09 Sep 2023, 18:19
މިއަދު ބޭއްވި ރިޔާސީ އިންތިޚާބުގައި ވޯޓުލާފައި ވަނީ ގާތްގަނޑަކަށް 75 ޕަސެންޓު މީހުން ކަމަށާއި މިއީ އެންމެ މަދުން ވޯޓުލި ރިޔާސީ އިންތިޚާބު ކަމަށް އިލެކްޝަންސް ކޮމިޝަނުން ބުނެފިއެވެ.
އީސީގެ ސެކްރެޓަރީ ޖެނެރަލް ހަސަން ޒަކަރިއްޔާ "ސަން"އަށް ވިދާޅުވީ ވޯޓު އަދިވެސް ގުނަމުންދާތީ، ވޯޓުލި މީހުންގެ އަދަދު އަދި ޔަގީންނުވާ ކަމަށެވެ. ނަމަވެސް މި އިންތިޚާބުގައި ވޯޓުލާފައި ވަނީ ރިޔާސީ އިންތިޚާބަކަށް ބަލާއިރު މަދު މީހުންކަން އޭނާ ފާހަގަކުރެއްވިއެވެ.
މިފަހަރުގެ ރިޔާސީ އިންތިޚާބުގައި ވޯޓުލުމުގެ ހައްގު ލިބިގެންވާ މީހުންގެ އަދަދު 282،395އަށް އަރައެވެ. އޭގެ 75 ޕަސެންޓަކީ 211796 މީހުންނެވެ.
މި އިންތިޚާބުގައި އަށް ކެންޑިޑޭޓުން ވާދަކުރައްވާއިރު މިއީ އެންމެ ގިނަ ކެންޑިޑޭޓުން ވާދަކުރައްވާ އިންތިޚާބެވެ.
އީސީން އެންމެ ފަހުން އާންމުކޮށްފައިވާ ތަފާސްހިސާބަށް ބަލާއިރު 14:00އާ ހަމައަށް ވޯޓުލާފައި ވަނީ 58.42 ޕަސެންޓް މީހުންނެވެ. އޭގެ ތެރޭގައި ހިމެނެނީ 82183 އަންހެނުންނާއި 82798 ފިރިހެނުންނެވެ.
މިއަދު 8:00ގައި ވޯޓުލުން ފަށައި، ވޯޓުލާ ހުރިހާ މަރުކަޒެއްގައި ވެސް 4:00ގައި ކިޔޫތައް ވަނީ ބަންދުކޮށްފައެވެ. އޭގެ ސަބަބުން ވޯޓުލުމުގެ ފުރުސަތު ނުލިބުނު ބައެއް މީހުން ނުރުހުން ފާޅުކޮށް، މާލޭގެ ބައެއް ސަރަހައްދުތަކުގައި ހަމަނުޖެހުންތައް ހިނގާފައިވެއެވެ.
މީގެ ކުރިން ބާއްވާފައިވާ ގިނަ އިންތިޚާބުތަކުގައި ވީހާވެސް ގިނަ މީހުންނަށް ވޯޓުލާން ފުރުސަތު ދިނުމުގެ ގޮތުން، ކިޔޫ ބަންދުކުރާނެ ކަމަށް އީސީން އާންމުކޮށް ދުރާލާ އިއުލާން ކުރާ ގަޑިއަށް ވުރެ އިތުރަށް ވަގުތުދެއެވެ.
ނަމަވެސް، މިފަހަރު އީސީން ވަނީ ހަތަރެއް ޖެހުމާއެކު ކިޔޫތައް ބަންދުކުރާނެ ކަމަށާއި އެއަށް ފަހު ވޯޓުލެވޭނީ ހަމައެކަނި އެވަގުތު ކިޔޫގައި ތިބި މީހުންނަށް ކަމަށް ބުނެފައެވެ.