުލް އަބްދުﷲ ޚަލީލް ވިދާޅުވީ އާއްމުންނަށް ފުރުސަތު ދޭން މަސައްކަތް ކުރަމުން އަންނަ ކަމަށެވެ.
"އޭގެ އިތުރަށް އަޅުގަނޑުމެން މަސައްކަތްކުރަމުން މިދަނީ އިތުރު 1،000 އާންމުންނަށް އާންމުކޮށް ހުޅުވައިލައިގެން ހުވައިކުރުމުގެ ރަސްމިއްޔާތުގައި ބައިވެރިވެވޭނެ ފުރުސަތު ފަހިކޮށްދިނުމަށް. އިރާދަކުރެއްވިއްޔާ އަަޅުގަނޑުމެންނަށް އެ މަގަށް މަސައްކަތްތައް ބައްޓަން ކުރެވިގެން ކުރިއަށް ގެންދެވޭނެ،" ފިރުޒުލް ވިދާޅުވިއެވެ.
ފިރުޒުލް މިއަދު ވިދާޅުވި ގޮތުގައި މިހާރުގެ ރައީސް އިބްރާހިމް މުޙައްމަދު ޞާލިހުގެ ހުވައިކުރުމުގެ ހަފްލާއަށް 17 މިލިއަން ރުފިޔާ ޚަރަދުވެފައިވެއެވެ.
ޑރ. މުއިއްޒާއި އިންތިޚާބީ ނައިބު ރައީސް ހުސައިން މުޙައްމަދު ލަތީފް ހުވާ ކުރައްވާ ރަސްމިއްޔާތަށް 22.9 މިލިއަން ރުފިޔާ ޚަރަދުވާ ކަމަށް ރައްޔިތުންގެ މަޖިލީހުން ވަނީ ބުނެފައެވެ.
އަންނަ މަހުގެ 17 ވަނަ ދުވަހުގެ ހަވީރު ޖުމްހޫރީ މައިދާނުގައި ބާއްވާ އެ ރަސްމިއްޔާތުގެ މަސައްކަތް ޓެންޑާ ބޯޑުން ހަވާލު ކޮށްފައިވަނީ ސިފައިންގެ ވެލްފެއަ ކުންފުނި (ސިވެކް)އާއެވެ.
ހުވާކުރެއްވުމުގެ އިންތިޒާމުތައް ހަމަޖައްސާނީ ޑިރެކްޓަ ޖެނެރަލް އޮފް ޓްރާންސިޝަން އަބްދުއްރަހީމް އަބްދުﷲގެ މަޝްވަރާއާއެކު ރައްޔިތުންގެ މަޖިލީހުންނެވެ.
ޓްރާންސިޝަން ޓީމުން ބުނެފައިވާ ގޮތުގައި، ޑރ. މުއިއްޒު އެދިލައްވަނީ އާންމު ރައްޔިތުންނަށް ވަދެވޭނެހެން އެ ހަފުލާގެ އިންތިޒާމުތައް ހަމަޖެއްސުމަށެވެ.