21 Oct 2023, 12:41
ފަލަސްތީނުގެ އިތުރު ހޮސްޕިޓަލަކަށް ބޮން އަޅާނެ ކަމުގެ އިންޒާރު ޔަހޫދީ އިސްރާއީލުން ދީފިއެވެ.
ފަލަސްތީނުގެ ރެޑް ކްރެސެންޓު ސޮސައިޓީއާ ހަވާލާދީ ތުރުކީވިލާތުގެ އަންކަރާ ނޫހުން ރިޕޯޓުކޮށްފައިވާ ގޮތުގައި އިސްރާއީލުން ބޮން އަޅާނެ ކަމަށް އިންޒާރު ދީފައި ވަނީ ފަލަސްތީނުގެ އަލް ގުދުސް ހޮސްޕިޓަލަށެވެ.
އެ ހޮސްޕިޓަލުގައި ގެދޮރު ދޫކޮށް ގޮސްފައިވާ ގިނަ އަދަދެއްގެ އަންހެނުންނާއި ކުޑަކުދިން މިވަގުތު ތިބިއިރު، އިޒްރޭލުން ވަނީ އެ ހޮސްޕިޓަލުން މީހުން މުޅިން ހުސްކުރަން އަންގާފައެވެ.
އެކްސް ގައި ކުރި ޕޯސްޓެއްގައި ރެޑް ކްރެސެންޓުން ބުނީ ގެދޮރުގެއްލިފައިވާ 1200 އަށްވުރެ ގިނަ މީހުން އަލް ގުދުސް ހޮސްޕިޓަލްގައި އެބަ ތިބި ކަމަށެވެ. އޭގެތެރެއިން 70 އިންސައްތަ މީހުންނަނީ ކުޑަކުދިންނާއި އަންހެނުން ކަމަށްވެސް އެ ޖަމާއަތުން ބުނެއެވެ.
"އިސްރާއީލުން ހަމަލާދީފިނަމަ، މިތަން ވާނީ އަޅިއަށް" ރެޑް ކްރެސެންޓު ބުންޏެވެ.
ފަލަސްތީނުގެ ރެޑް ކްރެސެންޓް ސޮސައިޓީން ވަނީ އިޒްރޭލުން ދޭ މިފަދަ އިންޒާރުތައް ހުއްޓުވުމުގެ ގާބިލުކަން ހުރި ދުނިޔޭގެ ގަދަ ބާރެއް ނެތީތޯ ސުވާލު އުފައްދާފައެވެ. އަދި މިކަން ސީރިއަސްކޮށް ނަގައި ފިޔަވަޅު އެޅުމަށާއި ނޫން ނަމަ ގާޒާގެ އަލް އަހްލީ ހޮސްޕިޓަލުގައި ހިނގި ފަދަ ހާދިސާއެއް ހިނގުމުގެ ބިރު އެބައޮތް ކަމަށްވެސް އެ ޖަމިއްޔާއާ ހަވާލާދީ އަންކާރާ ނޫހުން ރިޕޯޓުކުރެއެވެ.
އިސްރާއީލުން ބޮން އެޅި އަލް އަހްލީ އަރަބި ހޮސްޕިޓަލް : ފޮޓޯ/ފަލަސްތީނު ކްރޮނިކަލް
އިސްރާއީލުން މިދިޔަ ހަފުތާވެސް ވަނީ ފަލަސްތީނުގެ އެންމެ ގިނަ ދުވަސްވީ، އަލް އަހްލީ އަރަބި ހޮސްޕިޓަލަށް ބޮން އަޅައި 800 އެއްހާ މީހުން ޝަހީދުކޮށްލާފައެވެ.