09 Oct 2023, 08:46
އެއްކާފު ޕްރޮޑަކްޝަން ސްޓޫޑިއޯގެ ވަރުގަދަ އިންވެސްޓިގޭޝަން ތުރިލާ ޝޯ "ގަރީނާ" ދައްކަން ފަށައިފިއެވެ.
މީޑިއާނެޓް އޮރިޖިނަލް ޝޯ ދާދި ފަހުން ޕްރިމިއާ ކޮށްފައިވާއިރު މި ޝޯގެ ފުރަތަމަ ދެ އެޕިސޯޑު މިހާރު ސްޓްރީމް ކޮށްލަން ލިބޭނެއެވެ. އަދި، މި ދެ އެޕިސޯޑު ހިލޭ ބަލާލެވޭނެއެވެ.
އިންްވެސްޓިގޭޝަން ތްރިލާއެއްގެ ގޮތުގައި ތައްޔާރުކޮށްފައިވާ މި ވާހަކައިގައި ދައްކުވައިދޭނީ އިންވެސްޓިގޭޓިވް ނޫސްވެރިއެއް ކަމަށްވާ ޝިމްލާ ރާއްޖޭގެ ރަށަކަށް ގޮސް މަރުގެ ކޭހެއް ތަހުގީގު ކުރަން އުޅޭތަނެވެ. ނޫސްވެރިކަމުގެ ދާއިރާއިން އެކި ކަހަލަ އެވޯޑުތައް ލިބިފައިވާ ޝިމްލާ އަތޮޅުގެ ރަށަކަށް ދަނީ ކުޑަ ކުއްޖެއްގެ މަރާ ގުޅިގެން އެކަމުގެ ހަގީގަތް ހޯދުމަށެވެ.
ޝިމްލާގެ ދަތުރުގައި ޕޮލިސް އިންވެސްޓިގޭޝަން އޮފިސަރެއް ކަމަށްވާ ރިލްވާން އެހީތެރިވެދެއެވެ. ނަމަވެސް ކޭހުގެ މައުލޫމާތު އެއްކުރަމުންދާ މިންވަރަކަށް މިއީ ޝިމްލާގެ ކެރިއަރުގައި ވެސް އެންމެ އުނދަގޫ މަސައްކަތަކަށް ވާން ފަށައެވެ. އަދި، ކޮންމެ ހަގީގަތަކާ އެކު އިތުރު ސިއްރުުތަކެއް ތެރެއަށް ޝިމްލާ ދަތުރު ކުރާ މަންޒަރު މި ޝޯއިން ފެންނާނެއެވެ.
ޝިމްލާގެ ރޯލުން މި ޝޯގައި ފެނިގެންދާނީ މަރިޔަމް މަޖުދާއެވެ. ޝޯގެ އިތުރު ރޯލުތަކުން ފެނިގެންދާނީ މުހައްމަދު ފައިސަލް އާއި އަލީ ފާރޫގް އާއި އަލީ މުޝަރައްފުގެ އިތުރުން އައިޝާ އަލީ އާއި މަރިޔަމް ހަމީދާއި އަންޝާމް މުހައްމަދާއި މަރިޔަމް ވަހީދު އަދި އަލީ ޝަޒްލީމެވެ.
މުހައްމަދު ފައިސަލް ޑައިރެކްޓުކުރާ މި ޝޯ ލިޔެފައިވަނީ އަހުމަދު ޒަރީރެވެ. ހަސަން ޝާޒިލް އާއި އަހްމަދު ޒަރީރު ޕްރޮޑިއުސް ކުރާ މި ޝޯގެ ސިނެމެޓޮގްރަފީގެ މަސައްކަތް ކޮށްފައިވަނީ އިބްރާހީމް ޝުޖާއު (ޖަންކީ)އެވެ.