07 Oct 2023, 15:13
ޣައްޒާގައި ވެރިކަން ކުރާ ހަމާސް ޖަމާއަތާއި އިޒްރޭލުން ހަނގުރާމަ އިއުލާންކޮށް، އެއް ފަރާތުން އަނެއް ފަރާތަަށް ވަރުގަދަ ހަމަލާތައް ދޭން ފަށައިފިއެވެ.
މިއަދު ހަމާސްއިން ވަނީ އެ ޖަމާއަތުން ފަހުގެ ތާރީޚެއްގައި ކުރިއަށްގެންގޮސްފައި ނުވާ ފަދަ ބޮޑު އަސްކަރީ އޮޕަރޭޝަނެއް ކުއްލި ގޮތަކަށް ފަށާފައެވެ. 'އޮޕަރޭޝަން އަލް އަގްސާ ފްލަޑް'ގެ ނަން ދީފައިވާ އެ ހަމަލާތަކުގެ ތެރެއިން މިއަދު ހެނދުނުން ފެށިގެން ޣައްޒާއިން އިޒްރޭލަށް ރޮކެޓް ހަމަލާތައް ދީފައިވެއެެވެ.
ހަމާސްއިން ވަނީ މިހާތަނަށް 5،000އަށް ވުރެ ގިނަ ރޮކެޓް ފޮނުވާފައިވާ ކަމަށް ބުނެފައެވެ.
އަލްޖަޒީރާއާ ވާހަކަދައްކަމުން ހަމާސްއިން ބުނީ އެ އޮޕަރޭޝަން ފެށީ، އިޒްރޭލުން ފަލަސްތީނުގެ ރައްޔިތުންނާ މެދު އަމަލުކުރަމުންދާ އިހާނެތި ގޮތްތަކަށް ރައްދު ދިނުމަށް ކަމަށެވެ.
ހަމާސްއިން ބަޔަކު ރަހީނުކޮށްފައިވޭތޯ އަލްޖަޒީރާއިން ސުވާލުކުރުމުން އެ ޖަމާއަތުން ވަނީ ބަޔަކު ރަހީނުކޮށްފައި ނުވާ ކަަމަށާއި ނަމަވެސް "ހަނގުރާމައިގެ އަސީރުންތަކެއް" އެމީހުންގެ ބެލުމުގެ ދަށުގައި ތިބި ކަމަށެވެ. އަދި ފަލަސްތީނުގެ ބިންތަކުގައި ތިބި އިޒްރޭލުގެ މީހުންނަކީ ގާނޫނަށް ޚިލާފަށް އެ ބިމަށް އަރާފައި ތިބި މީހުން ކަމަށާއި އެހެންކަމުން މިއީ އެފަދަ މީހުންނާ ދެކޮޅަށް ފަށާފައިވާ ހަނގުރާމައެއް ކަމަށް ހަމާސްއިން ބުންޏެވެ.
އިޒްރޭލުން ޣައްޒާއެއް ދިން ހަމަލާއެއް -- ފޮޓޯ/ ރޮއިޓާސް
އެ ހަމަލާތަކަށް ރައްދު ދިނުމަށް އިޒްރޭލުގެ އަސްކަރިއްޔާއިން ވަނީ 'އޮޕަރޭޝަން އަޔަން ސްވޯޑްސް'ގެ ނަމުގައި އޮޕަރޭޝަނެއް ފަށައިފައެވެ. އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަނީ މިއީ ހަނގުރާމައެއް ކަމަށާއި މޮޅުވާނީ ވެސް އެގައުމު ކަމަށް ވިދާޅުވެފައެވެ.
އެ ހަމަލާތަކާ ބެހޭ ގޮތުން ރޮއިޓާސް ނޫހާ ވާހަކަދައްކަވަމުން ފަލަސްތީނުގެ ރައީސް މަހުމޫދު އައްބާސް ވިދާޅުވީ، ފަލަސްތީނުގެ ބިން ހިފަން މަސައްކަތް ކުރާ ސިފައިންނާއި ބިންތަކަށް ވެރިވެގަނެގެން އުޅޭ މީހުންގެ ފަރާތުން ދިފާއު ވުމަކީ ރައްޔިތުންނަށް ލިބިގެންވާ ހައްގެއް ކަމަށެވެ.
އިޒްރޭލުގެ އެމާޖެންސީ ސާވިސެސްއިން ވަނީ ހަމަލާތަކުގައި މިހާތަނަށް 22 މީހަކު މަރުވެފައިވާ ކަމަށް ބުނެފައެވެ.
އިޒްރޭލާއި ފަލަސްތީނުގެ އޮފިޝަލުން ވިދާޅުވާ ގޮތުގައި މި އަހަރު ތެރޭގައި، ހަމާސް އާއި އިޒްރޭލުން ދީފައިވާ ހަމަލާތަކުގައި އިޒްރޭލުން 32 މީހަކު މަރުވެފައިވާ އިރު ފަލަސްތީނުން މަރުވި މީހުންގެ އަދަދު 247އަށް އަރައެވެ. އޭގެ ތެރޭގައި ހަނގުރާމަވެރިންގެ އިތުރުން އާންމު ރައްޔިތުން ހިމެނެއެވެ.
ހަމާސްއިން 2007 ވަނަ އަހަރު ޣައްޒާގެ ވެރިކަމަށް އައި ފަހުން، އިޒްރޭލުން ވަނީ އެ ސަރަހައްދު ބަންދުކޮށް، މީހުން އެތެރެވުމާއި ބޭރުވުމުގެ އިތުރުން ކާބޯތަކެއްޗާއި ބޭސް ފަދަ ޒަރޫރީ ތަކެތި އެތެރެކުރުމަށް ވެސް ވަރަށް ބޮޑަށް ހުރަސް އަޅާފައެވެ.