16 Oct 2023, 13:06
މި އަހަރުގެ މި މަހާ ހަމައަށް ރާއްޖެއަށް ދެވަނައަށް އެންމެ ގިނަ ފަތުރުވެރިން ޒިޔާރަތްކުރީ ޗައިނާއިން ކަމަށް ތަފާސްހިސާބުތަކުން ދައްކައިފިއެވެ.
ޓޫރިޒަމް މިނިސްޓްރީއިން އާންމުކުރި ތަފާސްހިސާބުތަކުން ދައްކާ ގޮތުގައި ރާއްޖެއަށް ޗައިނާ މާކެޓް ޝެއާގައި %11ގެ ކުރިއެރުމެއް މި މަހު ހާސިލްކޮއްފައިވެއެވެ.
ޗައިނާ އަކީ 2019 ވަނަ އަހަރާއި ހަމައަށް ރާއްޖެއަށް އެންމެ ގިނަ ފަތުރުވެރިން އައި މާކެޓެވެ.
ކޮވިޑްގެ ކުރިން، 2019 ވަނަ އަހަރު ޗައިނާއިން 284،029 ފަތުރުވެރިން އައިސްފައިވެއެވެ. މިއީ އެ އަހަރު ރާއްޖެ ޒިޔާރަތްކުރި ފަތުރުވެރިންގެ 16.7 ޕަސެންޓު ހިއްސާއެވެ.
ވީއައިއޭ، ފަތުރުވެރިން، ޓޫރިސްޓުން
ކޮވިޑް ދުވަސްވަރު 2020 ވަނަ އަހަރުގެ މާޗު މަހު ޗައިނާގެ ބޯޑަރު ބަންދުކުރުމާ ގުޅިގެން ޗައިނާ ފަތުރުވެރިންގެ އަދަދު ވަރަށް ބޮޑަށް ދަށަށް ދިޔައެވެ. އަދި، ތިން އަހަރަށް ފަހު މި އަހަރު އަލުން ބޯޑަރު ހުޅުވާލުމާ ހަމައަށް ވެސް ޗައިނާ ފަތުރުވެރިންގެ އަދަދު ދިޔައީ ދަށަށެވެ.
ޗައިނާއިން ރާއްޖެއަށް ސީދާ ދަތުރުތައް އަލުން ފަށާފައިވަނީ މި އަހަރުގެ ޖެނުއަރީ 18 ގައެވެ. މި އަހަރުގެ ޖުލައި މަހުގެ ނިޔަލަށް ޗައިނާއިން ޖުމްލަ 92،391 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ.
މިދިޔަ މަހު ރާއްޖެއަށް 130،967 ޒިޔާރަތްކޮށްފައިވާއިރު، މި މަހުގެ މިހާތަނަށް 51،000 އަށް ވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ.
އަހަރުގެ މިހާތަނަށް 1.4 މިލިއަން ފަތުރުވެރިން ޒިޔާރަތްކޮށްފައިވާއިރު، މިހާތަނަށް އެންމެ ގިނަ ފަތުރުވެރިން ޒިޔާރަތް ކުރި ރަޝިއާގެ 162،441 ފަތުރުވެރިން ވަނީ ޒިޔާރަތްކޮށްފައެވެ. ދެވަނައަށް ޗައިނާގެ 154،927 ފަތުރުވެރިން ވަނީ ޒިޔާރަތްކޮށްފައެވެ. ތިންވަނައަށް އެންމެ ގިނަ ފަތުރުވެރިން ޒިޔާރަތްކުރި އިންޑިއާއިން ވެސް ވަނީ 154،016 ފަތުރުވެރިން ޒިޔާރަތްކޮށްފައެވެ.
ޓޫރިޒަމް މިނިސްޓްރީން ބުނީ ޗައިނާއިން ދަތުރުފަތުރަށް ހުޅުވާލި ފަހުން މިދިޔަ ހައެއްކަ މަސް ދުވަހުގެ ތެރޭގައި ޗައިނާ ފަތުރުވެރިންގެ އަދަދު ދަނީ ވަރަށް ހަލުވިކަމާ އެކު ކުރިއަރަމުން އަންނަކަމަށެވެ. އަދި، ޕްރީ ޕެންޑެމިކް ލެވެލަށް އަވަސް ފުރުސަތެއްގެ ތެރޭގައި ހާސިލް ކުރާނެ ކަމުގެ އުންމީދު އާވެފައިވާ ކަމަށް އެ މިނިސްޓްރީން ވަނީ ބުނެފައެވެ.