27 Oct 2023, 16:54
ޔުއޭފާ ޔޫރޮޕާ ލީގު ގްރޫޕް އީ ގައި އިންގްލިޝް ޕްރިމިއާ ލީގުގެ ލިވަޕޫލާއި ފްރެންޗް ލީގް އާންގެ ޓޮލޫސް ބައްދަލުކުރިމެޗު ލިވަޕޫލުން ކާމިޔާބުކޮށްފިއެވެ.
ލިވަޕޫލްގެ ދަނޑުގައި ކުޅުނު މިމެޗު އެޓީމް ކާމިޔާބުކުރީ ހީކުރި ވަރަށް ވުރެ ފަސޭހަ ކަމާއެކު ފަސް ލަނޑު އެއް ލަނޑުންނެވެ. ލިވަޕޫލްގެ ފަރާތުން މޮޅު ކުޅުމެއް ފެނިގެންދިޔަ މިމެޗުގައި އެޓީމްގެ ފުރަތަމަ ލަނޑު މެޗުގެ ނުވަ ވަނަ މިނެޓްގައި ޖަހާ އެޓީމަށް ލީޑް ނަގާދިނީ ޑިއޮގޯ ޖޮޓާއެވެ. ނަމަވެސް މިލަނޑު ކާމިޔާބު ކުރިތާ ހަތް މިނެޓްފަހުން ޓޮލޫސްއިން ވަނީ ލަނޑެއް ޖަހާ މެޗުގެ ނަތީޖާ ހަމަހަމަ ކޮށްފައެވެ. މިލަނޑު އެޓީމަށް ޖަހާދިނީ ތާއިސް ޑަލިންގާއެވެ.
މިމެޗުގައި ލިވަޕޫލުން ދެވަނަ ފަހަރަށް ލީޑު ނެގީ މެޗުގެ 30 ވަނަ މިނެޓްގައި ވަޓާރޫ އެންޑޯ ޖަހާދިން ލަނޑުންނެވެ. މިއީ އޭނާ ލިވަޕޫލަށް ކާމިޔާބު ކޮށްދިން ފުރަތަމަ ލަނޑެވެ. އަދި މިލަނޑު ޖެހިތާ ހަތަރު މިނެޓް ފަހުން ޑަވިން ނޫނޭޒްވަނީ ލަނޑެއް ޖަހާ ލިވަޕޫލްގެ ލީޑު ފުޅާކޮށްދީފައެވެ.
މި މެޗުގައި ލިވަޕޫލްގެ ހަތަރު ވަނަ ލަނޑު މެޗުގެ 65 ވަނަ މިނެޓްގައި ޖަހާދިނީ ރަޔަން ގްރަވެންބާޗްއެެވެ. އަދި ފަހު ލަނޑު މެޗުގެ އިތުރު ވަގުތުގައި ޖަހާދިނީ ރޭގެ މެޗުގައި ބަދަލު ކުޅުންތެރިއެއްގެ ގޮތުގައި ކުޅެން އެރި މުހަންމަދު ސަލާހްއެވެ.
މިކާމިޔާބީއާއެކު ލިވަޕޫލް މިހާރު މިވަނީ ޔޫރޮޕާ ލީގު ގްރޫޕް އީގައި މިހާތަނަށް ކުޅުނު ތިން މެޗުވެސް ކާމިޔާބުކޮށް ލިބިފައިވާ ނުވަ ޕޮއިންޓާއެކު ގްރޫޕްގެ އެއްވަނައިގާ ހަމަޖެހިލާފައެވެ. އަދި މިމެޗުން ބަލިވުމުން ޓޮލޫސް ވަނީ ތިން މެޗުން ލިބިފައިވާ ހަތަރު ޕޮއިންޓާއެކު ތާވަލްގެ ތިންވަނައަށް ފަހަތަށް ޖެހިލާފައެވެ.
އެއީ ކުރިން ތިންވަނައިގާ އޮތް ޔޫނިއަން ސާންޓް ޖިލޮއިސް އާއި ލާސްކް ރޭ ބައްދަލުކުރިމެޗު ދެ ލަނޑު އެއްލަނޑުން ސާންޓް ޖިލޮއިސް ކާމިޔާބު ކުރުމާއެކު އެޓީމަށް ހަތަރު ޕޮއިންޓް ލިބި ފައިދާ ގޯލަށް ބަލާއިރު ސާންޓް ޖިލޮއިސްއަށް ކުރި ލިބޭތީއެވެ.