29 Oct 2023, 11:53
ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތް ކަމުގެ މައްސަލަ ކުރިއަށް ނުގެންދެވި މިއަދަށް އެޖެންޑާ ކުރި ޖަލްސާ ނިންމާލުމުން، އެކަމާ މެދު ހިތްހަމަނުޖެހުން ފާޅުކޮށް އެމްޑީޕީގެ މެންބަރުން އެ މައްސަލަ ސުޕްރީމް ކޯޓަށް ހުށަހެޅެންދެން އިހުތިޖާޖުކުރަން ނިންމައިފިއެވެ.
ރައީސް ނަޝީދުގެ އިތުބާރު ނެތް ކަމުގެ މައްސަލަ އެޖެންޑާކޮށް، މެމްބަރުންނަށް ނޯޓިސް ވެސް ދީފައިވަނިކޮށް ރައީސް ނަޝީދުގެ ކޮއްކޯފުޅު، އަދި މަޖިލީހުގެ ނައިބު ރައީސް އީވާ އަބްދުﷲ ވަނީ މިއަދުގެ ޖަލްސާއަށް ސަލާމް ވިދާޅުވެފައެވެ. އެއާއެކު މަޖިލީހުގެ އަމީންއާންމު ނިންމެވީ މާދަމާގެ ޖަލްސާއަށް ވަޑައިގަންނަވަން އީވާއަށް ދެންނެވުމަށްފަހު މާދަމާއަށް ޖަލްސާ ފަސް ކުރުމަށެވެ.
މީގެ އިތުރުން މި ޖަލްސާގެ ބަހުސްގައި ރައީސް ނަޝީދަށް ޖަވާބުދާރީވުމުގެ 30 މިނެޓު ލިބިފައިވާއިރު އެމަނިކުފާނު ވެސް ޖަލްސާއަށް ހާޒިރުވެފައެއް ނުވެއެވެ.
މަޖިލީހުގެ ގަވާއިދު ބުނާގޮތުން މަޖިލީހުގެ ރައީސްގެ އިތުބާރުގެ މައްސަލަ ކުރިއަށް ދާއިރު މަޖިލީހުގެ ރިޔާސަތުގައި އިންނަވަންވާނީ މަޖިލީހުގެ ނައިބު ރައީސެވެ. މަޖިލީހުގެ ނައިބު ރައީސް ނެތް ހާލަތެއްގައި ދެން އަމަލު ކުރާނެ ގޮތެއް މަޖިލީހުގެ ގަވާއިދަކު ލިޔެފައެއް ނުވެއެވެ.
ނަމަވެސް، މަޖިލީހުގެ ގަވާއިދުގައި ވަނީ އޭގެ ތެރެއިން ގަވާއިދެއްގައި ނެތް ކަމެއް ދިމާވެއްޖެނަމަ ދެން އަމަލު ކުރާނީ ރިޔާސީ ނިޒާމް އޮންނަ ގައުމުތަކުގައި އަމަލު ކުރާ އުސޫލަކުން ކަމަށް ބުނެފައެވެ.
މިއަދު ހެނދުނު 09:30 ނުވަނީސް މަޖިލީހުގެ ޖަލްސާ ނިންމާލިއިރު އަދިވެސް އެމްޑީޕީގެ މެންބަރުން މަޖިލީހުގެ ތަޅުމުގައި އަންނަނީ އެކަމާ ނުރުހުން ފާޅުކޮށް އަޑުއުފުލަމުންނެވެ. އެ މައްސަލަ ހުއްޓުވާ ކަމަށް ބުނެ، އެމްޑީޕީން މައްސަލަ މިއަދު ސުޕްރީމް ކޯޓަށް ހުށަހަޅަން ވަނީ ނިންމައިފައެވެ.
އެމްޑީޕީ މެންބަރުން އިހުތިޖާޖުކުރަމުން ދާއިރު ތަކުރާރުކޮށް ވިދާޅުވަމުން ދަނީ ޖަލްސާ ނުބޭއްވި ދިޔަ ދިޔުމަކީ ރޭވުމެއްގެ ދަށުން ކުރާ ކަމެއް ކަމަށެވެ. އެގޮތުން މަޖިލީހުގެ އަމީންއާންމާއި ކައުންސިލް ޖެނެރަލްގެ އިސްތިއުފާއަށް ވެސް މެންބަރުން ވަނީ ގޮވައިލާފައެވެ.
މިކަމާ ގުޅިގެން އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ރާއްޖެޓީވީގެ ޕްރޮގްރާމެއްގައި ވާހަކަދައްކަވަމުން ވިދާޅުވީ، މަޖިލިސް ގަވާދުގައިވާ ގޮތުން މަޖިލީހުގެ ރައީސް ނުވަތަ ނައިބުރައީސް ނެތް ހާލަތެއްގައި އެހެން މެންބަރަކަށް ރިޔާސަތާ ހަވާލުވެވޭނެ ކަމަށެވެ. އެކަން އެގޮތަށް ކުރެވެން އޮއްވާ މަޖިލީހުގެ ރިޔާސަތަށް މީހަކު ނެތިގެން ޖަލްސާ ނިންމާލުމަކީ އެއްވެސް ހާލެއްގައި ބަލައިގެނެވޭނެ ކަމެއް ނޫން ކަމަށް ރޮޒެއިނާ ވިދާޅުވިއެވެ.
"އަޅުގަނޑުމެންނަށް މާކުރިން ވެސް އެނގޭ މަޖިލީހުގެ ރިޔާސަތަށް އީވާ އަރާވަޑައި ނުގަންނަވާނެކަން،" ރޮޒެއިނާ ވިދާޅުވިއެވެ.
"މަޖިލީހުގެ ރިޔާސަތުން، ރިޔާސަތާ ހަވާލުވާނެ މީހަކު ނުދައްކައިފިނަމަ އަމީންއާންމަށް އެބައޮތް ގަވައިދުގަ ރިޔާސަތާ ހަވާލުވާ ބޭފުޅުންގެ ތެރެއިން ބޭފުޅަކު އައްޔަންކުރުމުގެ ބާރު،"
ރޮޒެއިނާ ވަނީ މިކަމަކީ ނަޝީދާއި އީވާ ރާވައިގެން ކުރައްވާ ކަމެއް ކަމަށް ތުހުމަތުކުރައްވައިފައެވެ.
އެމްޑީޕީގެ ގިނަ މެންބަރުން މަޖިލީހުގައި އަދިވެސް ތިބިއިރު އެ މެންބަރުން ވިދާޅުވާ ގޮތުގައި އެ މައްސަލަ ސުޕްރީމް ކޯޓަށް ހުށަހެޅެންދެން މެންބަރުން ތިއްބަވާނީ މަޖިލީހުގެ ތަޅުމުގައެވެ.
އެމްޑީޕީގެ ކުރީގެ ރައީސް ނަޝީދު ވަކިކުރަން އެމްޑީޕީގެ ޕާލިމަންޓްރީ ގްރޫޕުން ހުށަހަޅާފައިވާ މައްސަލަ ފާސްކުރަން، ތްރީލައިން ވިޕެއް ވެސް އެ ޕާޓީން ވަނީ ނެރެފައެވެ.
ދެވަނަ ފަހަރަށް ނަޝީދުގެ އިތުބާރު ނެތް ކަމުގެ މައްސަލަ ހުށަހަޅާފައިވަނީ އެމްޑީޕީގެ 49 މެންބަރުންގެ ސޮޔާ އެކުގައެވެ. މަޖިލީހުގެ ރައީސްގެ އިތުބާރު ނެތް ކަމަށް ފާސްކުރެވެނީ 43 މެމްބަރުން ވޯޓް ދިނުމުންނެވެ. އެހެންކަމުން އެމްޑީޕީން އިތުބާރުނެތް ކަމުގެ މައްސަލަ ހުށަހަޅާފައި ވަނީ ވެސް ނަޝީދު ވަކިކުރެވޭ ވަރަށް ސޮއި ހަމަކޮށްގެންނެވެ.