06 Oct 2023, 22:54
ރާއްޖޭގައި އޭލެވެލް ހަދާ ދަރިވަރުންނަށް ދޭ އެޑެކްސެލް އިމްތިހާނު، ކެމްބްރިޖް އިމްތިހާނަށް ބަދަކުރުން ފަސްކޮށް، މިބުރުގެ އޭލެވެލް ހަދާ ދަރިވަރުންނަށް އެޑެކްސެލްއަށް ކިޔަވައިދޭން ފަށައިފިއެވެ.
މީގެ ކުރިން މިދިޔަ އަހަރު ފަހު ކޮޅު އެޑިއުކޭޝަން މިނިސްޓަރު އައިޝަތު އަލީ ވަނީ އޭލެވެލް ހަދާ ދަރިވަރުންނަށް ދޭ އެޑެކްސެލް އިމްތިހާނު، ކެމްބްރިޖް އިމްތިހާނަށް ބަދަލުކުރަން ނިންމަން މަސައްކަތް ކުރަމުންދާ ކަމަށް ވިދާޅުވެފައެވެ.
އެހެންނަމަވެސް މިދިޔަ މަހު ފެށި 2024-2025 ވަނަ އަހަރުގެ އޭލެވެލް ދަރިވަރުންނަށް ކިޔަވައިދޭން ފެށީ އެޑެކްސެލް ސިލަބަސްއަށެވެ.
މިކަމާ ގުޅިގެން 'ސަން'އާ ވާހަކަދައްކަވަމުން އެޑިއުކޭޝަން މިނިސްޓްރީގެ ޕާމަނަންޓް ސެކްރެޓަރީ އަހުމަދު އަލީ ވިދާޅުވީ މީގެ ކުރިން އޭލެވެލް ހަދާ ދަރިވަރުންގެ ސިލަބަސް ކެމްބްރިޖަށް ބަދަލުކުރަން ބުނެފައިވީ ނަމަވެސް މިހާތަނަށް އައިއިރު އެއަށް ގޮތެއް ނިންމުން އޮތީ މަޑުޖައްސާލައިފައި ކަމަށެވެ.
އޭނާ ވިދާޅުވީ ވަކި ގޮތެއް ނުނިންމާ މި ފަހަރުގެ އޭލެވެލް ކިޔަވަން ފެށި ދަރިވަރުން ވެސް އެޑެކްސެލްއަށް ކިޔަވައިދޭން ފެށީ ކަމަށެވެ. އަދި، އެއީ މި ވަގުތަށް އެންމެ ރަނގަޅު ގޮތް ކަމަށް ނިންމާފައިވާ ކަމަށް ވެސް ވިދާޅުވިއެވެ.
މީގެ ކުރިން މިނިސްޓަރު ވިދާޅުވީ ކެމްބްރިޖް އިމްތިހާނަށް ބަދަލުކުރުމަށް ނިންމީ އޯލެވެލް އިމްތިހާނު ކެމްބްރިޖަށް ކިޔެވުމަށް ފަހު އޭލެވެލް ވެސް އެ ސިލަބަހަށް ކިޔެވުމުން ފަސޭހަވާނެ ކަމަށެވެ. އެގޮތުން އެއް އެގްޒާމް ބޯޑެއްގައި އޭލެވެލް އަދި އޯލެވެލް ހަދާނަމަ ދަރިވަރުންނަށް ވަރަށް ފަސޭހަވާނެ ކަމަށާއި ސުވާލުތައް ބައްޓަންކޮށްފައިވާ ގޮތާއި އިމްތިހާނު ކަރުދާހުގެ ބައްޓަން އެއް ގޮތަކަށް ހުރުމުން ދަރިވަރުންނަށް ފަސޭހަ ވާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ ކެމްބްރިޖަށް ވުރެ، އެޑެކްސެލްއާ މުއާމަލާތް ކުރަން ވެސް ދަތި ކަމަށެވެ. އެގޮތުން އެޑެކްސެލްއާ ސީދާ މުއާމަލާތް ކުރުމުގެ ފުރުސަތު ނޯންނަ ކަމަށާއި މުއާމަލާތް ކުރަން ޖެހެނީ ލަންކާގައި ހުންނަ އޮފީހެއް މެދުވެރިކޮށް ކަމަށް މިނިސްޓަރު ވިދާޅުވިއެވެ.
ވުމާ އެކު އެ ހުރިހާ ކަމަކަށް ރިއާޔަތް ކުރުމަށް ފަހު އެޑެކްސެލް އިމްތިހާނު، ކެމްބްރިޖް އިމްތިހާނަށް ބަދަލުކުރަން ނިންމީ ކަމަށް މިނިސްޓަރު ވިދާޅުވިއެވެ.
އެ ނިންމުމާ ގުޅިގެން އެޑިއުކޭޝަން މިނިސްޓްރީން އޭރު ބުނެފައިވަނީ ގުރޭޑު 12ގެ ދަރިވަރުންނަށް ކެމްބްރިޖް ސިލަބަހަށް ކިޔަވައިދޭން ފަށާނީ 2024-2025 ވަނަ އަހަރު ކަމަށާއި ކޭމްބްރިޖް އިންޓަނޭޝަނަލް އޭލެވެލް އިމްތިހާނު ބާއްވާން ހަމަޖެހިފައި ވަނީ 2025ގައި ކަމަށެވެ.
ނަމަވެސް އެ ނިންމުމަށް ގޮތެއް ނުނިމި އެ ބެޗުގެ ދަރިވަރުންނަށް އަނެއްކާ ވެސް ކިޔަވައިދޭން ފެށީ އެޑެކްސެލްއަށެވެ.