30 Oct 2023, 17:03
އެންބީއޭ ބާސްކެޓްބޯޅަ މުބާރާތުގައި އެންމެ ފަހުގެ ޗެމްޕިއަން ޑެންވާ ނަގެޓްސް އާއި އޮކްލޮހޯމާ ސިޓީ ތަންޑާ ބައްދަލުކުރި މެޗު ނަގެޓްސްއިން ކާމިޔާބުކޮށްފިއެވެ.
މި މެޗު ނަގެޓްސްއިން ކާމިޔާބު ކުރީ 128 ޕޮއިންޓް 95 ޕޮއިންޓުންނެވެ.
ނަގެޓްސްއިން ވަނީ މި ސީޒަންގައި މިހާތަނަށް ކުޅުނު ތިން މެޗު ވެސް ކާމިޔާބުކޮށްފައެވެ. މެޗުގައި ނަގެޓްސްއަށް އެންމެ ރަނގަޅު ކުޅުމެއް ދެއްކީ 28 ޕޮއިންޓް ހޯދައިދީ 14 ރީބައުންޑް ނަގައިދީ ފަސް އެސިސްޓް ދިން ނިކޮލާ ޔޮކިޗްއެވެ. އަދި، ތަންޑާއަށް އެންމެ ރަނގަޅު ކުޅުމެއް ދެއްކީ 19 ޕޮއިންޓް ހޯދައިދީ ހަތަރު ރީބައުންޑް ނަގައިދިން ޗެޓް ހޯލްމްގްރެންއެވެ.
މި މުބާރާތުގައި ގޯލްޑަން ސްޓޭޓް ވޮރިއާސް އާއި ހިއުސްޓަން ރޮކެޓްސް ބައްދަލުކުރި މެޗު 106 ޕޮއިންޓް 95 ޕޮއިންޓުން ކާމިޔާބުކުރީ ވޮރިއާސްއެވެ.
މި މެޗުގައި ވޮރިއާސްގެ ސްޓެފަން ކަރީ ވަނީ 24 ޕޮއިންޓް ހޯދައިދީ ހަތް ރީބައުންޑް ނަގައިދީ ހަ އެސިސްޓް ކޮށްފައެވެ. އަދި، ރޮކެޓްސްއަށް އެންމެ ރަނގަޅު ކުޅުމެއް ދެއްކީ 19 ޕޮއިންޓް ހޯދައިދީ ފަސް ރީބައުންޑް ނަގައިދީ ހަތް އެސިސްޓް ދިން އަލްޕެރެން ސެންގަމްއެވެ.
މީގެ އިތުރުން އެޓްލާންޓާ ހޯކްސް އާއި މިލްވައުކީ ބަކްސް ބައްދަލުކުރި މެޗު 127 ޕޮއިންޓް 110 ޕޮއިންޓުން ކާމިޔާބުކުރީ ހޯކްސްއެވެ. މި މެޗުގައި ހޯކްސްއަށް އެންމެ ރަނގަޅު ކުޅުމެއް ދެއްކީ 20 ޕޮއިންޓް ހޯދައިދީ ތިން ރީބައުންޑް ނަގައިދީ 11 އެސިސްޓް ދިން ޓްރެއި ޔަންގްއެވެ. އަދި، ބަކްސްއަށް އެންމެ ރަނގަޅު ކުޅުމެއް ދެއްކީ 26 ޕޮއިންޓް ހޯދައިދީ 11 ރީބައުންޑް ނަގައިދީ ތިން އެސިސްޓް ދިން ޖިއާނިސް އެންޓެޓޮކޮއުންޕޯއެވެ.
މި މުބާރާތުގައި މިއަދު ހެނދުނު ކުޅުނު އެހެން މެޗުތަކަށް ބަލައިލާއިރު ފިލަޑެލްފިއާ ސެވަންޓީ ސިކްސާސް އާއި ޕޯޓްލަންޑް ޓްރެއިލް ބްލޭޒާސް ބައްދަލުކުރި މެޗު 126 ޕޮއިންޓް 98 ޕޮއިންޓުން ސެވަންޓީ ސިކްސާސް ކާމިޔަބުކުރިއިރު ސެކްރެމެންޓޯ ކިންގްސް އާއި ލޮސް އެންޖަލިސް ލޭކާސް ބައްދަލުކުރި މެޗު އޯވަ ޓައިމަށް ގޮސް 132 ޕޮއިންޓް 127 ޕޮއިންޓުން ކާމިޔާބުކުރީ ކިންގްސްއެވެ. އަދި، ލޮސް އެންޖަލިސް ކްލިޕާސް އާއި ސެންއެންޓޯނިއޯ ސްޕާސް ބައްދަލުކުރިމެޗު 123 ޕޮއިންޓް 83 ޕޮއިންޓުން ކާމިޔާބުކުރީ ކްލިޕާސްއެވެ.