02 Oct 2023, 13:29
މީގެ ކުރިން މީޑިއާގެ ދާއިރާގައި މަސައްކަތްޕުޅު ކުރެއްވި ރައީސުލްޖުމްޙޫރިއްޔާ އިބްރާހީމް މުޙައްމަދު ޞާލިޙު، ކުރިއަށް އޮތް ތަނުގައި ވެސް ފޮޓޯ ނެގުމާއި ކޮލަމް ލިޔުމަށް ޝައުގުވެރިކަން ހުރިކަން އެ މަނިކުފާނު މިއަދު ފާޅުކުރައްވައިފިއެވެ.
އެ މަނިކުފާނު ކިޔަވާ ވިދާޅުވުމަށް ފަހު، އެންމެ ފުރަތަމަ ވަޒީފާ އަދާކުރައްވާފައި ވަނީ ޓީވީއެމްގައެވެ. އެގޮތުން ރައީސް ޞާލިޙު ވަނީ 1984 ވަނަ އަހަރުން ފެށިގެން 1989 ވަނަ އަހަރާ ހަމައަށް ޓީވީއެމްގައި ޕްރޮޑިއުސަރެއްގެ ގޮތުގައި މަސައްކަތްޕުޅު ކުރައްވާފައެވެ.
އެ މަނިކުފާނުގެ ފަސް އަހަރުގެ ދައުރު ނިމުމަކާ ހިސާބަށް އައި އިރު މިިދިޔަ ހޮނިހިރު ދުވަހު ބޭއްވި ރިޔާސީ އިންތިޚާބުގެ ދެވަނަ ބުރުގައި އެ މަނިކުފާނު ވަނީ ނާކާމިޔާބުވެވަޑައިގެންފައެވެ.
އެއަށް ފަހު ބަލި ގަބޫލުކުރެއްވުމަށް ފަހު ފުރަތަމަ ފަހަރަށް މިއަދު ރައީސް އޮފީހުގައި ނޫސްވެރިންނާ ބައްދަލުކުރައްވާ އެ މަނިކުފާނު ވަނީ ރައީސް އޮފީހުގެ ޕޯޑިއަމްގައި ނޫން ނަމަވެސް އަދިވެސް ނޫސްވެރިންނާ ގާތް ގުޅުމެއް ބާއްވަވާނެ ކަމަށް ވިދާޅުވެފައެވެ. އަދި، އެ މަނިކުފާނަކީ މީޑިއާގެ ދާއިރާގައި މީގެ ކުރިން މަސައްކަތް ކުރެއްވި ބޭފުޅެއްކަން ފާހަގަކުރައްވާ ވިދާޅުވީ އެފަދަ އެތަކެއް މަސައްކަތްތައް އެ މަނިކުފާނަށް ކުރެއްވިދާނެ ކަމަށް ގަބޫލުކުރައްވާ ކަމަށެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުން-- ފޮޓޯ/ ރައީސް އޮފީސް
"އަޅުގަނޑަށް ކޮންޓްރިބިއުޓް ކޮށްދެވޭނެ ވަރަށް ގިނަ ދާއިރާތައް އެބަހުރި. އަޅުގަނޑު ދެކޭ ގޮތުގަ ނޫސްވެރިކަމުގެ ތެރޭގައި ވެސް އުޅެފަ ހުރި މީހެއް އަޅުގަނޑަކީ. ތިއިން ބޭފުޅަކު [ނޫސްވެރިންނަށް އިޝާރާތްކުރައްވާ] އަޅުގަނޑަށް ކޮލަމެއް ދެއްވައިފިކަމަށް ވާނަމަ އަޅުގަނޑު ލިޔެލާނަން ކޮންމެ ވެސް އެއްޗެއް. އެކަން ވެސް އަޅުގަނޑަށް ކުރެވޭނެ،" ރައީސް ޞާލިޙު ވިދާޅުވިއެވެ.
"އަޅުގަނޑަކީ ފޮޓޯ ވެސް ނަގާ މީހެއް. ކެމެރާ ހިފައިގެން އަޅުގަނޑަށް މަގުމަތީގައި ވެސް އުޅެވޭނެ،"
ވެރިކަމުން ފައިބައިވަޑައިގަތުމަށް ފަހު ވެސް އެ މަނިކުފާނަށް ކުރެވޭނެ ކިތަންމެ ކަމެއް އެބަހުރި ކަމަށް ރައީސް ޞާލިޙު ވިދާޅުވިއެވެ. އެހެންނަމަވެސް އެ މަނިކުފާނުގެ ވިސްނުމުގައި ހުރީ މާ ބުރަ މަސައްކަތެއް ކުރުން ނޫން ކަމަށް ވިދާޅުވިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުން-- ފޮޓޯ/ ރައީސް އޮފީސް
"މި މަގާމުން ފޭބުމަށް ފަހު އަޅުގަނޑު ވަރަށް ހުސްވާނެ. ތި ބޭފުޅުން ދެއްވަން ވާނެ އަޅުގަނޑަށް ކޮލަމެއް. އޭރުން އަޅުގަނޑު ކޮންޓްރިބިއުޓް ކޮށްދެއްވާނަން އަޅުގަނޑުގެ ހިޔާލުތައް،" ނޫސްވެރިންނަށް އިޝާރާތްކުރައްވާ ރައީސް ޞާލިޙު ވިދާޅުވިއެވެ.
"އަދި އަޅުގަނޑު އެކީގައި ރިޓަޔާ ކޮށްފައި ގޭގައި އިންނަ ހިސާބަކަށް ނުދޭ. ގައުމަށްޓަކައި ކޮށްދެވޭނެ އެތަކެއް މަސައްކަތްތަކެއް އެބަހުރި،"
އެ މަނިކުފާނު ވިދާޅުވީ ލިބިލައްވާފައި ހުރި ތަޖުރިބާއާއި ޢިލްމެއްގެ އަލީގައި ގައުމަށް ކޮށްދެވެން ހުރި ހުރިހާ ކަމެއް ކުރިއަށް އޮތް ތަނުގައި ވެސް ކޮށްދެއްވާނެ ކަމަށެވެ.