19 Oct 2023, 12:10
އުމުރުން 41 އަހަރުވަންދެން ޕޯޗުގަލް ތަރި ކްރިސްޓިއާނޯ ރޮނާލްޑޯއަށް އެންމެ މަތީ ފެންވަރުގައި ފުޓުބޯޅަ ކުޅެވޭނެ ކަމަށް އޭނާއާއެކު މެންޗެސްޓާ ޔުނައިޓެޑަށް ކުޅުނު ފޯވަޑް ޑިމިޓާ ބާބަޓޯވް ބުނެފިއެވެ.
މިހާރު އުމުރުން 38 އަހަރު ފުރިފައިވީ ނަމަވެސް، ރޮނާލްޑޯގެ ފަރާތުން އޭނާ ރިޓަޔާކުރަން ޖެހޭ ސަބަބެއް ފެނިގެންނެއް ނުދެއެވެ. ޔޫރޯ ކޮލިފައިންގައި މިދިޔަ ހުކުރު ދުވަހު ސްލޮވާކިއާއާ ދެކޮޅަށް ކުޅެ، 3-2ގެ ނަތީޖާއަކުން މޮޅުވި މެޗުގައި ވެސް ޕޯޗުގަލް ކެޕްޓަން ރޮނާލްޑޯގެ ދެ ގޯލެއް ފެނިގެންދިޔައެވެ. އެ މޮޅާއެކު ޕޯޗުގަލަށް ވަނީ އަންނަ އަހަރު ބާއްވާ ޔޫރޯގެ ޖާގައެއް ކަށަވަރުވެފައެވެ.
ކްލަބު ލެވެލްގައި ސައުދީ އަރަބިއާގެ އަލް ނަސްރަށް ވެސް ރޮނާލްޑޯ ދަނީ މޮޅު ކުޅުމެއް ދައްކަމުންނެވެ. އެގޮތުން އޭނާ ވަނީ އަލް ނަސްރަށް 17 ގޯލު ކާމިޔާބުކޮށްދީފައެވެ. ބާބަޓޯވް ބުނެފައިވާ ގޮތުގައި، ރިޓަޔާކުރަން ޖެހޭ ފަދަ ކަމެއް ރޮނާލްޑޯގެ ފަރާތުން ނުފެނެއެވެ.
"ރޮނާލްޑޯ ކުޅުން ހުއްޓާލާނީ އޭނާ ބޭނުންވެއްޖެ އިރެއްގައި. އަމިއްލަ ހަށިގަނޑަށް އެވަރަށް ވިސްނާ ކުޅުންތެރިޔަކު އެހާ އަވަހަށް ރިޓަޔާކުރާކަށް ނުވިސްނާނެ. އަހަރެންނަށް ހީވަނީ އަދި ރޮނާލްޑޯ ދެތިން އަހަރު އެންމެ މަތީ ފެންވަރުގައި ފުޓުބޯޅަ ކުޅޭނެހެން،" ޔުނައިޓެޑުގެ އެންމެ ކާމިޔާބު ދުވަސްވަރު ރޮނާލްޑޯއާއެކު ކުޅުނު ބާބަޓޯވް ބުންޏެވެ.
ބާބަޓޯވް ބުނީ ރޮނާލްޑޯ ކުޅެނީ ދަށް ލީގެއްގައި ކަމަށް ބައެއް މީހުން ބުނަމުންދިޔަޔަސް، އެއީ ބަލަންޖެހޭ ކަމެއް ނޫން ކަމަށާއި އޭނާ އަދިވެސް ޕޯޗުގަލަށް ދައްކަމުންދަނީ ވަރުގަދަ ކުޅުމެއް ކަމަށެވެ. އަދި މޮޅު ކުޅުމާއެކު ގޯލުތަކެއް ޖަހައި، ޔޫރޯއަށް ޕޯޗުގަލް ކޮލިފައިކޮށްދިނުމުގައި ރޮނާލްޑޯ އެހީތެރިކަން ފޯރުކޮށްދީފައިވާ ކަމަށްވެސް އޭނާ ބުންޏެވެ.
"ކޮންމެވެސް ދުވަހަކުން ރޮނާލްޑޯގެ އެންމެ ފަހު މުބާރާތް އަންނާނެ، އެކަމަކު މިވަގުތު އެކަމާ ވިސްނަން ނުޖެހޭ. އޭނާ އެ ނިންމުން ނިންމަންދެން އަހަރެމެން މަޑުކުރަން ޖެހޭ، އެއީ ހައިރާންކުރަނިވި ނިންމުމަކަށް ވެގެންދާނެ. އަހަރެމެން އިސްކަން ދޭންވީ މިވަގުތު ރޮނާލްޑޯ އެ ދައްކާ ވަރުގަދަ ކުޅުން ބެލުމަށް،" ބާބަޓޯވް ބުންޏެވެ.
ރިޕޯޓުތައް ބުނާގޮތުގައި ރޮނާލްޑޯ އަލް ނަސްރަށް 2027 ވަނަ އަހަރުގެ ނިޔަލަށް ކުޅުމަށް ބޭނުންވެއެވެ. އެހެންކަމަށް ވެއްޖެ ނަމަ، ކުރިއަށްއޮތް ޔޫރޯގެ އިތުރުން ވޯލްޑް ކަޕް 2026 އިން ވެސް ރޮނާލްޑޯ ފެނުން އެކަށީގެންވެއެވެ.