27 Sep 2023, 12:45
ރިޔާސީ އިންތިޚާބުގެ ދެވަނަ ބުރުގައި ވާދަކުރާ ސަރުކާރު ކޯލިޝަންގެ ކެންޑިޑޭޓް ރައީސް އިބްރާހީމް މުހައްމަދު ޞާލިހާއި ޕީޕީއެމް/ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ކެމްޕެއިނަށް އެއް ވަގުތެއްގައި އައްޑޫގައި ހަރަކާތްތެރި ވާއިރު، އެ ސިޓީގައި މިވަގުތު ސިޔާސީ ފޯރި ވަރަށް ގަދައެވެ.
ކެމްޕެއިންގެ ފަހު ދުވަސްތައް ގުނަމުން ދާއިރު ރައީސް އައްޑޫއަށް ވަޑައިގަތީ ރޭގެ ވަގުތެއްގައެވެ. އަދި މިއަދު ހެނދުނު ވަނީ ހިތަދޫއަށް ވަޑައިގެން ކެމްޕެއިން ޓީމުތަކާ ބައްދަލު ކުރައްވާފައެވެ. ރައީސްގެ ރަނިންމޭޓް މުހައްމަދު އަސްލަމަކީ ހިތަދޫ އުތުރު ދާއިރާގެ މެމްބަރު ވެސް މެއެވެ.
ރައީސް ޞާލިޙް އައްޑޫގައި ކެމްޕެއިން ޓީމްތަކާ ބައްދަލު ކުރައްވަނީ-- ފޮޓޯ: އެމްޑީޕީ
ޑރ. މުއިއްޒު އައްޑޫއަށް ވަޑައިގަތީ ރައީސް ހިތަދޫގައި ހަރަކާތްތެރި ވަނިކޮށް މިއަދު ހެނދުނު 10 ޖެހިއިރެވެ. ޑރ. މުއިއްޒު ފުރަތަމަ ވަޑައިގަތީ ފޭދޫއަށެވެ. އެއަށްފަހު މިހާރު ދަތުރުކުރަމުން ދަނީ ހިތަދޫއަށް ދިއުމަށެވެ.
ރައީސް ހިތަދޫ ކެމްޕެއިން ނިންމަވާލެއްވުމަށް ފަހު މިހާރު ދަތުރު ކުރައްވަނީ އެއާޕޯޓަށް ދިއުމަށެވެ. އެހެންކަމުން ދެ ކެންޑިޑޭޓުން ބައްދަލެއް ނުވާނެއެވެ.
ނަމަވެސް އައްޑޫ މިއަދު ވަނީ ސިޔާސީ ފޯރި އާއި ޖޯޝުގައެވެ. މުޅި އައްޑޫ ވަނީ ރީންދުލާއި ފިޔާތޮށި ކުލައިން ޖަރީ ވެފައެވެ.
އިދިކޮޅު ކެންޑިޑޭޓް ޑރ. މުޙައްމަދު މުއިއްޒު ކެމްޕެއިންގައި އައްޑޫގައި-- ފޮޓޯ: ޕީޕީއެމް
މީގެ ކުރިން ވެސް ރައީސާއި ޑރ. މުއިއްޒު އެއް ވަގުތެއްގައި އެއް ރަށެއްގައި ވަނީ ކެމްޕެއިން ކުރައްވާފައެވެ. އެގޮތުން ދެ ކެންޑިޑޭޓުން އެކުއެކީ ކެމްޕެއިން ކުރެއްވީ މިދިޔަ މަހުގެ 31ވަނަ ދުވަހު ޅ. ކުރެންދޫގައެވެ.
އެ ރަށުގައި ދެ ކެންޑިޑޭޓުން ވެސް ސިޔާސީ ހަރަކާތް ހިންގާފައިވަނީ އިންތިޚާބުގެ ގަވާއިދާ އެއްގޮތްވާ ގޮތުގެ މަތިން، ރަށުގެ ދެ ކޮޅުގައެވެ. އަދި، އެއް ފަހަރާ ދެ ކެންޑިޑޭޓުން ވަޑައިގެން ނަމަވެސް އެ ރަށުގައި އެއްވެސް ވަރެއްގެ ހަމަނުޖެހުމެއް ހިނގައިފައެއް ނުވެއެވެ. މުޅި ރަށުގައި އޮތީ އެއްބައިވަންތަ ސިޔާސީ ރޫހެކެވެ.
ރިޔާސީ އިންތިޚާބުގެ ގަވާއިދު ބުނާ ގޮތުން، ވާދަވެރި ދެ ކެންޑިޑޭޓުންނަށް އެއް ތަނެއްގައި އެއް ފަހަރާ ސިޔާސީ ހަރަކާތެއް ނުހިންގޭނެއެވެ.