28 Oct 2023, 10:41
ޕޯޗުގަލް ތަރި ކްރިސްޓިއާނޯ ރޮނާލްޑޯއަކީ އަދިވެސް ދުނިޔޭގެ އެންމެ މޮޅު ކުޅުންތެރިޔާ ކަމަށް ޕެރިސް ސެއިންޓް ޖާމައިން (ޕީއެސްޖީ)ގެ ކުރީގެ ކޯޗު ކްރިސްޓޮފް ގަލްޓިއޭ ބުނެފިއެވެ.
އުމުރުން 38 އަހަރުގެ ރޮނާލްޑޯ ދަނީ ސައުދީ އަރަބިއާގެ އަލް ނަސްރާއެކު މޮޅު ކުޅުމެއް ދައްކަމުންނެވެ. އެގޮތުން އޭއެފްސީ ޗެމްޕިއަންސް ލީގުގައި 4-3ގެ ނަތީޖާއަކުން ގަތަރުގެ އަލް ދުހައިލް އަތުން އަލް ނަސްރު މޮޅުވި މެޗުގައި ވެސް ރޮނާލްޑޯ ދެ ގޯލު ކާމިޔާބުކުރިއެވެ.
އެ މެޗަށްފަހު އަލް ދުހައިލްއަށް މިހާރު އިރުޝާދުދެމުންދާ ޕީއެސްޖީގެ ކުރީގެ ކޯޗު ގަލްޓިއޭ ވެސް ވަނީ ރޮނާލްޑޯއަށް ތައުރީފުކޮށް ވާހަކަދައްކައިފައެވެ. ގަލްޓިއާ ދެކޭގޮތުގައި ރޮނާލްޑޯއާ ދެކޮޅަށް ނުކުންނަ އިރު، ކުރެވޭނެ މާބޮޑު ކަމެއް ނޯންނާނެއެވެ.
"މެޗުގައި ރޮނާލްޑޯ އެވަނީ ރީތި ދެ ގޯލު ޖަހާފައި. އަހަރެންނަކަށް ނޭނގޭ އޭނާގެ ތައާރަފެއް ދޭނެ ގޮތެއް ވެސް. އުމުރުން 38 އަހަރުގައި ވެސް އޭނާ އެ ދައްކަނީ ތަފާތު މޮޅު ކުޅުމެއް. ރޮނާލްޑޯއަކީ އަދިވެސް ދުނިޔޭގެ އެންމެ މޮޅު ކުޅުންތެރިޔާ،" ގަލްޓިއޭ ބުންޏެވެ.
މީގެ ކުރިން ޕީއެސްޖީގައި ގަލްޓިއާ ވަނީ ރޮނާލްޑޯގެ ވާދަވެރިޔާ، އާޖެންޓީނާ ތަރި ލިއޮނެލް މެސީއަށް އިރުޝާދުދީފައެވެ. މެސީ އާއި ބްރެޒިލް ތަރި ނޭމާ އަދި ފްރާންސް ތަރި ކިލިއަން އެމްބާޕޭއާއެކު މިދިޔަ ސީޒަނުގައި އެންމެ އެދެވޭ ނަތީޖާތައް ހޯދިފައިނުވުމުން ގަލްޓިއާއަށް ވަނީ ގިނަ ޕްރެޝަރުތަކަކާ ވެސް ކުރިމަތިލާން ޖެހިފައެވެ.