27 Oct 2023, 15:51
ޓައިވާނުގެ އަންހެނެއްގެ ކަންފަތުގެ ތެރެއިން އާދަޔާ ޚިލާފު އަޑުތަކެއް އިވޭތީ، ޑޮކްޓަރަށް ދެއްކުމުން އޭނާގެ ވައަތު ކަންފަތުގެ އެތެރެއިން ކުޑަ ވާމަކުނެއް ފެނިއްޖެއެވެ.
އުމުރުން 64 އަހަރުގެ އެ އަންހެންމީހާ ޑޮކްޓަރަށް ދެއްކީ ރޭގަނޑު ނިދަން އުނދަގޫވެ، ކަންފަތުގެ ތެރޭގައި އެއްޗެއް އުޅޭހެންނާއި އާދަޔާ ޚިލާފު އަޑުތަކެއް އިވޭހެން ހީވާތީއެވެ.
އޭނާ ދެއްކި ހޮސްޕިޓަލުގެ ޑޮކްޓަރުން ބުނި ގޮތުގައި ކަންފަތުން ވާމަކުނު ނެރެވުނީ ޓިއުބެއް ލައިގެންނެވެ. އޭގެ ސަބަބުން އޭނާގެ ކަންފަތުގެ އެތެރެއަށް އަނިޔާއެއް ވެފައިނުވާކަމަށް ޑޮކްޓަރުން ފާހަގަކުރިއެވެ.
މިހާދިސާއާ ގުޅިގެން ޓައިނާން މުނިސިޕަލް ހޮސްޕިޓަލުން ނެރެފައިވާ ބަޔާނެއްގައި ބުނެފައިވަނީ، އެ އަންހެން މީހާގެ ކަންފަތުގެ އެތެރެއިން ވާމަކުނާއި، މަކުނުގެ ހުރިހާ ބައިތަކެއް ނެރެވި ސާފުކުރެވިފައިވާކަމަށާއި، އަންހެން މީހާގެ ހާލު ރަނގަޅުކަމަށެވެ.
އެ ހާދިސާއާ ބެހޭ ގޮތުން ނިއު އިންގްލެންޑް ޖާނަލް އޮފް މެޑިސިންގައި ލިޔެފައިވާއިރު، އެމެރިކާގައި މީގެ ކުރިން ވެސް އެފަދަ ހާދިސާތައް ހިނގާފައިވާ ކަމަށް އެގައުމުގެ ޑޮކްޓަރުން ބުނެފައިވެއެވެ. އެގޮތުން ކަންފަތުން މަދިރިއާއި ކުރަފި ވެސް މީގެ ކުރިން ފެނިފައިވާ ކަމަށް އެ ޖާނަލްގައިވެއެވެ.