05 Oct 2023, 20:09
އިންތިޚާބީ ރައީސްގެ މަސައްކަތްތައް ކުރިއަށް ގެންދިއުމަށްޓަކައި، އިންތިޚާބީ ރައީސުލްޖުމްހޫރިއްޔާގެ އޮފީސް، ރައީސް އިބްރާހީމް މުޙައްމަދު ޞާލިހު މިއަދު ގާއިމުކޮށްދެއްވައިފިއެވެ.
ރައީސް އޮފީހުން މައުލޫމާތު ދޭ ގޮތުގައި އެ އޮފީހުގެ ފަރާތުން އިންތިގާލީ މަރުހަލާގެ މަސައްކަތް ވިލަރެސް ކުރައްވާނީ އެ އޮފީހުގެ ސެކްރެޓެރީ، ކޯޕަރޭޓް ސާވިސް، ހުސައިން އާމިރެވެ.
މި މަސައްކަތާ އެކު ސަރުކާރުގެ އިދާރާތައް ހިންގުމަށާއި ސަރުކާރުން ރައްޔިތުންނަށް ދެމުންދާ ޚިދުމަތްތައް ނުހުއްޓޭނެހެން ވެރިކަން ބަދަލުކުރުމުގެ މަސައްކަތް ކުރާނެއެވެ.
އަދި، ސަރުކާރުގެ އިދާރާތަކާ ބެހޭ މުހިންމު މައުލޫމާތު، އިންތިޚާބީ ރައީސަށް ތައްޔާރުކޮށްދޭނެއެވެ.
"ސަރުކާރުގެ އިދާރާތައް ހިންގުމަށް ބުރޫ ނާރާނެ ގޮތެއްގެ މަތީން، އަދި ސަރުކާރުން ރައްޔިތުންނަށް ދެމުންދާ ޚިދުމަތްތަކަށް ހުއްޓުމެއް ނާންނާނެ ގޮތެއްގެ މަތީން، ވެރިކަން ނަޤުލުކުރުމަށްޓަކައި، ސަރުކާރުގެ އިދާރާތަކާބެހޭ މުހިންމު މަޢުލޫމާތު، އިންތިޚާބީ ރައީސުލްޖުމްހޫރިއްޔާއަށް ބޭނުންވެދާނެ ކަމަށްޓަކައި ތައްޔާރުކުރުމަށް ވަނީ އަންގަވާފައެވެ." ރައީސް އޮފީހުން ބުނެފައިވެއެވެ.
އިންތިގާލީ ރައީސްގެ އޮފީސް ގާއިމްކޮށްފައިވާއިރު، އިންތިޚާބީ ރައީސްގެ ފަރާތްޕުޅުން ސަރުކާރު ބަދަލުވުމުގެ މަސައްކަތްތައް ވިލަރެސްކުރުމަށް އިންތިގާލީ ޑިރެކްޓަރު ޖެނެރަލެއްގެ ގޮތުގައި ކަނޑައަޅައިފައިވަނީ ޕީއެންސީގެ ޗެއާޕާސަން އަބްދުއްރަހީމް އަބްދުﷲ (އަދުރޭ)އެވެ. އިންތިގާލީ ސްޕޯކްސްޕާސަނަކީ ފިރުޒައުލް އަބްދުﷲ ޚަލީލެވެ.
އިންތިޚާބީ ރައީސް ޑރ. މުއިއްޒު "ސަން"އަށް ވިދާޅުވި ގޮތުގައި، އަންނަ އާދިއްތަ ދުވަހު އިންތިގާލީ ކޮމިޓީތަކުން ދައުލަތުގެ ވުޒާރާތަކަށް ޒިޔާރާތްކުރުމުގެ މަސައްކަތް ފަށާނެއެވެ. އެ މަސައްކަތަށް ވަކި ޓައިމްލައިނެއްގެ ތެރެއިން ކަންކަން ކުރެވެމުން އަންނަކަމަށް ވެސް އެ މަނިކުފާނު ވިދާޅުވިއެވެ.