Last Updated: 2 year 2 month ago
މިއީ ރިޔާސީ އިންތިޚާބުގެ ނާކާމިޔާބަށް ފަހު، ރައީސް އިބްރާހިމް މުހައްމަދު ޞާލިޙް ނޫސްވެރިންނާ ބައްދަލުކުރައްވައި ފުރަތަމަ ފަހަރެވެ.
ހޮނިހިރު ދުވަހު ބޭއްވި ރިޔާސީ އިންތިޚާބުގެ ވަގުތީ ނަތީޖާ ދައްކާ ގޮތުން، އެމްޑީޕީގެ ޓިކެޓުގައި ވާދަކުރެއްވި ރައީސް ޞާލިޙަށް ލިބިވަޑައިގަތީ 109،868 ވޯޓެވެ. އެއީ، އިންތިޚާބުގެ ވޯޓުލީ 246،915 މީހުންގެ 46 އިންސައްތައެވެ. އިންތިޚާބު ކާމިޔާބު ކުރެއްވީ އިދިކޮޅު ޕީއެންސީގެ ޓިކެޓުގައި ވާދަކުރެއްވި، މިހާރު މާލޭގެ މޭޔަރު ޑރ. މުހައްމަދު މުއިއްޒެވެ. އެ މަނިކުފާނު ވަނީ 54 އިންސައްތަ ވޯޓު ހޯއްދަވައިފައެވެ. އެއީ، 129،159 ވޯޓެވެ.
އިންތިޚާބުގެ ވަގުތީ ނަތީޖާ ލިބުމާ އެކު ރައީސް ވަނީ އިންތިޚާބީ ރައީސް މުއިއްޒަށް މަރުހަބާ ދަންނަވައިފައެވެ. އަދި، އިއްޔެ އެ މަނިކުފާނު ވަނީ ރައީސް އޮފީހުގައި މުއިއްޒާ ބައްދަލުކުރައްވައިފައެވެ. އިންތިޚާބީ ރައީސްގެ އެދިލެއްވުމާ އެއްގޮތަށް، ޖަލު ހުކުމެއް ތަންފީޒު ކުރައްވަމުން ގެންދެވި ކުރީގެ ރައީސް އަބްދުﷲ ޔާމީން އަބްދުލްގައްޔޫމް ގެކޮޅަށް ބަދަލުކުރައްވަން ވެސް އިއްޔެ ރައީސް ވަނީ ނިންމަވައިފައެވެ.
"އަދި އަޅުގަނޑު އެކީގައި ރިޓަޔާ ކޮށްފައި ގޭގައި އިންނަ ހިސާބަކަށް ނުދޭ. ގައުމަށްޓަކައި ކޮށްދެވޭނެ އެތަކެއް މަސައްކަތްތަކެއް އެބަހުރި،"
"[އެމްޑީޕީގެ] 99 ޕަސެންޓު މިހާތަނަށް [ނަޝީދަށް] ނޫނެކޭ ބުނީ. ބަރުލަމާނީއަށެސް ނޫނެނޭ ބުނީ،"
އަޅުގަނޑު ނެތަސް އެމްޑީޕީ ހިނގާނެ،
އަޅުގަނޑު ނެތިން ރައްޔިތުން މަޖިލީހަށް ކުރިމަތިލާކަށް،
އަޅުގަނޑުމެންގެ ފޮރިން ޕޮލިސީއަކީ އަޅުގަނޑު ގަބޫލުކުރާ ގޮތުގައި މިހާތަނަށް އެއްވެސް ސަރުކާރަކުން ހިންގި އެންމެ ރަނގަޅު ފޮރިން ޕޮލިސީ،
އެމްޑީޕީ ހަލާކުވެ ބަލިކަށިވެގެން ދާތަން ބަލާކަށް އަޅުގަނޑު ނުހުންނާނަން،
އަޅުގަނޑު ދެކޭ ގޮތުގައި ރައްޔިތުންނަށް ވީ ވައުދާ އެއްގޮތަށް އަޅުގަނޑުމެންނަށް މަސައްކަތްތަކެއް ކުރެވިއްޖެ. އެ ކަމާ ދޭތެރޭގައި އަޅުގަނޑު ވަރަށް ބޮޑަށް ހިތްހަމަޖެހޭ،
އަޅުގަނޑަށް ޖަވާބުދާރީ ނުވެވޭނެ ވަރުގެ ކަމެއް އަޅުގަނޑު ކޮށްފައެއް ނޯންނާނެ،